San Juan 10:25-40

²⁵Orzeꞌ na Jesuuz rab mi dey: ―Ya̱ bi mne̱e̱ lo der, tees wancheña lagy der. De coz nu mnii Ñgyoozh nu ricya̱, ndeꞌ rlyuuñ nu naca̱ Mesías.

²⁶Tees de ru wacheña lagy der de coz nu rne̱e̱, gun a̱ꞌ nac der shily ne̱.

²⁷De shily ne̱ ryuꞌ lo ma ti̱ꞌ ornu rne̱e̱. Nunu ya̱ yuꞌ lo̱ de ma ne̱. Nunu de ma zeꞌ ryiid ca ma icha̱.

²⁸Gyicya̱ nu cui mbañ de ma tub la, nunu rila wanit lo de ma. Nunu se cyu la gac co za de ma ya̱a̱.

²⁹Ñgyoozh uza̱, biñ nu briic de ma ne̱, mi zeꞌ zily zir nac mi par deꞌ zir mbecy. Nunu ni tub la mbecy wac co dey ma yaam.

³⁰Ya̱ nu Ñgyoozh uza̱ tub ziꞌl nu nac de̱ ―nam.

³¹Orzeꞌ de mbecy zeꞌ pteꞌ gaꞌ dey gyitaꞌ nu shet dey nim.

³²Orzeꞌ nam rab mi dey: ―Bicya̱ zañ de coz nap nu bruu lo Ñgyoozh lo rgüii la der. ¿A nu nac ca na de coz zeꞌ rgoow gyitaꞌ der ya̱? ―nam.

³³Orzeꞌ na gaꞌ de mbecy rab yum: ―Walab nu rgoow gyitaꞌ de̱ ru nu nac ca na tub coz nap nu ricy ru, sinu rgoow gyitaꞌ de̱ ru nu nac nu mnii zir ni Ñgyoozh, gun ru mbecy ziꞌl nac ru, tees ricy ru nu nac ru Ñgyoozh ―na dey.

³⁴Orzeꞌ na Jesuuz rab mi dey: ―Lat de riidz nu bzeeñ Ñgyoozh ni der, Ñgyoozh nam rab mi de mbecy: “De ru nac der de ñgyoozh”, nam.

³⁵Rad lagy den de coz nu rnii riidz ni Ñgyoozh, nu rila wagruu fals ñi. Ñgyoozh bloo lam de mbecy “De ñgyoozh”: de yu nu bri riidz nim lo.

³⁶Zeꞌ Ñgyoozh bzum ya̱, nunu bzuu nez mi ya̱ yapa̱ gyishlombecy ii. Benu ni, ¿lagu rnii der nu ya̱ rne̱e̱ zi̱ ni Ñgyoozh nu nac nu mne̱e̱ nu naca̱ iꞌñ mi?

³⁷Benu wagyicya̱ de coz nu bruu lo Ñgyoozh, uza̱, orzeꞌ cueꞌ cheña lagy der de coz nu rne̱e̱.

³⁸Tees benu ricya̱ de coz zeꞌ, mas wacheña lagy der ne̱, tees guña lagy der ni de coz nu ricya̱, gun tub tir ziꞌl gad lagy der nu ya̱ tub ziꞌl naca̱ du̱ Ñgyoozh, uza̱, nunu Ñgyoozh, uza̱, tub ziꞌl nac mi nu ya̱ ―nam.

³⁹Orzeꞌ tub tiraꞌ ngulagy dey nguꞌ yaay mi nu ñgya nu dey mi pres. Tees blam yaa dey zam.

⁴⁰Orzeꞌ Jesuuz bish cyam za gaꞌm tub laꞌ gaꞌ ruꞌ gyoow Jordaang. Orzeꞌ pcyiiñ mi zeꞌ. Zeꞌ lugaar nu gusa Waa briib nis yu mbecy anzir.