Jon 1:15-45

¹⁵Jonöŋ azi miaŋgö könaŋi naŋgöba kewö qeta jiba malök, “Nöŋön kungöra keu jiba malali, yaŋön mönö mia akza. Kewö jiba malal: Nöŋgö andöne azi kun kamawi, nöŋön qahö asuhubiga yaŋön mutuk malök. Miaŋgöra yaŋgö qetbuŋaŋan mönö ni noŋgita öŋgöŋgöŋi akza.” Jon O-melun azinöŋ mewö jiba malök.

¹⁶Kalem möriamŋan azi miaŋgö uruŋi kokolak qeiga aködamunŋambuk malöhi, yaŋön mönö miaŋgö dop kötuetköm neŋgiba malök. Kötumötuetŋi mi nalöŋi nalöŋi mokoiga körek neŋgö qaknine öŋgöi malin.

¹⁷Mosesnöŋ Köna keunini nam köli asuhuyökmö, Jisös Kraistnöŋ keu ölŋi indel teköba Anutugö kalem möriamŋi nam köli aukŋe asuhuyök.

¹⁸Gölme azi kunŋan Anutu nalö kunöŋ qahö ehök. Nahönŋi mohok-kunŋan Iwigö wösöŋe mala kota malöhi, yaŋön mönö gölmenöŋ eta könaŋi indel neŋgii mörin. Mewö.

¹⁹Juda jitŋememe yeŋön jike nup galöm aka jöwöwöl jikegö welenqeqe tosatŋi Jerusalem sitinöhök melaim eŋgigetka Jongöreŋ kaget. Kaba qesim waŋgiba jiget, “Gi wani azia akzan? Könaŋamgi denöwö?” Mewö jigetka könaŋamŋi indela jii mötket.

²⁰Könaŋamŋi qahö qaŋ kölökmö, aukŋe kewö jim miwikŋaiyök, “Nöŋön Amötqeqe Toŋi Kraist qahö akzal.”

²¹Mewö jiiga kapaŋ köla qesim waŋgiget, “Gi mönö azi niŋia akzan? Gi Elaija (Elia) akzan me qahö?” Qesim waŋgigetka “Qahö!” jiyök. “Gi kezapqetok azi kun akzan me qahö?” Mewö qesigetka “Mewö qahö!” meleŋnök.

²²Meleŋniga qesiget, “Gi niŋia akzan? Melaim neŋgigetka kazini, yeŋgöra mönö denöwö meleŋda jiin mötme? Gi nangi könagi denöwö jim asariman?”

²³Qesigetka kewö jii mötket, “Kezapqetok azi Aisaianöŋ keu kun kewö jii ahöza, ‘Ni garata aka gölme qararaŋkölkölŋe mala kewö qerakzal: Kembunöŋ kamawo! Miaŋgöra iŋini mönö uruŋini mindiŋgöba könaŋi mesata möhamgöget.’ Ni miaŋgö kolek garataŋi akzal.”

²⁴Azi melaim eŋgigetka Jongöreŋ kageri, mi Farisi (Köna keugö kapaŋkölköl) azia aket.

²⁵Yeŋön kunbuk kewö jiba qesim waŋgiget, “Gi Amötqeqe Toŋi Kraist qahö akzan aka Elaija (Elia) me kezapqetok azi yeŋgöreŋök kun qahö akzani, miaŋgöra mönö wuanöŋgöra ambazip o melun mem eŋgimakzan?”

²⁶Qesim waŋgigetka kewö meleŋ eŋgiyök, “Nöŋön o töhönöŋ eŋgömirimakzalmö, azi kun iŋini qahö möt kutuzei, yaŋön lök sutŋine kinja.

²⁷Azi kun nöŋgö andöne kamapköra jiba malali, yaŋön mönö mi. Yaŋön kaiga ketaŋamni aka malma. Miaŋgöra nöŋön yaŋgö kösutŋe anda wayangösöŋi teŋgöba köna esuŋaŋgö kösöŋi pösatmamgö qötötaŋgömam.”

²⁸Jonöŋ Jordan o likepŋe miri qetŋi Betani miaŋgöreŋ mala ambazip o melun mem eŋgiba malök. Yuai mi mönö miaŋgöreŋ asuhuyök. Mewö.

²⁹Mi asuhuiga miri giaŋiiga Jonöŋ Jisös tikep kaiga eka jiyök, “Eket, azi mi Anutugöreŋ lama moröŋi. Yaŋön mönö gölmeŋi gölmeŋi neŋgö siŋgisöndoknini köl könjörari solanibin.

