SAAMUNƆ 144:1-14

¹Dauda lɛ̀. Aubarikadeen Dii ma gbɛ̀si ũ, è zĩ̀kana dadamɛ, è ma ↄↄ tòto kɛ zĩ̀kana yãnzi.

²Àmbe ma utɛkii ũ, è gbɛ̃kɛɛ kɛmɛ, à dɛ ma zɛki gbãaa ũ, è ma mì sí. À dɛ ma sɛngbango ũ kɛ̀ mɛɛ̀ nazi, è tó boriinↄ mì siɛmɛ.

³Dii, bↄ́n gbɛ̃ntee ũ kɛ̀ à yã ègↄ̃ dↄnguu? Bↄ́n à ũ kɛ̀ nɛɛ̀ làakari dↄa?

⁴Gbɛ̃ntee dɛ lán kàsa kpíi bàmɛ, à wɛ̃̀ndi è gɛ̃tɛ lán ↄra bà.

⁵Dii, ǹ musu naɛ ǹ pita, ǹ ↄ kɛ kpiiinↄa lɛ aↄ̃ tɛ́sukpɛ bↄ.

⁶Ǹ tó lou pí ǹ gbɛ̃nↄ fãakↄ̃a, ǹ kà fã ń tɛ́ aↄ̃ lɛkↄ̃a.

⁷Ǹ ↄ bↄ zaa musu ǹ ma kũ, ǹ ma bↄ í bíta guu, ǹ ma sí bori zĩ̀tↄnↄa.

⁸Ɛgɛtona ń lɛ́ pà, aↄ̃è ↄ pãɛ kↄ̃n lùsɛna pãao.

⁹Luda, mɛ́ lɛ̀ dufu sínnɛ, mɛ́ n táaki lɛ́ kↄ̃n mↄrↄ bà mɛ̀n kurideeo,

¹⁰mmↄn kɛ̀ nɛɛ̀ tó kínanↄ zĩ̀ ble, nɛɛ̀ n zↄ̀bleri Dauda bↄ fɛ̃ɛda pãsĩ lɛ́zĩ.

¹¹Ǹ ma sí ǹ ma bↄ bori zĩ̀tↄnↄ ↄzĩ, ɛgɛtona ń lɛ́ pà, aↄ̃è ↄ pãɛ kↄ̃n lùsɛna pãao.

¹²Wa nɛ́gↄ̃gbɛ̃nↄ é fɛɛ ń gↄ̃kparɛkɛgurↄ lán lí kɛ̀ nnaa mà bà, wa nɛ́nↄgbɛ̃nↄ gↄ̃ dɛ lán kíbɛ wesagba kɛ̀ wà zãa blèa bà.

¹³Wa dↄ̃̀nↄ é pa kↄ̃n pↄ́ bori sãnda píngio. Wa sãanↄ é kↄ̃ lɛo wàa do, aↄ̃é ká bↄrↄ ũgbangba wa kpàsan.

¹⁴Wa zùnↄ égↄ̃ dɛ nɛ́dandeenↄ ũ, nↄ̀bↄɛna égↄ̃ kuuro, lagona égↄ̃ kuuro, wɛ̃nda'ↄ́ↄdↄna égↄ̃ kú gãalɛro.