Text copied!
CopyCompare
Basef Buꞌwafi Godi - Fagafeꞌma Esis Romi - Fagafeꞌma Esis Romi 10

Fagafeꞌma Esis Romi 10:10-21

Help us?
Click on verse(s) to share them!
10Deiꞌ main, apaꞌ mahapilif nelelemb apeꞌilimbi God naꞌi apaꞌ amam nematawa magataga beꞌepa hililiꞌ eaꞌi. Eaꞌ mawalapa hapif malogof apeꞌigufi God nofaꞌapa nokwahomapa waf awafi mutanimai mape andeandeꞌ.
11Amamba siꞌi Baibel nagaꞌi, “Epen mamahina nagahapifa anini, anaf epen inimba ina okom iwanim, owaꞌatin.”
12Esis Juda saloma isimba owaꞌ Judaisia eaꞌ naꞌamba atin, God anen Dembinai atotona apaꞌ hiapaii. Eaꞌ anen natopalopapa nasoꞌapa waf buꞌwafi dowafa epes isimba mamahisa sogofala anini,
13siꞌi Baibel nagaꞌi, “Epes mamahisa sogaꞌi agol Dembinai ma sogofala anini, atiasi nofaꞌas nokwahomas waf awafi sotanimai.”
14Apaꞌ iꞌi esis owaꞌ sohapifanaia atiasi sofalana sogawana siꞌi mama? Eaꞌ esis iꞌi owaꞌ semeꞌ basefanaea, atiasi sohapifana siꞌimama? Eaꞌ iꞌi anin epen owaꞌ niꞌipasa basef esisa, deiꞌ esis sogawef siꞌimama? Owaꞌatin endilisi.
15Iꞌi God owaꞌ nosapaꞌi amam amambaia, deiꞌ atiasi amom mefeꞌ mowalapef miꞌimama? Owaꞌatin. Siꞌi Baibel nagaꞌi naꞌamba naꞌi, “Awasi! Maol inimba epes sofaꞌi basef buꞌwafi aeꞌafi sogafiꞌii, inimba fasini endilisi aꞌowaꞌ!”
16Apaꞌ ina Israel hiasi saila basef ifimba buꞌwafi Godi, owaꞌatin. Fowaꞌ profet anamba Aisaia nagaꞌi naꞌamba naꞌi, “Dembinai, anaf ami nihapila basef ifimba esis sogameꞌefa afaꞌi? Owaꞌatin.”
17Eaꞌ apaꞌ mogawa, apaꞌ hiapai mameꞌ basef buꞌwafi eaꞌ ifimba atif fasaꞌmai hapif apeꞌini. Eaꞌ deiꞌ basef ifimba fataga ufiaꞌw maiꞌw? Ifimba fataga amom magawalapa basef Kraisi atom.
18Apaꞌ aeꞌ aꞌias naꞌamba. Aꞌi esis ina sameꞌ basef ifimba buꞌwafi? Owaꞌatin. Esis sameꞌef eaꞌ, siꞌi Baibel nagaꞌi, “Basef fafeꞌ fandahama walemb hielimbi fafeꞌagon hiꞌalagon.”
19Aeꞌ etambel aꞌias. Aꞌi esis Israel sogawa basef ifimba aꞌa owaꞌ? Owaꞌatin. Sogawa eaꞌ. Moses naliꞌ nagaꞌi basef ifimba naꞌi, “God naꞌi, ‘Aeꞌ efaꞌ anis amam nematawa falafisi, esis ina epes banagasi anep miniꞌap endilisipi, owaꞌ. Aeꞌ ifaꞌasi etopalopas falafis anaf ipaꞌ kowolepama waf buꞌwafi aeꞌ endaꞌmasaf esisi. Aeꞌ ifaꞌai epes isimba owaꞌ sogogawaia eaꞌ anaf ipaꞌ pinifalis pendaꞌ megahohas.’”
20Apaꞌ Aisaia ina ombal mahana ma naꞌiam nagawalapam, owaꞌatin. Anen nawalapam naꞌiam alihim naꞌamba naꞌi, “Epes isimba owaꞌ sogolaoma aeꞌia, deiꞌ satolowe eaꞌ. Epes isimba owaꞌ sogahaliꞌasa aeꞌia, deiꞌ ataga andawalapa esis.”
21Apaꞌ esis Israel ina naꞌipas naꞌamba, owaꞌatin. Anen naꞌipas anif daif naꞌi, “God naꞌi, ‘Epes isimba sandaꞌ duꞌwanigai sogosambala basefi. Nogota lautai aꞌowaꞌ aeꞌ efalas andaꞌ lagof iwaulasi. Owaꞌ, owaꞌatin.’”

Read Fagafeꞌma Esis Romi 10Fagafeꞌma Esis Romi 10
Compare Fagafeꞌma Esis Romi 10:10-21Fagafeꞌma Esis Romi 10:10-21