Rom 10:10-21

¹⁰Pa ighe loloon ighur ila, ene aat Krisi igham ghiit taduduuŋ ila Maaron maata. Ve isaav ighe tauun avoon tavotia ghuruuŋ ila toit ila eval tiina matazi, ene aat Maaron igham mulin ghiit ve taleep poi.

¹¹Pasaa, Maaron aliiŋa tau tiboode na isaav ighe: “Tamtamon tisov tau tighur ila tooni, ene pale tighita ghuruuŋ ila toozi anooŋa ve Maaron igham mulin zi. Eta irau ighur maata pani sorok ne mako.”

¹²Saveeŋ tane iŋarui tamtamon tisov. Yes Yuda, ve yes tau Yuda mako na paam. Pasaa, Maaron eemon ilepleep. I Tiina to iit tasov. Ve i ighurghur poia tooni tiina izazaa to tamtamon tisov tau tighasoni pa uleeŋ.

¹³Pasaa, Maaron aliiŋa isaav ighe: “Tamtamon tisov tau tighason Maaron pa uleeŋ na, i aat igham mulin zi ve tileep poi.”

¹⁴Eemon isaav ighe tamtamon tighur ila to Maaron mako, ene pale tighasoni pa uleeŋ mindai? Ve isaav ighe tilooŋ vaaru mako, pale tighur ila tooni mindai? Ve isaav ighe lezi tamtamon eta to ivotia mos pazi mako, ene pale tilooŋ Maaron vaaru mindai?

¹⁵Ve isaav ighe timbaaŋ yes uraata tila mako, pale tivotia mos pa tamtamon mindai? Pasaa, Maaron aliiŋa tau tiboode na, isaav ighe: “Tamtamon tighita yes tau tilaghovai vaaru poia ilam na, le igham zi lolozi poia.”

¹⁶Eemon yes Israela tisov titaghon saveeŋ to vaaru poia mako. Eŋaeŋa mon. Saveeŋa, Isaia isavia muuŋ wa. Ighe: “Tiina, sei ighur ila saveeŋ tau yei nivotia pazi ne?”

¹⁷Tauvene Maaron aliiŋa ta taloŋlooŋa, tauta ipaburigin ghiit to taghur ila. Ve saawe tau tivotia Krisi vaaru, tamtamon tilooŋ saveeŋ tooni.

¹⁸Ighe tauvene, pale tasaav mindai pa yes Israela? Tilooŋ vaaru poia soone? Mako. Yes tilooŋa wa. Pasaa, Maaron aliiŋa isaav ighe: “Aliŋazi ila irau taan isov, ve saveeŋ toozi ilaan irau nughmariŋ.”

¹⁹Ma mindai? Yes Israela tilooŋ saveeŋ tawe, ve tikankaan pa puughu? Mako. Yes irau tighazooŋ pani. Aghita. Muuŋ, Mose isaav ighe: “Yes nugh nugh tau lezi ezazi mako ve lezi ŋgar mako na, yau aat nagham zi timin leg. Ve poia tsiau tau izaa toozi, ene pale igham gham atemim yavyav, ve aŋooŋ pazi.”

²⁰Ve propet Isaia isaav ghazooŋa kat ighe: “Tamtamon tau tizuari zi payau mako na, yes tana ta tindeeŋ ghau. Ve yes tau tighason payau mako, tauta natotoi taug pazi.”

²¹Eemon yes Israela, Isaia isavia saveeŋ iŋarui zi ighe: “Yam tau taliŋamim puura mako ve azorzoor aliŋag na, saawe isov yau nararaav nimag ve nasasaŋan gham to amuul alam payau. Eemon mako.”