San Juan 10:25-40

²⁵Chiy cuaby Jesús lodeb: —Agudixtiia lot per laat quɨt reldilaaztit nare. Ne de cos ni runa cun guelrnabee xte Xtada Dios, güeldí ríeny tú nare.

²⁶Per laat quɨt reldilaaztit, pur ni gati de xíiltia laat.

²⁷De ni ná par naa, rumbeedeb rsiia, ne nare rumbiiadeb ax rzanalddeb naa.

²⁸Nare rdeedadeb guelnabány par chazy, ne quɨt chúuti dxi nitlodeb, nicza quɨt tu idzɨcáti laadeb luaa.

²⁹Te pur Xtada laany bnɨɨdxny laadeb nare ne laany mazru guroo guelrnabee napny lo irate, ax quɨt tu chaleeti idzɨcá laadeb lo Xtada.

³⁰Nare ne Xtada Dios tubyzi nan.

³¹Chiy de bɨny Israelqui bldesdeb guia par niguinxúdeb Jesús.

³²Per laany raipny laadeb: —Pur guelrnabee xte Xtada zienzi de cos güen abaania nez lot. Anre, ¿cúndxa de lo ira de cosqui quinxút nare?

³³Ax cuaby de bɨny Israelqui: —Gatllɨ pur de cos güenti ni abaaniu idinxún liú. Dunnɨ idinxún liú pur ni rsacloo Dios. Te pur bɨnguɨchliuzy liú ne runlesacu liú zecac Dios.

³⁴Chiyru raipy Jesús laadeb: —Lo ley xtentɨ rnii: “Nare guniia dec laat nát de dios.”

³⁵Dunnɨ nánnɨ dec gati dixúti ná ni cá lo xquiits Dios, ne laany gulelány de dios de bniety ni guninény, de ni gúp guelrnabee lo de bniety Israel.

³⁶Anre, ¿xínii rniit dec rsacluaany pur ni guniia dec nare naa Lliin Dios? Ne laany gulecány nare par bxiaaldny naa lo guɨchliu.

³⁷Belati quɨt cayuna zec ni rnii Xtada, quɨt chaldilaaztit nare.

³⁸Per belati cayuna zec ni rniiny, masquɨ quɨt chaldilaaztɨ nare per gulchaldilaaz dec pur laany zéed ni cayuna, te par yalo gacbeet dec rbeznía Dios ne laany rbeznény naa.

³⁹Chiy de bnietqui rcaazdeb ninaazdeb Jesús par niseegudebny, per laany gulágacny lodeb.

⁴⁰Chiyru zégac Jesús stuby lad ruu gueeu Jordán, nez rut btiubnis Juany Bautist de bniety mazru gulo. Nezqui guzuguaany