³⁰Nöŋön kungöra keu jiba malali, yaŋön mönö mia akza. Kewö jiba malal: Nöŋgö andöne azi kun kamawi, nöŋön qahö asuhubiga yaŋön lök mutuhök malök. Miaŋgöra yaŋgö qetbuŋaŋan mönö ni noŋgita öŋgöŋgöŋi akza.

³¹Nöŋön i mutuk qahö möt kutuyalmö, Anutunöŋ könaŋamŋi Israel ambazip neŋgöra indeli mötpingöra mötza. Mi möta ni melaim niŋgiiga kaba o melun mem eŋgimakzal.”

³²Jonöŋ mewö jiba dangunu ewö kinda naŋgöba kewö jiyök, “Uŋa Töröŋan mönö Suepnöhök eta kembö nei ewö yaŋgö nöröpŋe eta köla tari ehal.

³³Nöŋön i mutuk qahö möt kutuba malalmö, kunöŋ ambazip o melun mem eŋgimamgöra melaim niŋgiyöhi, yaŋön kewö jii möral, ‘Uŋa Töröŋan kungö nöröpŋe eta köla tari ekŋani, yaŋön mönö Uŋa Töröŋi ambazip uruŋine ala melun mem eŋgima.’

³⁴Nöŋön mi ehalaŋgöra aka könaŋamŋi kewö naŋgöba jizal, ‘Yaŋön Anutugö Nahönŋi akza’.” Mewö.

³⁵Mewö jiiga miri giaŋiiga Jonöŋ kunbuk o jitŋe miaŋgöreŋök aniga gwarekurupŋi yeŋgöreŋök yahötŋan yambuk mohotŋe kinget.

³⁶Kingetka Jisösnöŋ miaŋgöreŋ eŋgoŋgita anöhi, i törörök uba ehiba jiyök, “Azi mi ehot. Yaŋön mönö Anutugöreŋ lama moröŋi ewö akza.”

³⁷Mewö jiiga gwarek yahöt yetkön keu mi möta Jisösgö andöŋe anohot.

³⁸Anohotka Jisösnöŋ liliŋgöba andöŋe kayohori, i etkeka kewö qesim etkiyök, “Iŋiri niŋia jaruba kazahot?” Mi möta jiyohot, “Ketaŋamniri! Gi miri denike ahöba maljan?” (Juda yeŋön ‘Ketaŋamnini’ keu mi böhigöra jiget.)

³⁹Mewö jiyohotka meleŋnök, “Mönö kaba ehot!” Mewö meleŋniga wehön möŋaiiga 4 kilok miaŋgö dop ahök. Wehön möŋaiiga miaŋgöreŋ mohotŋe anda miri denike ahöba malöhi, mi eket. Mi eka miaŋgöreŋ yambuk malohotka miri söŋauba suŋgem aiga mosöta kayohot.

⁴⁰Jonöŋ keu jiiga gwarek yahötŋan möta Jisösgö andöŋe anohori, yetköreŋök kungö qetŋi Andru, datŋi qetŋi Saimon Pitö.

⁴¹Andru yaŋön mutuk datŋi Saimon miwikŋaiba kewö jii mörök, “Niri Amötqeqe Toŋi mönö miwikŋaizit.” Amötqeqe Toŋi mi Grik keunöŋ Kraist.

⁴²Mewö jiba datŋi waŋgita Jisösgöreŋ anohot. Anohotka Jisösnöŋ Saimon törörök uba ehiba jiyök, “Gi Saimon, Jongö nahönŋi akzanmö, nöŋön qetki Sifas qetpi ahöma.” Mewö.

⁴³Miri giaŋiiga Jisösnöŋ Galili prowinsnöŋ anmamgö möta anda könanöŋ azi qetŋi Filip miwikŋaiba kewö jii mörök, “Gi mönö ni nuataŋgöba kaman!”

⁴⁴Filipnöŋ Andru aka Pitö yetpuk miriŋini mohok. Taonŋini qetŋi Betsaida.

⁴⁵Filipnöŋ azi qetŋi Natanael miwikŋaiba kewö jii mörök, “Mosesnöŋ azi kungöra Köna keunöŋ ohoba kezapqetok yeŋön toroqeba ohoget ahözawi, nini mönö azi mia miwikŋaizin. Azi mi qetŋi Jisös, iwiŋi qetŋi Josef, miriŋi qetŋi Nazaret.”