Loum 10:10-21

¹⁰Adipalati, wa꞉ dupa duluta mikadepe dle koko tle Godta wa꞉ye ya꞉ mila꞉pi tle ullu pa꞉le oplami demhalapo. Epame wa꞉ mati tle Yesuye Lodpo depo botomastlepiye, etapo wa꞉ye pasakalo gadle kokoye halepe.

¹¹Adipalati, God yu bukatapo epo atlapo, “Oplami antapo Keliso dla mikadepe dlepiye, ya꞉ wota꞉le ponatimhallowa,” depo.

¹²Ipapele koko dulu dla di natipo, Yu so mate epo po-Yu so mateye ma-hatlopepo. Adipalati, di Lod ma hatlopepo. Epapele koko tle ya꞉tapo ya꞉ watle otele himha꞉ha꞉ so dla ka꞉ka꞉dle koko hapuloma halopimhalapo.

¹³Adipalati, God yu bukatapo epo atlapo, “Oplami antapo gadle yilo Lod dla otele himhallepiye, ya꞉ta pasakalo gadle kokoye halepe.”

¹⁴Epapele dulu dla opata God dla pomikadepe dlalo wekematiye, yia꞉ adipammama pasakalo gadlowe yilo ya꞉ dla otele himpa꞉? Epame yia꞉tapo ya꞉ koko podlallalo wekematiye, yia꞉ adipammama ya꞉ dla mikadepe depa꞉? Epame ka꞉dle yuye yia꞉ dla po-atlamalalo wekematiye, yia꞉ adipammama God yu dalepo hapa꞉?

¹⁵Epame ka꞉dle yu atlamalalo soye potaiya dlalo wekematiye, yia꞉ adipo God yu atlamsiyamelemo? Epapedeme God yu bukatapo epo atlapo, “Ka꞉dle yu hamsiyamalalo sotapo ka꞉dle yu hame pula natiloweye pta ka꞉pi.”

¹⁶Amasiyama dulu edla pase opa hapulomatapo pomikadepe dena. Yu iye Aisayatapo God yu buka dla epo atluwapo, “Lod, di yuye opa anawolota mikadepe duwa?”

¹⁷Epapedeme ka꞉dle yu Yesu Keliso koko dallowe kokotapo mikadepe dlowe kokoye hampuapo.

¹⁸Epapele dulu dla Isalael soye adipapopa꞉? Yia꞉ ka꞉dle yu mo-daluwa? Yao, yia꞉ ma-dlaluwapo. Adipalati, God yu bukata epo atlapo, “Ka꞉dle yu hamsiyamalalo sotapo ka꞉dle yuye ta꞉lamo pato dla tame opa hapuloma dla ma-atlamtauwapo.”

¹⁹Amasiyama Isalael sotapo ka꞉dle yu iye dalepame malamale hauwa? Yao, yia꞉ malamale hauwa tlope, woloma pomikadepe dena. Epedeme Mosestapo epo ilimuwapo, “Godtapo epo atluwapo, ‘Na꞉tapo po-Yu so dla gadle himhallati ma wua꞉tapo yia꞉ dla elle himha꞉ha꞉mama yia꞉ dla siyalasiyalademha꞉ha꞉lepe.’”

²⁰Epame Aisayatapo Godta atlamale yu iye wota꞉le pa꞉po epo atluwapo, “Opa na꞉ pototamha꞉ha꞉lalo wekele sotapo na꞉ye ma-natiwapo. Epame na꞉tapo na꞉ pototamalalo wekele so dla naskamu na꞉ kokoye nati-iwapo.”

²¹Amasiyama Godtapo Isalael so dla epo atluwapo, “Na꞉ alila hapuloma dulu dla wua꞉ elemolowedeme ma-dinapopo halemduwapo. Amasiyama muwolo dupa kokalalimale koko tle na꞉ yu dla dalepo salladla allimduwapo.”