Numbers 23:18-30

¹⁸Balaam ga helekai aga i nia kokohp aanei: “Balak, tama Zippor, hanimoi malaa, goe hagalongo gi humalia gi dagu mee dela ga helekai ai.

¹⁹God la hagalee hai be tangada dela e helekai tilikai, ge hagalee hai be tangada dela e huli ana maanadu. Mee gaa hai dana hagababa i dahi mee, ge Ia e haga gila aga di maa. Mee e helekai hua, gei di maa guu hai.

²⁰Mee gu helekai mai gi di au bolo au gi haga maluagina ina aga. Di mee a God gu haga maluagina aga, gei au e deemee di huli.

²¹Au digi gida dahi mee huaidu i baahi digau Israel, be di haga haingadaa i di madagoaa ga hanimoi maalia. Dimaadua, go di nadau God le e madalia digaula. Digaula e haga modongoohia aga bolo Mee go di nadau king.

²²God gu laha mai digaula gi daha mo Egypt, gei e madamada humalia i digaula i lodo tauwa, gadoo be di kau daane lodo geinga dela e maaloo dangihi.

²³Deai di buubuu e mee di hai ang gi digau Israel ai. Deenei di madagoaa nia daangada e helekai aga i di hai o digau Israel boloo, ‘Mmada gi di mee haga goboina a God dela guu hai ang gi ana daangada!’

²⁴Teenua o Israel gu duu aga gi nua gadoo be di laion maaloo dangihi! Mee hagalee noho gaa dae loo gi dana daaligi ana manu, gaa gai nia goneiga mo di inu nia dodo o ana manu ala ne daaligi.”

²⁵Balak ga helekai gi Balaam, “Ma goe hagalee haga halauwa digau Israel, gei goe hudee hagahumalia ina digaula labelaa!”

²⁶Balaam ga helekai gi Balak, “Au guu lawa di helekai adu gi di goe bolo au ne belee hai nia mee huogodoo a Dimaadua ala ne helekai mai gi di au bolo gi heia.”

²⁷Balak ga helekai anga, “Hanimoi malaa, au gaa lahi goe gi tuai gowaa. Holongo God ga hiihai bolo goe gi haga halauwa ina digaula i di gowaa deelaa.”

²⁸Gei mee gaa lahi a Balaam gi di ulu di Gonduu Peor, dela e mmada adu laa hongo di anggowaa deelaa.

²⁹Balaam ga helekai anga, “Hauhia au gowaa dudu tigidaumaha e hidu i ginei, goe gaamai laa gi di au nia kau daane e hidu ge hidu siibi daane.”

³⁰Balak gu haga gila aga nia mee a Balaam ne helekai ang gi deia, gaa hai dana tigidaumaha gi nia kau daane mono siibi daane i hongo nia gowaa dudu tigidaumaha dagidahi.