Hisabu 23:18-30

¹⁸Aho, Balaamu nakamlavila Balaki ulonzi wa heye. “Wime Balaki, uhuliche, unyhulichize gwa mwana wa Sipoli.

¹⁹Nguluwi hawele munhu, yalonje udesi, ne munhu yagaluse kijesa kwa heye! Ndaze, kolagana na wanhu chinhu na yaleche kudita, ama yalonje chinhu na yaleche kweneza?

²⁰Ulole, mhegwa mzilo wa kutambichiza, na heye nakatambichiza, heni siweza hebu kugalusa.

²¹“Mkulu Nguluwi hawonile wihe wa wana wa Yakobo, ne kulema kwa hewo wana wa Isilaeli. Mkulu Nguluwi, Nguluwi wa hewo ka hamwe na hewo, heye nakabochelaga lutogo lwa wandewa.

²²Nguluwi nayawaholile kulawa Misili, naketwanza na wang'honyo wa hewo kota ibogo.

²³Ndangukomya, uhawi hauweza hebu kuwasumya wanhu wa Yakobo, ne upanjilo kwa wanhu wa Isilaeli. Lelo wanhu wolonga, kuwala Isilaeli, ‘Mlole vinduzanduza vyoyaditile Nguluwi!’

²⁴Ulole, kota isimba idala nawenuka, kota isimba ilume wangwima, Waisilaeli hawokwesela mbaka webate chila chowalinguwinga, na kunwa danda ya chila chowalinguwinga.”

²⁵Aho Balaki nakamlonjela Balaamu, “Lelo uleche kuwapanjila ne kuwatambichiza!”

²⁶Ila Balaamu nakamwidichila Balaki, “Ndaze, sikulonjele heni kota nachoyalonjile Mkulu Nguluwi ndo chondiganigwa kudita?”

²⁷Balaki nakamlonjela Balaamu, “Uye, ndokuhilika honhu hanji. Hanji Nguluwi konojezwa leka uwapanjile wanhu awo kulawa ako kwa chiwalo cha heni.”

²⁸Ahyo, Balaki nakamhola Balaamu mbaka kuli chinhembenhembe cha chidunda cha Peoli, hawele wone munhu yeme aho, koweza kuchona chiwala.

²⁹Balaamu nakamlonjela Balaki, “Nzenjele hano honhu saba ha kulavila nhambiko, umbichile goya mibuguma saba na ming'holo milume saba.”

³⁰Balaki nakadita kota navyoyalonjelwe na Balaamu, hamba nakalavya nhambiko ya ibuguma limwe na ing'holo ilume limwe mchanya mwa chila honhu ha kulavila nhambiko.