SAN LUCAS 22:34-71

³⁴ꞌBa Jesús kitsure: —Pedro, an xinra̱, kionga kje kjiꞌndajín chaxicha nixtjin ngandaꞌe, ji je ján ndiya kisji nga bi xutana̱ kuáin.

³⁵ꞌBa saꞌe tsiningiyare xutare: —Kionga kitsikasen_nuu̱ ꞌba kixin_nuu̱ nga bi xꞌo chitsa, ninga ton ninga jnde, ¿a tjin= xi kichajanu? ꞌBa nchjabiu kitsure: —Tumé kichajani̱.

³⁶ꞌBa Jesús kitsu nganire: —Tunga ngandaꞌe, xi tjinre chitsa, ngatabaꞌa. ꞌBa nde ngatabaꞌa tonre. ꞌBa xi tsajainre kicha, ngatateña najñu ndujure ꞌba ngatatsejngu.

³⁷Ngu ꞌba xin_nuu̱, nga tjinnere nga kꞌuetjusun enbi xi kuaꞌindutꞌa enre Naꞌenchana ngatꞌa tsaꞌan: “ꞌBa kui xi ꞌba nde kisꞌexkijinre xuta chꞌokun.” Ngatꞌa ngayéje xi kuaꞌindutꞌa ngatꞌana̱ tjinnere nga kꞌuetjusun.

³⁸ꞌBa nchjabiu kitsure: —¡Naꞌen, ngaꞌe tjindu jó kicha! ꞌBa Jesús kitsu ngani: —Je kuán nde.

³⁹ꞌBa saꞌe Jesús ꞌetju ꞌba kiji tjenngi Ya Olivo jotsaꞌen ntsjai. ꞌBa nde xutare kitjenngi ngayeje.

⁴⁰ꞌBa kionga je echu kio, Jesús kitsure: —Chjaꞌa_ru kjuanda Naꞌenchana, tuxi bi xutꞌayakoninú.

⁴¹ꞌBa kitsikjintꞌare jo kjiꞌi ma chanikjaꞌa jngu ndiojo. ꞌBa kio tsakasenkunchꞌin ꞌba jako Naꞌenchana,

⁴²ꞌba kitsure: —Naꞌen, tsa mejénri kꞌuejñatꞌaxinnaa̱ kui kjuanimabi, tꞌejñatꞌaxinnaa̱. Tunga bi ngatjama jotsaꞌen an mejénna̱, tusa jotsaꞌen ji mejénri.

⁴³ꞌBa kuatsejen jngu ankje xi jendibajenni ngankꞌaa nga jaꞌetsjare ngaꞌñu.

⁴⁴ꞌBa kionga ne tse kjuanima tifaꞌaxtiu Jesús, ngisa ꞌñu jako Naꞌenchana, ꞌba nandubare tsixu tꞌanangiu joni tinre jin xi tsiña.

⁴⁵ꞌBa kionga je jetꞌare nga tifako Naꞌenchana, tsisetjen ꞌba jendiba ngani ña tjindu xutare. ꞌBa kjiyufe nga echu ngatꞌa je kitsikjejndare kjuabo.

⁴⁶ꞌBa Jesús kitsure: —¿Ánñu tetsjujñafeñu? Tisetjion ꞌba chjaꞌa_ru kjuanda Naꞌenchana, tuxi bi xutꞌayakoninú.

⁴⁷ꞌBa yejerañu tinchja Jesús, nkjin xuta jaꞌe. ꞌBa Judas xi jngu xutare Jesús xi tejó tjentitjunre xutankjinbiu. Kui kitsitiñatꞌare Jesús ꞌba ꞌendsuꞌa.

⁴⁸ꞌBa Jesús kitsure: —Judas, ¿a ningantsjani Kiꞌndire Xuta xiꞌiun ko jngu ndsuꞌa?

⁴⁹ꞌBa kionga xutare xi inyandaire Jesús tsabe mé= xi tjima, tsiningiyare: —Naꞌen, ¿a kicha= kuixkjankoni̱?

⁵⁰ꞌBa jngu xutare xi sꞌejña kio yajare chuꞌndare naꞌmi titjun, ꞌba tsatetꞌa ñojon kixi.

⁵¹Tunga Jesús kitsu: —Je kuán nde. Bi ꞌba ñoꞌon. ꞌBa kitsiko ñojon chuꞌndabiu, ꞌba kitsinda.

