1Ngode Datagaliwabe-o í̠ erembira ngialu piaga karume i̱ bope hole manda bialu ka. Tini koore howa tinaga bi ke̱ halu la hole bialu kago i̱na mana tigabi bialu kogo tigua hendelo í̠na mo walia habe. Í̠na i̱ biamogo bialu agali ko uruninaga giha howa yamibe laro.
2Í̠nime hangu i̱ handayaho haga kegonigo irane aginaga í̠na i̱ mo embedaho kebe. I̱naga waitigi bu karume i̱ bope halu i̱naga mini mo ko haga kagonaga i̱ tandaga haabo haruligo irane agibe.
3I̱ heyalu Hari Saiono í̠ninaga hari loma bia hene wedagoria tigatiga puabo halu poliyabi í̠ninaga anda í̠ kegoria ibuliyabi í̠na í̠ninaga wá holenemebi henene lolenemebi i̱ haru haabo habelo hameledo.
4Ngode Datagaliwabe-o í̠ninaga lomabu delaga dabu bu heledagoria polebero. Í̠na i̱ mo turu halu miniha dungulo helariligodago anidagua bibe laro. I̱naga Ngode Datagaliwabe í̠ore kegoni. I̱na ngida ale balu í̠naga mini yaraga halu iba ganaru lalu holebero.
5Ai nde áyu i̱ore miniha turu naheore haabo kogoni aginagadabe. I̱naga miniha genda bialu lungulungu biaruagoni agiorenagadabe. Ani biaruagoni bilo i̱na i̱naga Ngode Datagaliwabeni mini hanaho holebero. I̱na i̱naga Pele Ngiagabi i̱naga Ngode Datagaliwabebi kagonaga mini i̱na lone mo yaraga holebero.
