JAN 1:15-45

¹⁵O Jan svedčinel pal leste a vičinel: “Kada hin oda, pal kaste phenďom, ‘Oda, ko avel pal mande, sas angle ma, bo sas sigeder sar me.’ ”

¹⁶Hin les pherdo lačhipen (milosť) a amen savore priiľam olestar jekh požehnaňje pal aver.

¹⁷Bo prekal o Mojžiš sas dino o Zakonos, ale o lačhipen (milosť) the o čačipen avľa prekal o Ježiš Kristus.

¹⁸Le Devles šoha (ňikda) ňiko na dikhľa, ale o jekhoro Čhavo, savo hino pašes paš o Dad, amenge les sikaďa.

¹⁹Kada hin oda, so svedčinel o Jan, sar ke leste o Židi bičhade andral o Jeruzalem le rašajen the le Leviten, hoj te phučen: “Ko tu sal?”

²⁰Na garuďa andre a phenďa avri: “Me na som o Kristus.”

²¹A phučle lestar: “Ko akor sal? Či sal tu o Eliaš?” Ov phenďa: “Na som.” “Abo sal oda prorokos?” Odphenďa: “Na.”

²²Androda leske phende: “Akor, ko sal? Hoj te džanas te odphenel olenge, save amen bičhade. So pal tute phenes?”

²³Phenďa oda, so pisinďa o prorokos Izaiaš: “Me som o hangos, so vičinel pre pušťa: ‘Rovňaren avri o drom le Rajeskero!’ ”

²⁴Maškar o manuša, save sas pal leste bičhade, sas the Farizeja.

²⁵On lestar phučle: “Soske akor boles, te na sal tu o Kristus aňi o Eliaš aňi oda prorokos?”

²⁶O Jan lenge odphenďa: “Me bolav le paňeha, ale maškar tumende ačhel oda, kas tumen na prindžaren.

²⁷Ov hin oda, ko avel pal mande, ale me na som hodno leske te rozphandel o sirimocis pro sandalki.”

²⁸Oda pes ačhiľa andre Betanija pal o Jordan, kaj o Jan bolelas.

²⁹Pre aver džives dikhľa o Jan le Ježiš, hoj avel ke leste, a phenďa: “Dikh, o Bakroro le Devleskero, savo odlel o binos le svetostar!

³⁰Kada hin oda, pal kaste me phenďom: ‘Pal mande avel murš, savo hin angle ma, bo sas sigeder sar me.’

³¹Aňi me les na prindžaravas, ale vašoda avľom a bolavas le paňeha, hoj les o Izrael te sprindžarel.”

³²O Jan svedčinelas: “Dikhľom le Duchos te avel sar holubica tele andral o ňebos a ačhiľa pre leste.

³³Aňi me les na prindžaravas, ale oda, ko man bičhaďa te bolel le paňeha, mange phenďa: ‘Pre kaste dikheha te avel tele le Duchos a hoj ačhel pre leste, oda hin ov, savo bolel le Sentne Duchoha.’

³⁴Me dikhľom a svedčinav, hoj kada hino o Čhavo le Devleskero.”

³⁵Pre aver džives ode pale ačhelas o Jan the duj leskere učeňika

³⁶a dikhľa le Ježiš, sar odarik pašal predžal, a phenďa: “Dikhen, o Bakroro le Devleskero!”

³⁷Ola duj učeňika šunde, so phenďa, a gele pal o Ježiš.

³⁸O Ježiš visaľiľa a dikhľa, hoj džan pal leste, a phenďa lenge: “So roden?” On leske odphende: “Rabbi (so hin prethodo: Učiťeľina), kaj bešes?”

³⁹Ov lenge phenďa: “Aven a dikhen!” Avke gele a dikhle, kaj bešel, a ačhile oda džives ke leste. Sas vaj štar ori pal o dilos.

⁴⁰Jekh ole dujendar, save oda šunde le Janostar a gele pal o Ježiš, sas o Andrej. Leskero phral sas o Šimon Peter.

⁴¹Ov ešeb (peršo) arakhľa le Šimon a phenďa leske: “Arakhľam le Mesijašis,” so hin prethodo: Le Kristus.

⁴²A anďa les ko Ježiš. O Ježiš dikhľa pre leste a phenďa: “Tu sal o Šimon, o čhavo le Jonašiskero. Tu pes vičineha Kefas,” so hin prethodo: “Peter.”

⁴³Pre aver džives o Ježiš kamľa te džal andre Galileja. Arakhľa le Filip a phenďa leske: “Av pal ma!”

⁴⁴O Filip sas andral e Betsaida, o foros le Andrejiskero the le Peteriskero.

⁴⁵A o Filip arakhľa le Natanael a phenďa leske: “Arakhľam oles, pal kaste hin pisimen andro Mojžišoskero Zakonos the andro Proroka, le Ježiš, le Jozefoskere čhas andral o Nazaret.”