Miti Mânec 73:9-28

⁹Masu‐jeŋic bâfeŋnerâ sambâŋkopec dâŋ mupie feekac, erâ nameŋ‐jeŋiczi mâreŋko wiac fokac i kosa mu surec eeŋgopieŋ.

¹⁰Eme ŋic jaŋe ine mana‐jarepie sâckeekac, eme mumbiaŋ‐jopaeŋgopieŋ.

¹¹Ʒiŋuc mueŋgopieŋ: “Anutuzi wemocko manaocmu? Femicne sâko erao mamana fokac me?”

¹²Kec, manaŋgopieŋ, sindaŋŋic fuŋne‐jeŋic iŋuc fokac. Erâ wiac mocte mana mezac mi ehuc, moneŋ‐jeŋic basaweeŋgopieŋ.

¹³Jei, no maŋnane maŋgâŋ soŋaŋkepe ɋaɋacne fowec, â menane ʒure ɋaɋackepe wânâŋ mi bohotawec.

¹⁴Anutu, goki manahaŋtec ʒoaŋ ʒora ʒâic fua‐nare jujec, â hae fureme sâc kâcbiŋ kihuc jupo.

¹⁵No ʒiŋuc muzapo: “Dâŋ muŋgopieŋ ijaha mupe,” ine fuŋfuŋfâcge maŋzi behec‐jopazapo hâcne.

¹⁶Irec wiac i mana tarapemurâ mamanasu gie bapo; erâ manape quŋkeme emâmâŋkepo.

¹⁷Izi Anuture dâŋbiri soŋnere maŋnao raʒirâ, miŋecne ŋic sindaŋne jaŋere hata tofane hone tarapo.

¹⁸Jâmbomac, go mâreŋ sosowaricnao râec‐jopaekic, eme rândiŋkerâ jopahuc qanʒaŋ‐jopaekac.

¹⁹Jaŋe ɋeŋfâfâc jaha sipirickeeŋgopieŋ, bipic tara‐jareha omaeeŋgopieŋ.

²⁰Guŋ manaku mana ɋâɋârepene arictac eekac, iŋuc hâcne hawari‐jeŋicte ninikec fuaocmu.

²¹Mârâc maŋnanezi mana hâtâwepo, â bunane fârorockewec,

²²dameŋ ira mutuc matacne epo, maigao qowi maŋ tâmiric tinac epo.

²³Mâcne, no sifu goheckoaŋ juhuc jupemu; goki mefâre‐naneo basanaŋnukomec.

²⁴Go dâŋbirigere sâcko jowacnuekic, â ʒâhec eri tatamacko râecnuzokic.

²⁵Go mocsâkoa sambâŋko junareekic, â mâreŋko go basacguhuc wiac mocte mi enarekac.

²⁶Maŋ sahac jahec‐nane docke betaŋ ezo murâ enic: Anutu go ine maŋnanere wâtuŋ â boreŋ‐nane fofo sanaŋ.

²⁷Jâmbomac, go behecgurâ raniŋmu jaŋe omaeniŋmu; go eatuc egareniŋmu jaŋe bâsirowec‐jopacmu.

²⁸No ine Anutu gore maŋfuŋko jupe aŋacne ekac. No Wofuŋ Anutu gorao roweckekopac; go wiac eekic sasawa i muiŋ musawec epemu.