Rom 10:10-21

¹⁰Iange letem manmanna nge teu toto pe nem poia iong ke o lohot ke o pengpeng nga NeHalang matana. Pe nga halim o hele hote letem manmanna ngana pe nem poia iong ke NeHalang mene mule iong.

¹¹Iange NeHalang nena alalaha nenge tehas sue ke ulolo, hele ke teke, “Mele nenge letena manmanna nge Kristus, lape NeHalang hile hote i ero.”

¹²Poinga nem lape lohot ke elle mana nge Iuta mur pe hana lomonmona ngana mur pule. Ute pele nge altoto nge iri ero. Ke Non Soke elle nem, i hulua lochloch nenge leteria mamanna nge i aria Non Soke ia, pe lape tunge ure urana ngana mur lange iri.

¹³Ke, “iri lochloch ngana nenge leteria manmanna nge i lape NeHalang mene mule iri.”

¹⁴Pe nenge teke leteria manmanna nge NeHalang ero, pomerei nge te onteia I ke halaua iri? Pe nenge teke te longe NeHalang nena helenga ero, lape leteria manmanna nge I ke merei toto? Pe nenge teke mele haliu hote nena helenga ero, lape te longe ke mere?

¹⁵Pe nenge teke te kulos hote iri ero lape te haliu hote nena helenga ke pomerei? Ke NeHalang nena alalaha nenge tehas sue ke ulolo, hele ke teke, “Urana toto! Hana nenge tei hot ia helenga urana toto ngana, ngaria koi te atat!”

¹⁶Pe hana halang nge Israel te longala teua helenga urana toto ngana nem ero. Iange hetatalonga Isaias hele ke teke, “Non Soke, mele pele letena manmanna nga lem helenga nenge mo haliu hote lange iri ero.”

¹⁷Ita, letera manmanna ngara lohot iange ta longe helenga urana toto ngana. Pe ta longe helenga urana toto ngana iange mele haliu hote Kristus nena helenga.

¹⁸Pe e teke e onteia imo ke pomai: Hehei pe hana nenge Israel mai, te longe helenga urana toto ngana pule ma ero? Iri te longe ke ulolo. Iange NeHalang nena alalaha nenge tehas sue ke ulolo hele ke teke, “Te longe hana nemur reria haliunga nga ich lochloch, pe reria haliunga song ke langa kileng lochloch ngana nga ich.”

¹⁹Iok, lape e ontei mule imo ke pomai: Heei pe hana nenge Israel mai, te eteia helenga urana toto ngana pule ma ero? Iri te eteia ke ulolo. Iange Moses hele tala ke teke, “Lape e mene teua iri nenge lek hana mur ia iri ero ke tetu luluch nge iau, pe nga nem lape e poia imo ke samo keke iri. Pe lape letek urana ia iri nenge te eteia ute e ero toto pe nga nem lape e helete ininia imo.”

²⁰Hetatalonga Isaias heleia NeHalang nena helenga ke mallaha toto ke teke, “Heei pe hana nenge te tango rerere iau ero, te hottaua iau. Pe e hemallaha hote iau lange iri nenge te ontei rerere iau ero.”

²¹Pe nenge Israel, NeHalang hele ke teke, “Nga etue lochloch etul hote perik ke e teke elau teua iri. Pe ero, te longo ole taua iau pe te hele poreke iau.”