Rom 10:10-21

¹⁰Menan bumaganu makewa gapan God anu tumasinanta, gare me nu kakaewa nagirewa dianeta. Amba nonu gapan anega wata, “Iesu me nu Ayop nugawa di,” ap gapan nu wat inakam nimaneta.

¹¹God nop mega ok anega seane, Waenapan da da me anu tumasepiwa, me inap tap gop da ya anuin.

¹²Nop mame seane, Diu ge Diu uoni nagirewa munan seane, iwa waenapan iravi God yamap daiton di. Amba me nu Ayop nugawa God daiton di. Da da God menan mup wapiwa, gare me wat aipakam baware iragen muneta.

¹³God nop mega ok anega seane, Waenapan da da God inap ago menan mup wapi, God inak ewakewa mumeta.

¹⁴Waenapan God ya anu tumasene menan anenen amba ago menan God inap mup wain? Amba God oit mega kakaewa den ya anune menan, mu anenen amba anu tumat tain? Amba orup da opata gapan wadiamopen menan ya wandepiwa mu anenen amba God oit mega kakaewa anuin?

¹⁵O opata waine nagirewa ya watu enamopi menan mu anenen amba opata wain? Amba sia God nop mega ok anega seane, Nu atonu den opata waine nagirewa waupamoit, iwa oit muga kakae iragen wadianepen tauane. Ok ap anega sean.

¹⁶Opata waine nagirewa tauane go orup upi nop muga ya waran. Watageta apane Aisaya ap umap sia wan, O God, waenapan otu dere megenat nop nuga anu tumat tane, go upi ya di anu warane. Ap anega wan.

¹⁷Ap menan Keriso oisewa orup da opata gapan waini menan orup dawa darinap anun. Keriso oisewa darinap anuni menan me anu tumat mega yane kai waren.

¹⁸Endi ne singui nega mam. At Isurero nagirewa oit ame darinamu gapan anune go uon? Mu di anuiwanum iwa God nop mega ok anega seane, Nop muga at at iragi senare tau aen. Nop muga piup iravi bararaen.

¹⁹Singui nega da sia mam. At Isurero nagirewa nop ame darinamup tauen, go mu ya anu awan go? Mu di anu awan. Mosis God noa ok anega sen, E nop nega ya warayan menan, ian ugupe nagirewa nop ame wadiamoin, amba e anu koeam mumai, iwa ne mu danam mumana menan. Ian ugupe ame anu waramasine nagirewa, go nop nega anune menan e uguya gangan naeta. Mosis ap anega sen.

²⁰Den apan Aisaya God oisewa kaimakaet anega wan, Nenan yop ya tane nagirewa ne tananegene. Nenan ya anu wane go inamup venat nigasen.

²¹Go Isurero nagirewa munan anega wan, Ne wam wam pot pot waupamot anuivin, go nop nega ya anune amba tandayasene taiwanum.