Kölfel 144:1-14

¹Echö än Tafit köl. Üpwe mwareiti ewe Samol mi Lapalap ai achau mi asipa pei ngeni maun, pwal kumuchi ngeni fiu.

²I ai Kot mi tongeei me imwei imwen maun, ai lenien op mi pöchökül me ai Chon Amanau, i a epeti seniei feiengau. Üa anomu ai apilükülük won ewe mi akufätiu chon ekewe mwü fai.

³Ai Samol mi Lapalap, met aüchean aramas pwe ka chüngüw, nge met aüchean nöün aramas pwe ka ekieki usun?

⁴Pun eman aramas a wewe ngeni enienin ngasangas, nge ränin manauan a usun chök och nür mi morokai.

⁵Ai Samol mi Lapalap, kopwe asanga om we läng o feitiu. Kopwe atapa ekewe chuk pwe repwe ötüöt.

⁶Kopwe efifi ekewe inefi o atoropasa chon oputom, kopwe esefichala om kewe föün esefich o tinifeiliir.

⁷Kopwe aitietiu poum seni pekitä, kopwe amanauaei seni ekewe koluk mi alolol o angasaei seni fän nemenien ekewe chon ekis,

⁸seni chokewe mi chök kapas chofana, ra mwo nge aitietä pöüifichir lon ar akapelmwäl.

⁹Ai Kot, üpwe eäni ngonuk echö köl mi fö, üpwe ettiki ngonuk kitar mi wor engol saitenin.

¹⁰En ka awinna ekewe king, ka amanaua Tafit noum we chon angang.

¹¹Kopwe amanauaei seni ekewe chon oputaei mi mochen afeiengauaei, kopwe angasaei seni fän nemenien ekewe chon ekis, seni chokewe mi chök kapas chofana, ra mwo nge aitietä pöüifichir lon ar akapelmwäl.

¹²Amwo nöüch kewe ät repwe wewe ngeni irä mi mär pöchökül lon ar alüal, nge nöüch kewe nengin repwe wewe ngeni üren lepwokuku mi rup pwe alingen lon imwen king.

¹³Amwo ach kewe lenien iseis repwe ur ren sokopaten föün irä, nge nöüch kewe sip repwe oupwätiu ngeröü me engol ngeröü sip lon ach kewe mälämäl.

¹⁴Amwo nöüch kewe pwiin kow repwe nöünöü chomong, nge esap mwet seniir nöür ika mä nöür. Amwo esap fis puchörün riaföü lon ach kewe al.