SALMOS 73:9-28

⁹Ẕnnégake' che da' ka' zej zoan ya'abá, na' ẕcháḻjgake' ka benne' ka' zej nape' dot yežlyó.

¹⁰Che ḻen yezika' benách ka' želyenle' x̱tíža'gake', na' ẕzi' ḻo ná'gake' da' ẕnnágake'.

¹¹Ẕnnagak benne' wnni'a ka': “¿Biẕkze nnezle Dios? ¿Ẕḻé'ekzle Bennen' zoe' ža'le da' žonžo?”

¹²Benne' ki zej nbej yíchjgake' Dios, na' zej zoe' binlo, na' ẕzí'gakže' yeḻa' wnni'a.

¹³Da' likze, dáche'ze goka' dot ḻi ḻaže', na' bi be bena' da' bi nak chawe',

¹⁴san tža tža wẕáka'ḻi'a, na' žsaka' zí'gake' neda' yógo'te ža.

¹⁵Chela' nnia' neda': wchaḻja' kan ẕchaḻjgak benne' ka', na' wka'na' bénne'do' chio' ka' ka'ze, Dios.

¹⁶Kate' blab ḻaža'a nich chejni'ila' da' ni, wžé' zédḻe'ela',

¹⁷san kate' wyoá'a ḻo latje la'y che Dios, na' gókbe'ela' da' gak chegak benne' ka' ga ze ḻawte.

¹⁸Da' likze beno' chegak benne' ka' chejchégwgake', na' gono' ga kwia yí'gakkze'.

¹⁹Ḻa' kwia yí'tegake'. Yeḻa' ẕžebe senen ḻégake', na' goten ḻégake'.

²⁰Zej nake' ka to da' bḻe'elto' to ḻo bichgale dan' ẕnniten kate' žebanžo. Ka'kze gaken, X̱anto' Dios. Kate' so žo'o, wka'no' ka'ze da' bḻoe'el kwingak benne' ka'.

²¹Kate' bge'ela' benne' ka', wžé' zédḻe'ele ḻáẕda'wa'.

²²Goka' ka to bia yix̱e' ḻawo' Le', dan' gok zide yichja', na' bi bejni'ila',

²³san wzóaḻenteza' Le', na' nóx̱wkzo' na'a ḻi ža.

²⁴Bsedlo' neda' nich gona' da' ẕḻoe'elo' neda', na' te na'a yezí' ḻo no'o neda' ḻo ya'abá chio'.

²⁵Bi zoa no benne' yoble chia' ya'abá san tozo' Le', na' bi be zoa da' ẕdan ḻaža'a yežlyó nga san tozo' Le'.

²⁶Žedó ḻaže' beḻa' žen chia', na' ḻáẕda'wa', san Dios nake' Benne' žon choche' neda', na' nake' yeḻa' ba nez ẕen chia' to chi'ize.

²⁷Benne' ka' žekwásgake' gan zo' nítgekle'. Wžía yi'o yógo'te benne' ka' kwej yíchjgake' Le'.

²⁸San neda', žak chawe' chia' dan' wbiga' ḻaw Dios. Wx̱én ḻáže'teza' X̱anžo Dios, na' wchaḻjkza' che da' ẕente da' bene' Ḻe'.