Ioanes 1:15-45

¹⁵Ioanes me kadede i ngil laudeda indada: Iei i, me i padaki wei: Me pan kotido mur i, iei me mier mo i, pwe a kotikotier mo i.

¹⁶Pwe kitail karos ale sang nan audepa a mak sapan potopot.

¹⁷Pwe kapung me kokido sang Moses, a mak o melel sang Iesus Kristus.

¹⁸Sota me kilanger Kot kokodo, Ol ieros ta, me kin kotikot pan kupur en Sam o, i me kotin kasaledar i.

¹⁹A met en Ioanes a kadede, ni men Sus kadarala sang Ierusalem samero o lepit oko, pwen idok re a: Is koe?

²⁰I ari kotin kadede; a sota likam; a kotin kadede: Kaidin Kristus ngai.

²¹Irail idok re a: A is? Elias komui? A masani: Kaidin ngai i. Komui saukop o? A sapeng: Kaidin.

²²Irail ap indang i: A is komui? Pwe sen sapeng irail me kadar kit dor. Da me komui kadedeki pein komui?

²³A masani: Ngai ngil eu, me likelikwir sili nan sap tan: Kaineneda al en Kaun o, duen saukop Iesaia masanier!

²⁴A irail pakadaradoer sang ren Parisär akan.

²⁵Irail ap idok re a indada: Da me komui wia paptaisiki, ma komui kaidin Kristus, o kaidin Elias, o pil kaidin saukop o?

²⁶Ioanes sapeng irail masani: Ngai me paptaisiki pil, a amen kin kotikot nan pung omail, me komail sasa.

²⁷Iei i me kotido mur i, me ngai sowar ong, en lapwada sal en sapwilim a sut.

²⁸Mepukat wiauier Petapara palilan Iordan, wasa Ioanes kin wia paptais ia.

²⁹Mandan ran o a masani Iesus a koti dong i ap masani: Kilang Sippul en Kot, me kin wawei dip en sappa!

³⁰Iei i, me i padaki wei: Ol amen pan kotido mur i iei, me mier mo i, pwe a kotikotier mo i.

³¹A ngai so asa i, a pwe i en sansal dong Israel, iei me i kokido paptaisiki pil.

³²A Ioanes kadede masani: I kilanger Ngen o kotidido sang nanlang ni mom en muroi kotikot re a.

³³A ngai so asa i, a me porone ia don wia paptaisiki pil, iei me kotin masani ong ia: Me koe pan kilang. Ngen piridi sok poa, o kotikoteta re a, iei i, me kin wia paptaisiki Ngen saraui.

³⁴A i kilangadar ap kadedeki, me iei Sapwilim en Kot.

³⁵Mandan ran o Ioanes pil kotida wasa o, o na tounpadak riamen iang i.

³⁶A ni a udial Iesus kotikot kokodo, ap masani: Kilang Sippul en Kot!

³⁷A tounpadak riamen rongadar a masan, ap idauen wei Iesus.

³⁸Iesus ap kotin saupeido masani ara idedauen, ap kotin masani ong ira: Da me koma rapaki? Ira potoan ong: Rapi (iet wewe: Saunpadak), ia wasa re kin kotikot ia?

³⁹A kotin masani ong ira: Kodo kilang! Ira ap poto dong kilanger wasa, me a kotikot ia, ap mimieta re a ni ran o. Mepukat wiauier impan auer kaeisok.

⁴⁰Andreas, ri en Simon Petrus amen re ra, me rongadar sang ren Ioanes ap idedauen i.

⁴¹I me diaradar mas udan ri a Simon, indai ong i: Se diaradar Mesias (iet wewe: Kristus).

⁴²I ap kalualang i ren Iesus. A Iesus lao masani i, ap masani: Simon, koe nain Iona, koe nok adaneki Kepas (iet wewe: Paip).

⁴³Mandan ran o a pan kotilang Kaliläa, Iesus ap kotin diaradar Pilipus, masani ong i: Idauen ia do!

⁴⁴Pilipus men Petsaida, kanim en Andreas o Petrus.

⁴⁵Pilipus diaradar Natanael, ap indang i: Se diaradar i, duen me Moses intingiedier nan puk en kapung o saukop akan: Iesus men Nasaret, sapwilim en Iosep.