Salmos 144:1-14

¹David, we-namaked narmaksad. Bab-Jehová-nug odummolesun, an-akwasailaga guedid. Bila-onoged-idu, an-surgan-ogannogedid, urwed-idu, an-arganmar-ogannogedid.

²Bab-Jehová, an-sabguedid, an-edarbedid, bonigan-idu an-odukuedid, bonigangi an-ollor-imakedid, an-sigu-abgaedyob an egi dukuedid, an egi bensulid-nikadid, an-urbaligwa-nanaega dulamar-imakedid.

³Bab-Jehová, ¿wede, dule ibusunna, egi be binsanonigu? ¿Wede, dule ibusunna, be akwenonigu?

⁴Ar dule unnila gayagi buu-imaklegaledid. Ar e-ibagan unnila negsichigwad-ukiar-nasdaeyobid.

⁵Bab-Jehová, be-mogir be egae, be aidedage. Yalamar be ebuge, waa-obupurmake.

⁶Mala-ibyemakale be odege, dule-isdardakmalad be oaisakie, be-sigumala egi be mie, dule-isdarmalad-oduurmakega be imake.

⁷Nibneg-akale, be-gangued be anse oyoge, dii-wiladgine be an-onoge, dule-isganamargi be an-ollor-imake.

⁸Ar sunmakdemalale, gakansaddamalad, argan-onakwidmalale, nabiridyob ibmar-ise-sogar imakdamalad.

⁹Bab-Dummad, na begala namaked-gwapidgi an namakoed. Gar-arpa-dub-giambe-nikadba (10) an bega namakoed.

¹⁰Bila-onolegedgi be reymar-onakwemaidid. Be-mai-David-melle-es-suidgi-burgwega be imakedid.

¹¹Be an-bendake, dule-isganamargi be an-ollorsae. Ar sunmakdemalale, gakansaddamalad, argan-onakwidmalale, nabiridyob ibmar-ise-sogar imakdamalad.

¹²Anmar-mimmigan, e-dungumaidba sapimar-binnasuli-dungumaiyob be imako. Anmar-bunamala, reyneg-e-buarmar-sobarmaladyob, yeerdaklege be imako.

¹³Anmar-ibmar-gwag-sabomaladgi bukidar masmar-akar-akar ena-ena bukuega be imake. Anmar-sibad-wawaadmar, mili-miliba-omelomai (1,000-1,000) be imake. Anmar-nainugi, mili-miliba-bukuega be imake.

¹⁴Anmar-moli-bebe-nikad-omegan, obargudiguega be imake. Mileged-ibagan-iduar, melle milegega be imako. Melle anmar-neg-imbabali, bar dule, suli-suli-itogedba-gordiguega be imako.