Jan 3:29-36

²⁹Madanm-lan ki ka mayé-a sé sa misyé-a ki ka mayé épiʼy-la. Mé kanmawad-la ki ka édé misyé-a ki ka mayé-a ka èspéyé èk i ka kouté, èk pa dé kontan i ka kontan lè i tann vwa misyé-a ki ka mayé-a. Sé kon sa tjè mwen kontan atjwèlman.

³⁰Sé pou Jézi ni plis moun ki ka swiv li èk sé pou mwen ni mwens moun.

³¹“I sòti an syèl-la èk i anho tout lézòt. Mwen ki sòti an latè-a sé jan latè-a, èk sé bagay ki ka fèt an latè-a tousèl mwen konnèt. Mé li ki sòti an syèl pli ho pasé tout lézòt.

³²I ka di sa i ja wè èk sa i ja tann, mé pyèsonn pa ka kwè pawòl li.

³³Mé moun-an ki kwè pawòl li-a ka moutwé tout sa Bondyé di sé lavéwité.

³⁴Moun-an Bondyé voyé-a ka palé pawòl Bondyé, paski Bondyé ka ba li Lèspwiʼy san miziwé.

³⁵Papa-a enmen Gason-an èk i ja ladjé tout bagay anba kondwit li.

³⁶Moun-an ki kwè an Gason-an ni lavi étonnèl. Moun-an ki dézobéyi Gason-an pa kay janmen ni lavi sala. Bondyé kay kontiné piniʼy.”