Ioanes 10:25-40

²⁵E Isu i koli, i ta maea, “A taki mua pali. Pali i uka ma mu longo mai a ngavagu. A maka nivakasiri a rata na rane Tata ri vakasiri iau e rei.

²⁶Pali i uka ma mu luhoi tora iau, a vuhuna i uka ma mua a sipsip nau.

²⁷A sipsip nau ri longo­kilala a lohogu. Iau a lohoka ne ria, ri muri nau.

²⁸A habi ne ria a nima­huri vakaroro, i uka ma ri gi mate. I uka tara viri ge kini paru ria na limagu.

²⁹E Tata, ra i habi ria nau, i dagi hateka ne huriki lobo. I uka tara viri ge bole tala ria na limane Tata.

³⁰Maria e Tata miri palupulupu.”

³¹Muri e huriki a Iuda ri bole rike tabu a maka kedo, ta ri gi padimatea.

³²Pali e Isu i taki ria, “A vakasiri mua vona pali a nivakasiri dagi i kupo ri valai ne Tata. Pali e rei a maka nivakasiri mu gu padi­mate iau vona?”

³³E huriki a Iuda ri koli, ri ta maea, “I uka ma mi gi padi ioe na kedo vona a maka nivakasiri ngi. Mi gi padi ioe a vuhuna o ta hale hateka na Vure. O taki ioe ta ioe a Vure. Pali ioe a bakovi tavula kunana.”

³⁴E Isu i koli, i ta maea, “A ngava ni here na vinara ne mua, a Vure i ta maea, ‘Mua e huriki a vure.’

³⁵Si lohoka vona, a ngava i taki a hinere, i uka ma i mapulo lae, i tabuli vakaroro. Re huriki a bakovi a Vure i habi a ngava vona ne ria, i taki ria, ta ria e huriki a vure.

³⁶Pali iau, e Tata i vulaki iau, i rudu iau a valai koea na malala. Pali i navai mu taki iau, ta a ta hale hateka na Vure na tahuna a taki iau, iau a Tuna Vure?

³⁷Bara iau i uka ma a rata a leho ne Tata, naha ni longo mai iau.

³⁸Pali bara iau a rata a leho ne Tata, pali mu koi ni luhoi iau, a ngaru mu gu luhoi a maka niva­kasiri a rata. Muri bara mu matakilalea e Tata i made turagu, iau a made turane Tata.”

³⁹I mavonga ri toni tabu ni lakavua, pali i uka ma ri lakavu visia.

⁴⁰Muri e Isu i hamule, i tulu poloa a naru e Iordan, i made na tabeke e Ioanes i vahilolo e huriki vona muga.