JOSUA 24:5-14

⁵Ehame no Mose â Aroŋ jaŋerao sorec‐jofahuc Aigita mâreŋko wiac qeŋ bipinehec bâfuarâ jowac‐jopa wefupo.

⁶Erâ apa ŋosafâc‐ŋeŋic Aigita mâreŋkonec jowac‐jopape wareku Hâwec Bâbâroŋko fisimbiŋ. Ehame Aigita ŋic jaŋe apa ŋosafâc‐ŋeŋic bâjâpec‐joparâ ʒika keretac â momori ŋic becâsicfâc‐jeŋichec Hâwec Bâbâroŋko fisimbiŋ wâc.

⁷Eme apa ŋosafâc‐ŋeŋic jaŋe Wofuŋ no kio wâwâsic enarembiŋ. Enarepie jaŋe â Aigita ŋic ŋondeŋ‐jeŋicko dapâc qisiric bâfuapo. Ehuc mupe hâweczi Aigita ŋic qâuruc‐jopa‐fârewec. No Aigita mâreŋko wiac bâfuapo i hone‐fârembiŋ. Erâ mâreŋ burocnao dameŋ ʒora jâmbâŋ jumbiŋ.

⁸Erâ no bacŋopa warehuc jukuhape Jordaŋ ŋifecnao Amori ŋic jaŋere mâreŋko fisimbiŋ. Fisipie jaŋe ŋoŋehec ʒika bâfuapie meŋeŋicko râec‐jopape mâreŋ‐jeŋic ro rauc ehapie sâc bâsirowec‐jopapo.

⁹Eme Ziporo ŋokâ‐ticne Balake e Moabi ŋicwofuŋzi faharerâ Israe ŋic ŋoŋehec ʒika qawec. Ehuc Beoro ŋokâ‐ticne Bileamzi sâwec‐ŋopaocte dâŋ râecnewec.

¹⁰Erâ no sifu Bileam dâŋticnere hazec moc mi râepo. Ehame jambuŋ‐ŋopawec. Eme no Balakere meonec batarac‐ŋopapo hâcne.

¹¹Eme ŋoŋe Jordaŋ opâ fotâcnerâ Jeriko haeo raʒimbiŋ. Raʒipie Jeriko ŋic jaŋe ŋoŋehec ʒika bâfuambiŋ. Erâ Amori ŋic, Periʒi ŋic, Kanaaŋ ŋic, Hitiŋic, Girigasi ŋic, Hiwiŋic â Jebusi ŋic jaŋe wâc iŋuc jaha embiŋ. Eme no meŋeŋicko râec‐jopa‐fârepo.

¹²Iŋuc ehuc Amori ŋicwofuŋ jajahec hâhâwic sâko hejactepe hâbi‐jekic goroŋkeme wise‐ŋarepic. I ŋoŋere tepe me ʒika wiaczi gie i mi bawec.

¹³No mâreŋ â fic hae ŋarepo i ŋoŋe giene mi bambiŋ. Erâ ira ŋeŋe juju ehuc waiŋ â oliwa nâeŋgopieŋ i ŋoŋe ŋaŋac he sarac wâc mi embiŋ.’

¹⁴“Eme irec hâcne Wofuŋ araŋ bacnehuc maŋbiaŋko jauŋ fârihec kiŋaŋ qacnenʒepieŋ. Erâ apa ŋosafâc‐ŋeŋic jaŋe Eufrata opâ ocniŋucnao â Aigita mâreŋko nemu araŋ bajarerâ dape‐jarehuc jumbiŋ i behe‐fârerâ Wofuŋ kiŋaŋ qacnenʒepieŋ.