Rom 10:10-21

¹⁰Veni navong meatin tai kur anatin eni en tin, Ahi lesi mal tuai en meten. Ka navong vit leini en ongon, Ahi mutut moulien onen tuai.

¹¹Veni Tus Votut viteni vit, “Koakeil akur anatin en kei, tounah tovuol kilea vasakin keil avamemou eni.”

¹²Koanik vit usil ir vasi. Veni, en meten Ahi, tounah tovuol vateisav en Siu keil ka koakeil arvitei Siu. Ahi vi vati Asuv etin onen meatin vasi keil, ka san tokolkatien koa mariso va min koakeil vasi avise ven kataunien.

¹³Koanek suval Tus Votut viteni koa vit, “Meatin vasi koa avise Iahova ven kataunien, kei houtut moulien one.”

¹⁴?Ka meatin keil akilea avahis Ahi ven kataunien hemukave munak arkultei veah anatin eni? ?Ka keil akilea avakur anatin eni hemukave munak arlongtei veah selusien usili? ?Ka keil akilea avalong selusien usili hemukave munak meatin tovuol vaha vahitehiteni min keil?

¹⁵?Ka meatin keil akilea avaha avahitehiten selusien enek hemukave munak meatin tovuol vasila lat keil avaha? Koanek suval Tus Votut viteni koa vit, “Navong meatin keil akur more longlongien, amaien one moreite mok.”

¹⁶Ka rovitei meatin vasi keil koa along kat more longlongien enek. Veni provet Aesea viteni mun vit, “?Iahova, isei kur anatin en selusien onomai? Meatin tovuol.”

¹⁷Sakini, helamu, meatin tai heha hehitehiten more longlongien usil Iesu Kristo min meatin keil. Hevus, meatin keil akilea avalonge. Ka navong alonge, akilea avaling demkatien one en kei.

¹⁸Ka navis kami, “?Mukave, vi anatin keke me-Isrel keil arlongtei more longlongien usil Kristo?” Vuo, keil alonge tuai. Veni koanek suval Tus Votut viteni koa vit, “Rea one karahit out vasi, ka longlongien keil one usil Ahi va rokol meatin vasi keil en out netan.”

¹⁹Navis ris kami, “?Mukave, vi anatin keke me-Isrel keil arkileatei asa koa Ahi vit voumoni?” Vuo akilea, veni Mosis mutisi keke Iahova varei viteni vit, “Inau nitokol kat koakeil arvitei meatin kati keil onak keke vasakin kami, meatin kati keil onak, mivahi elu eni. Anatin, numoni hetahos en kantri onen koakeil arkileatei inau. En sise enek, nisakin kami, meatin kati keil onak, tinomi hetisa eni.”

²⁰Ka Ahi vit kilea imok eni navong selus ka en provet Aesea vit, “Koakeil arlei kattei nau, keil varei avotin nau. Anatin, navothot enau min koakeil armultei avahise inau.”

²¹Ka Ahi vit usil me-Isrel keil vit, “En avong vasi, namutelan hek keke makur revi meatin keil onak. Ka arlong kattei inau ka vatie keih ramat.”