Jon 10:25-40

²⁵Mewö jim qesim waŋgigetka kewö meleŋ eŋgiyök, “Nöŋön lök jibiga mötketmö, iŋini nöŋgö keuni mi qahö möt narize. Nöŋön Iwinaŋgö qetŋe aŋgöletot ahakzali, miaŋön mönö könaŋamni indela naŋgöba kondelakze.

²⁶Mi naŋgöba kondelakzemö, iŋini nöŋgö lama kambu uruŋe qahö maljeaŋgöra aka keuni qahö möt narimakze.

²⁷“Nöŋön mönö lamaurupni möt eŋgibiga yeŋön mewöyök nöŋgö keu jölni möta ni nuataŋgömakze.

²⁸Nöŋön malmal köhöikŋi eŋgibiga letota nalö kunöŋ qahö kötökŋi ayuhume. Kunŋan kun i nöŋgö böröneyök qahö öröba köndeŋ eŋgima.

²⁹Nöŋgö Iwinan i nöŋgö böröne al eŋgiyöhi, yaŋön körek eŋgoŋgita öŋgöŋgöŋi ketaŋi akza. Miaŋgöra körekŋan i nöŋgö Iwinaŋgö böröŋeyök öröba köndeŋ eŋgibingö osime.

³⁰Ni aka Iwi netkön mönö mohot aka maljit.”

³¹Jisösnöŋ mewö jiiga Juda jitŋememe yeŋön kunbuk gölmenöhök köt umburaŋgöba memba miaŋön gila qebingö aket.

³²Mewö aketmö, kewö jim eŋgiyök, “Iwinöŋ nam köl niŋgiiga aŋgöletot ketaŋi gwötpuk aka membiga ekeri, mieŋgöreŋök mönö wania kun mötmöriba ni kötnöŋ gila nuŋgubingö mötze?”

³³Jim eŋgiiga Juda yeŋön meleŋda jiget, “Neŋön aŋgöletot ketaŋi aknöŋaŋgöra aka qahö kötnöŋ gila guhubingö akzinmö, Anutu mepaqepaik ak waŋgizanaŋgö likepŋi ak gihibin. Gi gölme azia aigun silegi öne mem öŋgöba Anutu tandök akŋamgö jizan.”

³⁴Mewö jigetka Jisösnöŋ meleŋ eŋgiyök, “Buŋa Kimbinöŋ Köna keu kun kewö ohoget ahöza, ‘Anutu nöŋön jial: Iŋini mönö nöŋgö bemurupni akze.’

³⁵Buŋa Kimbigö keu mi mönö pömsöm qahö qemapmö, pöwöwöm ahöma. Miaŋgöra Anutunöŋ keuŋi ali kaba ambazip buŋaŋina ahöhi, Anutunöŋ yeŋgö qetŋini ‘bemurup’ mewö qet eŋgiyök.

³⁶Ambazip omaŋi mewö qet eŋgiyökmö, Iwinöŋ azi mem sarahiba melaiiga gölmenöŋ eröhi, eŋön mönö denöwö aka yaŋgöra kewö jize, ‘Gi Anutu mepaqepaik ak waŋgiba maljan.’ Nöŋön ‘Anutugö nahönŋi akzal,’ keu mewö jibiga eŋön mönö wuanöŋgöra mi mötket qahö dop kölja? Iŋini Anutugöreŋ Buŋa keu mi qeze me?

³⁷“Nup memakzali, mi eketka Iwinaŋgö ahakmemegö dop qahö ahakza ewö, mönö kude möt narim niŋgime.

³⁸Iwinaŋgö ahakmemegö dop aka memba maljal ewö, könaŋamni mewö eka mönö möt narim niŋgime. Mi keunaŋgöra aka qahö möt naribeak ewö, mönö aŋgöletotnaŋgöra aka töndup möt narim niŋgime. Iwinöŋ nömbuk qekötahöba kinja aka nöŋön Iwibuk qekötahöba kinjali, iŋini miaŋgö könaŋi möt sölöŋgöba asarimegöra jizal.”

³⁹Jisösnöŋ mewö jiiga kunbuk memba jöhöbingö mötketmö, börö bapŋineyök unjurata eta anök.

⁴⁰Eŋgömosöta Jordan o töwatŋi kutuba kunbuk likepŋe anda Jonöŋ mutuk o melun mem eŋgiba malöhi, miaŋgöreŋ aŋgota nalö tosatŋi toroqeba miaŋgöreŋ malök.