Jon 10:25-40

²⁵Jises eme asehek i tiri, “Jo ndrasehek ndrawek taha, arile aha batehei budon taha bala ta sahou tek bwe. Iri lahou tinan jo amekes na boto-on ta nyara tama badeh, ta aha katanan jo,

²⁶arile aha batehei budon taha bala ta aliy bwe, tasah aha sipsip tek handru bwe.

²⁷Iri sipsip tek anuhun ma iri tanan bohok. Jo tanan iri, ma iri adek an hamon tek.

²⁸Jo atehei kohak handru ili tiri, ma iri kameh winiyan bamak bwe, ma ari ndramak winiyan baruwi iri ado minek bala len bwe.

²⁹Tama amwenen, iy ndratehei iri ndrame tek, iy udu bwele-en labai tiri lakou marakon, ma ari ndramak winiyan baruwi iri ado mine tama ame len bwe.

³⁰Jo hawe tama, aru ari le.”

³¹Sahou tan eme ma bwidi iri Juwis akohok bek anya korou iy ja.

³²Eme Jises asehek sahou i tiri ja i buku doh, “Jo ndraleheyani aha ta iri lahou laba tinan solo-an labai, ta tama. Ta saba lahou tinan handru, aha anya korou jo na bek?”

³³Iri anya, “Ahi winiyan borou ou na bek ta iri lahou tinan rayah ou amekes bwe, arile ou bobose Kindrei, tasah ou ndramak laleyah, ou aloh ou, ma ou amekes ou ja i buku Kindrei.”

³⁴Jises eme tiye sahou ili tiri anya, “Ta kandriyen malen taha, sahou ta Kindrei randra asehek i buku doh, ‘Jo Kindrei, jo asehek, aha badeh, ndra kindrei.’

³⁵Bwena mene Kindrei asehek sahou dah ili tiri lau, iy tiye tiri ta iri ndra kindrei. Aha ndranuhun, sahou udu bolo buk ndrabun ta Kindrei kameh udu le buku doh, winiyan bano bwe.

³⁶Arile jo, tama amwenen leheyani jo, ma iy suni jo eme andri kon munyak. Jo ndrasehek taha, ‘Jo Nadu Kindrei.’ Buku sah ja aha anya, jo bobose Kindrei ma jo anya kakohok ndrahunen?

³⁷Buku aha anya jo bamekes gok ta tama bwe, mwasin ta aha satehei budon taha same ta sahou tek.

³⁸Jo badeh, amekes iri gok ta tama. I buku aha batehei budon taha bame ta sahou tek bwe, mwasin, aha katehei budon taha kili le tiri lahou tinan mene jo ndramekes. Tasah, jo aso-ok aha katanan ma aha kabudon kamwenen ki buku doh: Tama badeh, i buku jo, jo i buku le tama. Aru ma la-uh badeh, ari le.”

³⁹Eme ma bwidi iri anya kateu iy, arile iy eme atobwak iri.

⁴⁰Jises eme edek iu ili hamon ili kapa gwa Jodan bilisiu bwena mene Jon ta alomwa inyu iri lau are aliy, ma iy udu aliy udu gwek.