Ioanes 1:15-45

¹⁵Eala e Ioanes valolo boboboe ovola mago “Male, la tahalo ale pala eau veia mutou tetala maie ‘La tahalo ale ge mulimuli taku, eia uru tamilua, la vuhula eia mahuli palati, eau souka sibitala.’”

¹⁶Oio tetala etato tomi sau tolati la vibalavala te La Uru. La gilogo ale, eia la gilogo ale kara polo sesele te la gilogo ale pala.

¹⁷La vuhula maie: E Moses eia la vuhu la vikarara la viputumulila, eala moli e Iesus Kraist eia la vuhu la gilogo me la vikarara la seselela.

¹⁸Eala moli la tahalo isa souka hilo gologolo La Tahalo Uru, ouka sesele. E Latula sekela moli ale vipou tomi le Tamala, eia veipala tigi seselea gatou La Tahalo Uru veia etato ge rovia.

¹⁹Tio, la haro isasa, egiteu la mulugaluga tegite Iuda baha taro isahari tegiteu e pris vikapopo me la karakara te Levi isahari loio e Ierusalem veia egite ge tahi tigi e Ioanes mago “Eme ere tahalo sesele?”

²⁰Goio, e Ioanes kama hare robo, eia sile pala seselea giteu maie “Eau kama e Kraist ale La Uru bahea.”

²¹Goma, egite tahi vulo loua mago “Me eme ere sesele? Soioge eme e Lias, ia?” E Ioanes vei mago “Ouka.”

²²Tio, egite veiala mago “Me eme ere sesele? La vuhula amite goio ge vei tigia giteu ale bahati amiteu somaie. Eme ge veia miteu mave taume?”

²³Goma, e Ioanes vei mulia giteu te la merera te Aisaia, la bilalaha ale pala, mago “Eau la golu la tahalo isasa eia tatola loio te la hohoi mago ‘Ili paa la gauru te La Uru.’”

²⁴Goio, egiteu e pariseo isahari ale egiteu la mulugaluga baha egiteu soio te Ioanes,

²⁵egite goio tahia mago “Mai eme kama e Kraist, me eme kama e Lias, me eme kama la bilalaha te La Uru ale amite pou taitalia, ilava eme vuvuhi la valalua, e?”

²⁶Tio, e Ioanes goio vei matagaga seselea giteu mago “Ale eau vuvuhi moli le amutou la lalu, eala moli isasa oio kabili tamutou la valalua, amuto kama rovia,

²⁷eia ge mulimuli taku, me eau kama koramulia ge tuga hagagavi soio la balila.”

²⁸La vikararala tomi aleie, egite veveia oio la mautu e Betani, te la hararele Iordan loio. Te la baa ale, e Ioanes eia vuvuhi la valalua ovolao.

²⁹Goio, mai galigeli maie, e Ioanes hilo e Iesus tatuga somai tetala, eia turitia giteu ele mago “Malele, amuto ge hilo e Latu La Sip te La Tahalo Uru, ale ge abi taro la iruru tomi te la valalua me hatavivile te la maututula tomi.

³⁰Eia moli ale eau vei matagagea mutou tetala mago ‘Isasa ge mulimuli taku, eia uru tamilua, la vuhula eia mahuli pala taku.’

³¹Eau vuvuhi moli le amutou la lalu, veia eau ge vei matagagea mutou e Iuda tetala. Kara igoie, eau kama rovi la tahalo alele, tio eau hilotiae.”

³²Tio, e Ioanes eia vei matagagea giteu maie mago “Eau hilo sesele La Kalulu La Marokala eia sivo loata te la mori mai la malu la uku, eia goio pou tetala.

³³Sesele, eau pala kama rovia, eala moli La Tahalo Uru ale baha eau, eia veiagu mago ‘Mai eme ge hilo La Kalulu La Marokala eia ge lovo sotalo, eia ge toa tetalao, eiala moli ele, eia ge vuhi le amutou La Kalulu La Marokala.’

³⁴Ale eau hilotia, me eau valoloti leia veia eia e Latu La Tahalo Uru.”

³⁵Goio, mai galigeli lou, egite me la valalua la vimari te Ioanes ilua magirigiri,

³⁶e Ioanes hilo lou e Iesus loio tatuga, eia vei lou mago “Male go, amula ge hilo e Latu La Sip te La Tahalo Uru!”

³⁷Tio, egira la tahalo la vimari tetala lolo la vikararala ale eia veitia mai ele, egira goio tilimuli moliti e Iesus ele.

³⁸Goio, e Iesus ga vulo gele, eia hilo egirua mulimuli tetala, eia tahiti egirua mago “Amula paa mulimuli la rova?” Egira koliala mago “Rabai.” (La masova la isa ale Rabai, eia mai Tahalo La Vimari.) Mago “La luma taume oiove?”

³⁹Tio, e Iesus veia girua mago “Amula gomai ge hiloa.” Tiele egira tilimulitia soio te la luma ale eia popou ovolao, egira pou muga ovolale, la vuhula la paga maulaviti mai la mata la haro ivaati.

⁴⁰Oilo tegirua ale taho lua egira lolo la vikararala te Ioanes me egira tilimuli e Iesus, isa tegira la isala e Andrew, eia e tabarale Saimon Pita.

⁴¹Tio e Andrew hari, eia goio paa muli muga e tabarala e Saimon, eia goio veiala mago “Amite hiloti e Mesaia.” (La masova la isa ale mai e Kraist.)

⁴²Goio, e Andrew pulia soio te Iesus. Ale e Iesus hilo molia mai ele, eia varutu moliala mago “Emei, eme Saimon, e latule Ioanes, eau ge toi lou lemei e Kepas.” (Me te la merera e Grik, la isa ale e Kepas, eia mai “e Pita” me la masovala eia maie “Eme vagari mai la uati”.)

⁴³Goio, mai galigeli, e Iesus masagea ge goio e Galilea, eia mata vuti e Pilip, eia tolatiao mago “Eme ge tilimuliau.”

⁴⁴E Pilip, eia la tahalo ale loio e Betsaida, te la mautu te Andrew me tabarala e Pita.

⁴⁵Tio e Pilip goio hilo vuti e Nataniel, eia varutu moliala mago “Amite hiloti la tahalo ale e Moses kekesiti leia oilo te La Buk Tabu Ale Pala, mai tai la kekesi tegiteu la bilalaha ale pala vikara ovola. La isala e Iesus, eia la tau Nasaret, eia e latule Iosep.”