San Juan 10:25-40

²⁵—Amombehu niha acoi pẽu, ndache reroyai eté rumo peye. Mbahe ayapo vahe che Ru mborerecuasa pɨpe omboyecua ité Poropɨ̃sɨrosar che recosa;

²⁶pe rumo ndache reroyai eté peye. Esepia, pe ndahei eté che remiaro ovesa peico.

²⁷Che remiaro ovesa rumo oicua che ñehe. Che avei aicua ahe yuvɨreco. Ahe evocoiyase che rupi oguata yuvɨreco.

²⁸Amondo avei tecovesa apɨrẽhɨ yuvɨreco chupe icañɨẽhɨ ãgua; ndipoi chietera que ava vɨrocua iri vaherã che sui.

²⁹Che Ru niha ombou cheu. Esepia, ahe ipĩrata catu opacatu ava sui. Ndipoi chietera que ñepei ava oicatu vahe serocua che Ru sui.

³⁰Che Ru iyavei che oroico ñepeiño ité —ehi judío rerecuareta upe.

³¹Aipo ihese, judío rerecuareta osupipa iri ita yuvɨreco yapi ãgua.

³²Ahe chupe rumo aipo ehi: —Setá mbahe poromondɨisa avɨye vahe pe rovaque ayapo che Ru pĩratasa pɨpe. ¿Uma che rembiapo avɨye vahe sui che api-api pota peye ita pɨpe? —ehi judío rerecuareta upe.

³³Judío rerecuareta omboyevɨ yuvɨreco chupe: —Nande api-apisai chira ita pɨpe que mbahe nde rembiapo avɨye vahe rese. Co rese rumo ẽgüe orohera ndeu. Esepia, nde ereñehe rai tẽi Tũpa rese. Nde moco ava tẽi ereico. Nde rumo ereyeapo Tũpa ndeyeupe ae —ehi yuvɨreco chupe.

³⁴Evocoiyase aipo ehi ahe ava upe: —Pẽundar mborocuaita icuachiaprɨ pɨpe niha aipo ehi: ‘Che aipo ahe pẽu: pe tũpa pãve ité peico’ ehi.

³⁵Yaicua niha icuachiaprɨ pɨpendar ndiyai yayamotarẽhɨ. Esepia, Tũpa aipo ehi: ‘Pe tũpa pãve ité peico’ ehi evocoi ava oñehe pɨsɨsar upe.

³⁶Che niha che Ru Rembiporavo aico. Ahe che mbou co ɨvɨ pɨpe. ¿Mahera ru evocoiyase, ‘Nde ereñehe rai tẽi Tũpa rese’ peye cheu, ‘Che Tũpa Rahɨr aico’ ahese pẽu?

³⁷Esepia, acoi ndayapoise mbahe che Ru remimbotar, ahese ndache reroyai chietera peye viña.

³⁸Yepe ndache reroyai chira che recocuer rese peye viña, mbahe ayapose rumo ahe tẽi peroyara. Sese tapeicua ñepei reseve che Ru secoise che rese iyavei che sese che recosa —ehi oamotarẽhɨmbareta upe.

³⁹Osoquenda pota iri yuvɨreco viña; Jesús rumo osoño ipãhu sui.

⁴⁰Oyevɨ ɨai Jordán rovai. Aheve acoi Juan yɨpɨndar oporoãpiramo. Aheve opɨta.