Kölfel 73:9-28

⁹Ra eäni kapasingau usun Kot lon läng o eäni fos sikesik ngeni chon fanüfan.

¹⁰Iei mine nöür kewe aramas ra kul ngeniir o müttir lükü ar kewe kapas meinisin.

¹¹Iwe, ra apasa, “Kot esap sile. Ewe mi Unusen Tekia esap wor an silelap.”

¹²Iei usun lapalapen ekewe aramasangau.

¹³Ellet a solap pwe üa tümwünü lelukei pwe epwe limöch, a solap ai üsap tipis.

¹⁴Iteiten rän üa küna riaföü, nge iteiten lesosor ka apwüngüei.

¹⁵Iwe, are üa pwal apasätä usun mine ir ra apasa, wewen nge üpwe afangamäi noum kewe aramas.

¹⁶Üa sotuni le ekieki usun ai üpwe weweiti ei, nge a kon weires ngeniei,

¹⁷tori üa tolong lon imwom imwenfel. Ikenan a fateitiei usun sopolan ekewe aramasangau.

¹⁸Ellet, ka anomuur won leni mi mitimit. Ka föri mine repwe turutiu ren lon feiengau.

¹⁹Ra rosola lon eu chök otun, ra moropöküla ren niuokus.

²⁰Ra usun chök eu tan mi morokaila, lupwen eman a pwök. Ai Samol, lupwen ka ütä, ra morokaila.

²¹Lupwen üa chou, lupwen lelukei a kinas,

²²üsap weweiti och, üa umwes o usun chök eman man me mwom.

²³Nge ngang üa chök nonom reöm fansoun meinisin, pun en ka amwöchü pöüifichi.

²⁴Ka emweniei fän om öüröür, nge mürin kopwe etiwaei lon ling.

²⁵Üsap eäni och me läng nge en chök. Üsap pwal pwapwaiti och mettoch me won fanüfan lükün en.

²⁶Inisi me lelukei ra tongeni apwangapwangala, nge Kot ai pöchökül pwal wisei tori feilfeilachök.

²⁷Nge chokewe mi likitukela repwe feiengau. Ka arosala chokewe resap allükülük ngonuk.

²⁸Nge me rei, a mürina pwe üpwe kan ngeni Kot. Üa filätä Kot ewe Samol mi Lapalap pwe epwe ai lenien op, pwe üpwe apworausa an kewe föför meinisin.