Yohanis 10:25-40

²⁵Yesus nataa nae, “Au afada memak neu ei so, tehuu ei taa nau mamahele. Naa te dedeꞌa kala fo Au tao kala, basan kada tungga Au Amang palendan. Dedeꞌa kala sila latudu lae, Au ia see.

²⁶Tehuu ei taa mamahele Au, huu Au biꞌilombo nggala taa ei.

²⁷Huu Au biꞌilombo tetebeng ndia, lalelak Au halang. Sila boe oo tungga Au. Au boe oo alelak sila.

²⁸Au fee sala soda tetebes fo taa namaketuk, ma sila boe oo taa laelak lo Lamatuak. Taa hambu hataholi esa boe, fo bisa namoa nala sila leme Au mai.

²⁹Au Amang nai nusa-sodak fee sala leu Au. Ndia ana seli lena heni basan. Huu ndia de taa hambu hataholi esa boe fo ana bisa namoa nala sala leme Ndia liman mai.

³⁰Huu Au Amang ma Au ia, esak.”

³¹Lamanene leondia, boe ma hataholi Yahudi la malangga nala haꞌi batu laꞌi esa bali, fo sangga mbia lisa Yesus.

³²Boe ma Yesus nafada sala nae, “Heeh! Au atudu dedeꞌa malole noꞌuk neme Au Amang mai so. Neme dedeꞌa malole fo Au atuduk sila, esa dadi toꞌok fo ei sangga mbia misa Au, do?”

³³Ala lataa lae, “Ai taa mbia o, huu o tao dedeꞌa malole. Tehuu ai huku mbia o, huu o mamumulu belak so! O kada hataholi basa faik, tehuu o soꞌuk aok sama leo Manetualain! Ana seli ndia so bali maa!”

³⁴Boe ma Yesus nataa nae, “Talobee? Nai heti-heu anggama fo ei toꞌuk ndia nana sulak nae, ‘Au afada memak ae, ei malangga mala ia, sama leo lamatuak.’

³⁵Ai bubuluk so mae, basan nana sulak nai Lamatuak Susula Malalaon ndia, tetebes, ma taa bisa koka henin. Mete ma Manetualain seseik nae, malangga dae-bafok ia sama leo ‘lamatuak’, na, nakalenak neu Au bali.

³⁶Ama nai nusa-sodak hele nala Au, ma nadenu Au uni dae-bafok ia mai. De nandaa nalan seli mete ma Au ae, Au dadik Manetualain Anan! Taa maso langga utek, mete ma ei mae, Au kokolang ndia nakadadaek.

³⁷Leoiak. Mete ma Au taa akalalaꞌok Au Amang uen na, ei boso mamahele neu Au.

³⁸Tehuu Au akalalaꞌok Ndia uen akandoo. De, mae ei taa nau mamahele Au, tehuu mae kada faak boe ei musi simbok tanda heran fo Au taok ndia. No leondiak, na, ei boe oo bisa bubuluk mae, Au Amang nana mbaꞌak no Au. Ma Au boe oo nana mbaꞌak ua Ndia.”

³⁹Basa boe ma ala soba seluk fo sangga humu Ndia, tehuu mboꞌi heni Ndia.

⁴⁰Boe ma Yesus neni seluk lee Yarden selik neu, nai mamanak makasososan fo makahulun Yohanis mana salanik, salani hataholi. Boe ma Ana leo tataak neme ele.