ISAIA 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Aha! Manu hanidia gurudia tanona, Etiopia sinavaidia unukahadia ai;

²ena gwaukau taudia na revareva vanagidia ai e siaidiamu, Nilo sinavaina amo. Gwaukau taumui mai haragamui e, aola, taudia lalata bona kopidia mamanada-mamanada besena dekediai, gabu kahikahidia bona gabu daudaudia ai e gari heniamu oreana dekenai; una bese na mai siahuna bona mai kwalimuna, ena tano na sinavai ese e hapararaiamu.

³Tanobada inoholaina taumui iboumui ai, tanobada latanai o nohomu taumui e, toa ta ororo ai bae duduia isi negana ai, ba itaia! Kibi ta bae hiriria negana ai, ba kamonai!

⁴Badina be Iehova ese ini e hereva henigu toma, eto: Egu noho gabuna amo baina roharoha, asi reḡereḡegu; dina e taramu siahuna na heto, ninoa taboro negana siahuna ai na heto.

⁵Badina be taboro negana do basine kau ai, bure vada e marai bona vine huahuana e magemu negana ai, ia ese kwama-kwama kaiadia amo baine kwamadia, bona e hetoi lasimu rigidia baine lapa oho.

⁶Iboudiai bae mia, ororo manudia, damudia e tahumu ḡaudia, adia, bona tano boromadia adia. Siahu negana ai damudia e tahumu manudia ese bae anidia, bona keru negana ai tano boromadia iboudiai ese.

⁷Una negana ai haida ese edia herahia ḡaudia bae mailai, Iehova Sabaota ena. Taudia lalata bona kopidia mamanada-mamanada oreana, gabu kahikahidia bona gabu daudaudia ai e gari heniamu oreana. bese mai siahuna bona mai kwalimuna, ena tano na sinavai ese e hapararaiamu besena, ese Siona ororona, Iehova Sabaota ladana e nemaiamu gabuna, bae maila.