Josue 10:11-28

¹¹Amorreorã Bet-horoʌ̃neba ed̶aa Azecád̶aa mĩrũ wãbʌdad̶e Ãcõrẽba hielo waib̶ʌada cue quĩrãca ãdjirã ʌ̃rʌ̃ jurrubisia. Israelerãba necoba quenaped̶ad̶a cãyãbara maʌ̃gʌba zocãrãara quenasia.

¹²Ãcõrẽba israelerãa amorreorã poyabid̶a ewarid̶e Josueba israelerã quĩrãpita nãwã jĩgua jarasia: Ãcõrẽ, ʌ̃mãdaura Gabaoʌ̃ ẽjũãne ipi cob̶ʌdua; jed̶eco sid̶a Ajaloʌ̃ jewed̶ad̶e ipi cob̶ʌdua.

¹³Ara maʌ̃da ʌ̃mãdaura, jed̶eco sid̶a ipi copanesid̶aa ab̶a israelerãba ãdjirã dji quĩrũ jũma quenabʌdad̶aa. Maʌ̃gʌra Jaserba idji cartad̶e jũma b̶ʌsia. Josueba mãwã jarabʌrʌd̶e ʌ̃mãdaura umatipa cob̶ʌda berara ewari ab̶a b̶aeẽ́ b̶asia.

¹⁴Josueba Ãcõrẽa iwid̶id̶ara ne ununaca droma basía. Maʌ̃ naẽna ẽberãba ne ununaca droma iwid̶id̶ara Ãcõrẽba ĩjã oca basía. Idjab̶a maʌ̃ ewarid̶eba ʌ̃taa ĩjã oẽ́ b̶ʌa. Baribʌrʌ maʌ̃ ewarid̶e Ãcõrẽba ĩjã osia israelerãare djõ b̶ʌ bẽrã.

¹⁵Mãwãnacarea Josuera israelerã sid̶a wayacusa Gilgald̶aa ãdji cãĩbadamaa wãsid̶aa.

¹⁶Maʌ̃misa amorreo bororã juesuma panʌra Maquedá puru caita uriad̶e mĩrũsid̶aa.

¹⁷Baribʌrʌ mama mĩrũ panʌda ununaped̶a ʌ̃cʌrʌba Josuéa jarad̶e wãsid̶aa.

¹⁸Maʌ̃ne Josueba idji sordaorãa nãwã jarasia: –Mõgara waib̶ʌada bʌrab̶ari eded̶aped̶a uriara jũãtrʌ nũmʌnadua. Maʌ̃be ʌ̃cʌrʌba mama jʌ̃ã panenadua ãdjirã ẽdrʌrãnamãrẽã.

¹⁹Waabemarãba dji quĩrũra ẽpẽnaped̶a jẽdaareba quena wãnadua ãdji purud̶e jũẽrãnamãrẽã. Dadji Ãcõrẽba bãrãa ãdjirãra jũma poyabibʌrʌa.–

²⁰Mãwã Josueba israelerã ume amorreorãra berara jũma quenasid̶aa. Zocãrãẽ́be ãdji puru mõgaraba jũrã ca b̶ead̶e jũẽnaped̶a mĩrũ panesid̶aa.

²¹Maʌ̃ne israelerã ni ab̶aʌda beud̶aẽ́ basía. Jũmaena bia jẽda zesid̶aa Maquedá purud̶aa Josue b̶ʌmaa. Maʌ̃ bẽrã jũmarãba wayasid̶aa israelerã biẽ́ od̶i carea.

²²Maʌ̃ne Josueba idji sordaorãa jarasia: –Isabe mõgara uria jũãtrʌ b̶ʌra ãyã b̶ʌd̶adua. Maʌ̃be dji bororã juesuma panʌra dajadaa mʌ̃maa enenadua.–

²³Ara maʌ̃da dji bororã juesuma panʌra dajadaa enesid̶aa: Jerusaleʌ̃nebema boro, Hebroʌ̃nebema boro, Jarmud̶ebema boro, Laquid̶ebema boro, Egloʌ̃nebema boro sid̶a.

²⁴Maʌ̃ bororã Josuemaa enenapeda Josueba idji sordaorãra jũma trʌ̃ped̶a sordaorã bororã idji ume panʌ́a nãwã jarasia: –Nama zed̶aped̶a jĩrũba ãdji ochirud̶e tʌga eronũpananadua.– Ara maʌ̃da zed̶aped̶a ochirud̶e tʌga eronũpanesid̶aa.

²⁵Maʌ̃ne Josueba israelerãa jarasia: –Za dadjirãba obʌda quĩrãca Ãcõrẽba jũma dadjirã dji quĩrũ sid̶a oya. Ne wayarãnadua. Ni maãrĩ bid̶a jẽda crĩcharãnadua. Ʌb̶ʌa b̶ead̶aped̶a sozarra b̶ead̶adua.–

²⁶Mãwã jaraped̶a Josueba dji bororã juesuma panʌra beasia. Beaped̶a ãdjira bacuru cũmiane su jira b̶ʌcuabisia. Mãwã jira panesid̶aa ab̶a queubʌrʌd̶aa.

²⁷Queubod̶od̶e Josueba ãdjira ed̶aa edabiped̶a ãdji mĩrũ panana uriad̶e b̶atacuabisia. Maʌ̃be mõgara waib̶ʌa b̶eaba dji uriara jũãtrʌ nũmʌsid̶aa. Maʌ̃ mõgarara wad̶ibid̶a mama b̶eaa.

²⁸Maʌ̃ ewarid̶e Josueba idji sordaorã ume Maquedá purura poyad̶aped̶a jũma babuesid̶aa. Mamabemarãda necoba jũma quenasid̶aa. Ni ab̶aʌda zocai b̶ʌd̶aẽ́ basía. Josueba Maquedád̶ebema borora beasia Jericod̶ebema boro bead̶a quĩrãca.