Miti Mânec 144:1-14

¹Wofuŋ qânâ sanaŋ‐nane e muteŋkezo; e menane juju giere baafeckewec, â memotec‐nane ʒika qazucnewec.

²E tâpiri‐nane â huec‐nane, e hae sanaŋ‐nane â babafic‐nane, maro‐nane â rorowec‐nane; e ŋicne ŋicne rurumaŋ‐naneo râec‐jopawec.

³O Wofuŋ, go ŋic e wemo macticnere manasucnehuc, hone maiŋ ecneekic?

⁴Ŋic e nokafe iŋucne sawa mac, â juju dameŋ‐ticnezi nâkumuc fotâcneekac irec sâc.

⁵Wofuŋ, go sambâŋ bârâriehuc tara wahac; tiki bâuac‐jopatec hosâc qaniŋ.

⁶Râsifâcge bâbâric wicke‐jarehuc bâtâtiec‐jopac, tepe motecge qâtâcne‐jaretec siŋsaŋ qaniŋ.

⁷Faicnec mege sicnerâ ro baefucnuc, rumi sâkoonec fâre surucnuc, ŋic jabane jaŋere meonec bataracnuc.

⁸Jaŋe micbipic‐jeŋiczi gibioc dâŋ mueŋgopieŋ, â mefâre‐jeŋiczi eeatuc gie baeŋgopieŋ.

⁹O Anutu, no gae ɋâricne moc hefua‐garepe, gita mucne teŋ izi musi bagarepe.

¹⁰Goki ŋicwofuŋ ʒikao sasanaŋ tahac‐jopaekic, go kiŋaŋŋicge Dawidi ʒikao ŋezickeekic.

¹¹Go hâmoc bâbâfua ʒika irec ŋezicnuzemec, â ŋic jabane jaŋere meonec bataracnuzemec; jaŋe micbipic‐jeŋiczi gibioc dâŋ mueŋgopieŋ, â mefâre‐jeŋiczi eeatuc gie baeŋgopieŋ.

¹²Ŋokâfâc‐nâŋec jaŋe socɋâri juhuc ʒareŋsuc iŋucne soka fienʒepieŋ, â otâfâc‐nâŋec jaŋe erific tuturuŋnao metâ qâreŋ heeŋgopieŋ, iŋucne fuanʒepieŋ.

¹³Rowaŋfic‐nâŋecko nânâ mâriri fusucmame dameŋne dameŋne nâhuc junʒepeneŋ. Lamafâc‐nâŋec jaŋe sawe mâririackerâ, tauseŋ â teŋ tauseŋ fuanʒepieŋ.

¹⁴Bulimakaofâc‐nâŋec jaŋe kiwechec erâ, motec sahac furu biaŋne rohuc junʒepieŋ; hae ʒoŋa‐nâŋecko ki uu moc mi fuazejec.