ZABURA 144:1-14

¹Dauda lɛ̀ɛ. Arubarikademɛ Dikiri ma gbɛ̀si ũ, àdi zĩ̀kana dadamɛnɛ, àdi ma ↄ tùtu kɛ zĩ̀kana yãi.

²Àkũmɛ ma utɛki ũ, àdi gbɛ̃kɛ kɛmɛnɛ, à de ma zɛki gbãna ũ, àdi ma sura ba. À de ma sɛ̃ngbako ũ kũ madì nai, àdi tó burinↄ mì natɛmɛnɛ.

³Dikiri, bↄ́n bisãsiri ũ kũ a yã dìgↄ̃ dↄnguu? Bↄ́n a ũ kũ ndì laakari dↄaa?

⁴Bisãsiri de lán kàsa plí bàmɛ, a wɛ̃̀ndii dì gɛ̃tɛ lán uraa bà.

⁵Dikiri, ǹ musu natɛ ǹ kipa, ǹ ↄ na kpinↄa de ò túsukpɛ bo.

⁶Ǹ tó legũ pí ǹ gbɛ̃nↄ fãkↄ̃a, ǹ kà fã ń tɛ́ ò lɛkↄ̃a.

⁷Ǹ ↄ bo zaa musu ǹ ma kũ, ǹ ma bo í zↄ̃kↄ̃ↄ gũn, ǹ ma sí buri zĩ̀tↄnↄa.

⁸Ɛ́kɛtona ń lɛ́ pà, òdi ↄ pãtɛ kũ lɛ́pãgbɛ̃naao.

⁹Luda, mani lɛ̀ dufu sínnɛ, mani n táaki lɛ́ kũ mↄrↄ bà mɛ̀n kurideo,

¹⁰mↄkↄ̃n kũ ndì tó kínanↄ zĩ̀ ble, ndì n zↄ̀bleri Dauda bo fɛ̃nɛda pãsĩ lɛ́i.

¹¹Ǹ ma sí ǹ ma bo buri zĩ̀tↄnↄ ↄĩ, ɛ́kɛtona ń lɛ́ pà, òdi ↄ pãtɛ kũ lɛ́pãgbɛ̃naao.

¹²Ó nɛ́gↄ̃gbɛ̃nↄ ni futɛ ń kɛfɛnnakɛgↄrↄa lán lí kũ à nna màa bà, ó nɛ́nↄgbɛ̃nↄ gↄ̃ de lán kínabɛ gbɛ̀gba kũ ò zã blèaa bà.

¹³Ó dↄ̃̀nↄ ni pa kũ pↄ́ buri sĩnda pínkio. Ó sãnↄ ni kↄ̃ lɛu wàa do, oni ká ũgbangba ó kpàsan.

¹⁴Ó zùnↄ nigↄ̃ de nɛ́randenↄ ũ, nↄ̀bↄtɛna nigↄ̃ kunlo, lagona nigↄ̃ kunlo, wɛ̃nda'ↄ́ↄdↄna nigↄ̃ kú gãnulɛaro.