⁵²ꞌBa saꞌe Jesús jako xi ngakure naꞌmiu ko xi ngakure chasoldadure ningu ꞌba ko nchja chingare naxinando xi jaꞌetsuba, ꞌba kitsure: —¿Ánñu ko kicha ko ya kichꞌañu nga jaꞌechjaꞌanuu̱, joni tsa jngu chacheje kuáa̱n?

⁵³Nyujun nyujun tsakatejñajinntsjai_nuu̱ nga yakuya ña ma ndetsinre ningu, ꞌba niñajanni kjindubanuu̱. Tunga tsojon horabi, kionga xi jñu batexuma.

⁵⁴ꞌBa saꞌe nchjabiu kitsuba Jesús ꞌba kiko ndaba naꞌmi titjun. ꞌBa Pedro kjin tjenngire.

⁵⁵ꞌBa ngamasenre ngandetsin niꞌyabiu nchjabiu ꞌetse ndiꞌi ꞌba tsikꞌendundaire, ꞌba Pedro ꞌba nde tsikꞌejñajinre ngayeje.

⁵⁶ꞌBa kio jngu chjun chuꞌnda tsabe kui nga tijñatꞌa ndiꞌu, ꞌba nda kiskutsejenꞌa, ꞌba kitsu: —Kui xutabi ꞌba=nde tsakꞌajmeko Jesús.

⁵⁷Tunga Pedro ꞌeꞌmotaꞌen yojore nga kitsu: —Na, bi ꞌbexkua̱n xutabiu.

⁵⁸ꞌBa sangutjun, ngijngu xuta tsabe ngani, ꞌba kitsure: —Ji ꞌba=nde makue nchjabiu ngayeje. Tunga Pedro kitsu: —Junjun, naꞌen, bi makua̱.

⁵⁹ꞌBaru tsa jngu hora jaskan ngani, ngijngu xuta ꞌñu si kitsu: —Kjuakixi= nga Jesús tsakꞌajmetjenngi, ngatꞌa ꞌba=nde Galilea tseꞌe ngayeje.

⁶⁰Tunga Pedro kitsu ngani: —Naꞌen, bi ꞌbia̱ mé= xi teꞌmi_ri. ꞌBa ndekuini chubabiu, yejerañu Pedro tinchja, taꞌa kiskiꞌnda jngu chaxicha.

⁶¹ꞌBa ꞌbatsaꞌen Naꞌenna Jesucristo kitsikuꞌbe ꞌba kiskutsejenꞌa Pedro, ꞌba kio Pedro jaꞌetsjenre en xi jaꞌba je kitsure: “Kionga kje kjiꞌndajín chaxicha nixtjin ngandaꞌe, ji je ján ndiya kisji nga bi xutana̱ kuáin.”

⁶²ꞌBa saꞌe Pedro ꞌetju ngaꞌndebiu, ꞌba ꞌñu kiskiꞌnda.

⁶³ꞌBa xi inyatsikuenda Jesús inyabejnuke ꞌba inyabajare.

⁶⁴ꞌBa ꞌeꞌmo tuxkun, ꞌba miningiyare: —Ji xi profeta ꞌmi_ri yojori, ꞌba tꞌinnii̱, ¿ꞌyá= xi yajari ngandaꞌe nde?

⁶⁵ꞌBa kitsure nkjin kuya en chꞌotsu.

⁶⁶ꞌBa kionga je kisꞌe isen, kuañajan nchja chingare naxinando ko xi ngakure naꞌmiu ꞌba ko chjine kjuatexuma, ꞌba kiko Jesús ña mañajan ngatsiꞌi xutaxa judío. ꞌBa kio tsiningiyare:

⁶⁷—ꞌBa tꞌinnii̱, ¿a ji= ni xi Cristo? Tunga Jesús kitsure: —Tsa xin_nuu̱ nga kui= ña̱, bi ku̱akjainnu.

⁶⁸ꞌBa tsa skuiningiya_nuu̱, bi singojonuu̱ ninga bi kjuinuntjinnuu̱.

⁶⁹Tunga baꞌanire ngandaꞌe Kiꞌndire Xuta xiꞌiun kꞌuejña ngate kixire Naꞌenchana xi ꞌñu tse kjuaꞌñu tjinre.

⁷⁰ꞌBa saꞌe ngatsiꞌi tsiningiyare: —¿A jixu xi Kiꞌndire Naꞌenchana kuáin? ꞌBa kui kitsure: —Jún= suba je ꞌba temixun.

⁷¹ꞌBa meni nchjabiu kitsu: —¿A machjen ngisana xuta xi kuetsu mé= xi kitsaꞌen? Ña= suba je kjinuꞌya en xi kitsu.