Oromɛ Shɛɛn 10:10-21

¹⁰Bani na dà Yesu na ma zɔ wu na, lee funŋɔ ni Kilɛ ya sipya jateni sipyitiimɛ. Ma bu yi jo ma ɲɔ ki bɛ ni, wʼa ma ɲuŋɔ wolo.

¹¹Lʼa ka Kilɛ Kafila wu ni na: «Sipyaa sipya wʼa dà Kilɛ na ge, wu da ga ba weefɔɔ shiige bada wɛ.»

¹²Lee wuu na, Yawutuu yoo, shi wusama yoo, pu bɛɛri ɲɛ nigin. Kafɔɔ nigin wu ɲɛ pu bɛɛri Ɲuŋɔfɔɔ. Piimu bɛɛri pʼa wu mɛgɛ yiri ge, wʼa saama niɲɛhɛmɛ pyi pee bɛɛri mu.

¹³Bani li wa Kilɛ Kafila wu ni na: «Sipya bɛɛri wʼa Kafɔɔ mɛgɛ yiri ge, weefɔɔ na ba ɲuwuuro ta.»

¹⁴Ga yirigana lekɛ na pʼi da já wu mɛgɛ ki yiri, na ta pu ya dà wu na-ɛ wɛ? Dii pʼi da já dà wu na, na ta pu ya wu kaa logo-e wɛ? Pʼa wu kaa logo dii ni pii ya Kilɛ Jozaama pu yɛrɛ li pye pu mu-i wɛ?

¹⁵Pʼa já Kilɛ Jozaama pu yɛrɛ li pye pyegana lekɛ na wɛ? Fo pu bu pii tun, ma na jo ba lʼa ka Kilɛ Kafila wu ni wɛ na: «Piimu pʼa ma ni jomɔ nizaama pu ni ge, pee pama ya ɲɔ xuu wu bɛɛri ni.»

¹⁶Lee bɛ na sipyii bɛɛri ya ta sɔɔ pee Kilɛ Jozaama pu na wɛ. Yee Kilɛ tudunmɔɔ Ezayi bɛ ya fɛnhɛ jo na: «Wù Kafɔɔ, jɔgɔ wu da dà wèe wo jomɔ nizaama pu na wɛ?»

¹⁷Ayiwa, Kilɛ Jozaama pu wo logo funŋɔ ni nʼa daa ya daa. Pee Jozaama pe, Kirisa kaa pee ya yu.

¹⁸Ayiwa nɛ jo, li bu da mu, ta Izirayɛli shɛɛn pu ya pee Jozaama pu logo wɛ? Pʼa pu logo cɔ! Bani li wa Kilɛ Kafila wu ni na: «Pe jomɔ pe ya nɔ ɲiŋɛ ki bɛɛri na. Pe jomɔ pe ya nɔ fo koŋɔ ki kabaya yi bɛɛri na.»

¹⁹Ayiwa, nʼa da yi jo sanha jo ta Izirayɛli shɛɛn ya jomɔ pu ɲaha cɛ ta? Kilɛ tudunmɔɔ Musa ya fɛnhɛ li shɛ na Kilɛ ya jo na: «Yee ya shi wemu wii yafiin bɛ-ɛ ge, nɛ na ba wèe keree ɲɛpɛɛn leŋɛ yee ni. Shi wemu yee ya wii fungɔngɔ baa fɛɛ ge, nɛ na ba wee shi we wo keree pye yee mu loyire.»

²⁰Lee bɛɛri kadugo na Kilɛ tudunmɔɔ Ezayi ya lowaa ta na li shɛ sanha na Kilɛ ya jo na: «Piimu bye pu ya nɛ shaa-i ge, pee ya nɛ ɲa. Piimu pʼa pye pu ya kaa la shishiin shaa di jɛ nɛ shizhaa na-ɛ ge, nɛ nayɛ shɛ pee na.»

²¹Ga Kilɛ ya jo Izirayɛli shɛɛn shizhaa na na: «Nɛ na keye sanha yaha shi wa mu fo na shɛ caŋa ɲii li xɔ Niwewagaa sipyii pu ɲɛ pii ni nʼa she fɛɛ.»