IOSUA 24:5-14

⁵Bena Mose bona Aaron na siaidia, Aigupto na hahisia, bogaraginai na kara karadia amo; una murinai na hakaumui lasi.

⁶Tamamui na Aigupto amo na hakaudia lasi; bena kone ai o lasi; bena Aigupto taudia ese tamamui e ḡavadia, mai edia kariota bona mai edia hosigui taudia, ela bona Davara Kakakakana.

⁷Bena tamamui ese Iehova e tai henia negana ai, ia ese umui bona Aigupto taudia padadia e havaburaia, davara amo e habubunidia. Aigupto ede na kara henia toma na matamui ese e itaia. Murinai tano ḡaḡaena ai o nohova, nega daudau.

⁸Bena na hakaumui vareai, Amoro taudia edia tano Ialonai, Ioridane sinavaina unukahana ai; idia ese e tuan henimui, bena imamui ai na atodia. Edia tano o abia; lau ese umui vairamui ai na habuadia tari.

⁹Bena Balak Siporo, Moab pavapavana, e tore isi, Israel e tuari henia; ia ese Balaam Beoro e boiria, baine uduguiraimui totona;

¹⁰a Balaam asina hakala henia, taunabunai ia ese e hanamomui; ia imana amo na hamaurimui.

¹¹Una murinai Ioridane sinavaina o hanaia, Ieriko ai o kau. Bena Ieriko taudia ese e tuari henimui; Amoro taudia bona Perisi taudia bona Kanaan taudia bona Hiti taudia bona Girigasa taudia bona Hivi taudia bona Iebusu taudia ese danu e tuari henimui; a lau ese umui imamui ai na atodia.

¹²Nanigo danu na siaidia vairamui ai, idia ese Amoro pavapavadia raruosi na umui vairamui ai e luludia lasi, dia emui dare ese bona dia emui peva ese.

¹³Asio ruaia tanona na henimui; asio hadai hanuadia o noholai; asio hado imeadia, vine imeadia bona olive imeadia, huahuadia o ani.

¹⁴Taunabunai, Iehova garina ba gari, ia isiaina ba lao heni mai momokanimui bona mai kamonaimui ida. Senemui ese Eufrate sinavaina unukahana ai bona Aigupto ai e toma henidia diho diravadia ba rakatanidia, Iehova isiaina ba lao heni.