Luk 22:34-71

³⁴Odocob Jisas uqa Pita madon, “Pita, ija mahigina, witic ina mala manahal qee qoc ninijeb hina qee sasac ququ madegan, ‘Uqanu qee dugina,’ i cijeddogan,” don.

³⁵Odimei Jisas uqana malogom sisiladen, “Saen age meen qaig tacecca, badomca, jaimaga tacecca qee suladem eu nuimeig cetehca qee coboinfo?” aden. Odocob age jejeg hewi madoin, “Ceteh osol osoca qee eu qee cobolom,” doin.

³⁶Odocob Jisas maaden, “Euqa qila in oso uqa meen qaig taceccafo, badomcafo eufi cois ahewigian. Odocob oso uqa han siginca qeefi uqana lotoc ben suldumei oso fajigian.

³⁷Eunu ija edi maadigina. Anutna jaqec je oso edi maden: ‘Age uqa loo je wooldoc dana osoben bibilegin meciadein,’ eu mele bahic ijaca hona. Ge, ijanu Anutna jaqec je tawena eu mele bahic ihoc lena,” aden.

³⁸Odocob malogom age madoin, “O Tibud faga, han sigin lecis ihec,” doin. Odocob uqa maaden, “Eu ihoc!” aden.

³⁹Odimei Jisas uqana kobol toodumei uqa cudun eu cuculdi Oliw Aluhna ten. Uqa gaid odoloi odi odocob uqana malogom hib toodocobil tein.

⁴⁰Cudun euna ti calimeig uqa maaden, “Temadecna qee lowainnu inondoiga,” aden.

⁴¹Odimei uqa cuculadi dana oso meen qeleceb nui tonena eu odi timei gob cehimei Anut inondon.

⁴²Odocob uqa madon, “O Mei, hina gabin i cawalitecnu cisdoc nijecebfi cawalitiga. Euqa ijana cisdoc cain toodogaun, hinana cisdoc toodoga,” don.

⁴³Odocob ensel oso sao jobondec gagadic odoc utigiannu nen.

⁴⁴Odocob Jisas deweg culumen doc tebandumei gagadic bahic Anut inondon. Odimei musul golac gagadic cinigwe mahana toocooi tonen.

⁴⁵Uqa inondu hedumei caji uqana malogom ageca ceseli non. Odimei wawaga culumen adecna us ninijegin meciaden.

⁴⁶Uqa maaden, “Age eetanu us nijegina? Cajimeig temadecna qee lowainnu inondoiga,” aden.

⁴⁷Uqana malogom je maaaden dana am ben bahic tein. Dana aquneceb tein uqa ijan Judas uqa malogom 12-pela eundec oso. Uqa Jisas cotdugiannu cemenug ten.

⁴⁸Euqa Jisas madon, “Judas, hina cotecna Dana Melah uqana cad amagana camasac mudugunafo?” don.

⁴⁹Saen malogom Jisasca tawein eu age ceteh caligia oodon fimeig sisildoin, “Tibud, egena han siginna cois cadecnufo?” doin.

⁵⁰Odocob malogom oso uqana han siginna ihanec dana ilona cabi dana qelimei dahig meulana isec caguton.

⁵¹Euqa Jisas maadimei, “Eu odi cain! Kobol eu culeiga!” adimei uqa qududocob dahig me muden.

⁵²Odimei Jisas uqa ihanec dana benbenca, tempel cofdoc han danaca, Juda agena matuca age uqa hewoqaga lein eu maaden, “Eetanu age han siginca han galabca heje oc dana cinigwe hewoqagannu hoiga?

⁵³Ija ageca tempelna gaidgaid bilolob. Odocob age saen euna ija hewitecnu oso qee odoloin. Euqa qila eu agena gagadic odoc saen. Eu tu uqana gagadic odoc gagadic bahic mena,” aden.

⁵⁴Eu age Jisas hewimeig ihanec dana agena ilona jona ehi lein. Odocob Pita Jisas tabag hehewi tooaden.

⁵⁵Jo eu gel dunuh ja hudein. Odocob Pita leceb leih ja cudun bilein gami bilein.

⁵⁶Odocob cabi mel aid oso ono ja cudun bibilen fimei deei maden, “Dana i ha uqaca bilein!” en.

⁵⁷Euqa Pita uqa qee sasac qu madon, “Caja, ija uqanu qee dugina!” don.

⁵⁸Odocob saen nag gieceb dana oso fecidumei madon, “Hina agenadec oso!” don. Euqa Pita jejeg hewi madon, “Dana, ija qee iel!” don.

⁵⁹Odocob aua osol odi hedocob dana oso gagadic bahic maden, “Dana i uqaha Galilidec. Eunu mele bahic, uqaca bilesin,” en.

⁶⁰Euqa Pita jejeg hewi madon, “Dana, hina eetanu madagana eu ija qee dugina!” don. Saen uqa je mamaden bahic mala manahal qon.

⁶¹Odocob Tibud qaalimei Pita fen. Odocob Pita Tibud je madonnu cisdon, “Mala manahal qee qoc ninijeb hina qee sasac ququ ijanu qee dogona ec madi cijeddogan,” don.

⁶²Odocob Pita jo eu cuculi cali limei ben bahic qajen.

⁶³Odocob dana Jisas cofdu tawein eu age cih je madodoig ququein.

⁶⁴Ameg qagimeig sisildoin, “Je hahun magaga doqa! Info qihia?” doin.

⁶⁵Odimeig je qesaldoc geh bahic madoin.

⁶⁶Walag daneceb Juda agena matuca, ihanec dana benbenca, dana loo je iwaladecca cegulein. Odocob Jisas eu agena gesilecnu tamanec euna ehudi ehi lein.

⁶⁷Age madoin, “Hina Anutna Krais eu melefi magaga,” doin. Odocob uqa jejenega hewi maaden, “Ija maadeceminfi ijana jenu wawaga qee meleeiaun.

⁶⁸Odocob ija je oso sisiladeceminfi age jejeni qee hewowain.

⁶⁹Euqa qila nueceb hibna ha Dana Melah Anut gagadic odocca bahic eben meulana isec biligian,” aden.

⁷⁰Eu age cunug madoin, “Hina mele bahic Anut Melah?” doin. Odocob uqa jejenega hewi maaden, “Age madegina eu odi,” aden.

⁷¹Odocob eu age madein, “Ege je dana i maden qasali magecnu dana leih qee cedoqaun. Egedodoc bahic uqa cona madeceb dah moqa!” ein.