IOANE 3:29-36

²⁹Headava matamata hahine be headava matamata tauna ese ia biagua. To headava matamata tauna ena turana be ia gini noho, ia kamonai noho, vadaeni headava matamata tauna ena gadona ia kamonai neganai ia moale bada. Unai dainai, lauegu moale be ia momokani vadaeni.

³⁰Ia be do ia bada lao, lau be do lau maragi lao.”

³¹Ataiai dekena amo ia mai tauna be ibounai edia biaguna, tano dekena amo tauna be tano tauna, bona tano hereva danu ia gwauraia. Guba dekena amo ia mai tauna be ibounai edia biaguna.

³²Ia ese ia itaia, bona ia kamonai gaudia ia gwauraia hedinarai, to iena hereva be tau ta ia abia dae lasi.

³³To iena hereva ia abia dae tauna ese ia hamomokania vadaeni, Dirava be momokani.

³⁴Badina be Dirava ese ia siaia tauna ese Dirava ena hereva ia gwauraia, bona Dirava ese iena Lauma ibounai do ia henia, sisina sibona do ia henia lasi.

³⁵Tamana ese iena Natuna ia lalokau henia, bona gau ibounai iena Natuna ena imana dekenai ia atoa vadaeni.

³⁶Dirava ena Natuna ia abidadama henia tauna ese mauri hanaihanai do ia abia, to iena Natuna ia kamonai henia lasi tauna be mauri do ia itaia lasi, badina Dirava ena badu be iena latanai do ia noho.