Numero 23:18-30

¹⁸Maʌ̃ne Balaaʌ̃ra nãwã bed̶easia: Zipor warra Balá, mʌ̃a jara b̶ʌra bio quĩrãcuita ũrĩdua.

¹⁹Ãcõrẽra ẽberã quĩrãca b̶ʌẽ́a. Idjira sewa ocaa. Idjia jarad̶ada quĩrã awara ocaa. Idjia jarabʌrʌra obaria. Idjia wãrãneba jarad̶ara obaria.

²⁰Idjia mʌ̃́a jarasia israelerã bia jara b̶ʌmãrẽã. Bia jara b̶ʌduad̶a ad̶a bẽrã mʌ̃a quĩrã awara jaracara b̶ʌa.

²¹Ãcõrẽba Jacobod̶eba yõped̶ad̶ara idu bia mĩgabiẽ́a. Idjia israelerãra idu sopuabiẽ́a. Ãcõrẽra ãdjirã ume b̶ʌa. Maʌ̃ bẽrã b̶ʌsrid̶a jara panʌa idjira ãdjirã boroda.

²²Ãcõrẽba ãdjirãra Egiptod̶eba ẽdrʌ enesia. Idjid̶eba ãdjirãra bio ʌb̶ʌa b̶eaa, paca mẽã warid̶a quĩrãca.

²³Ni ab̶aʌba Jacobod̶eba yõped̶ad̶ara poya ne ãĩ od̶aẽ́a. Ni ab̶aʌba israelerãra poya biẽ́ b̶ʌd̶aẽ́a. Ẽberãrãba nãwã jarad̶ia: “Acʌdua sãwã Ãcõrẽba israelerãra bio careba b̶ʌda.”

²⁴Israelerãra imama quĩrãca panʌa. Jarra b̶ʌd̶e imamara ʌ̃nãũcaa, ãtebʌrʌ ne beaped̶a jũma cobaria. Dji oa sid̶a jũma senebaria. Ara maʌ̃ quĩrãca israelerãra ʌ̃nãũnaẽ́a ab̶a naʌ̃ druad̶ebema ẽberãrã jũma poyabʌdad̶aa.

²⁵Balaaʌ̃ mãwã bed̶eabʌrʌ carea Balába quĩrũbid̶eba nãwã jarasia: –¡Bʌa naʌ̃ ẽberãrãda poya biẽ́ jara b̶ʌẽ́bʌrʌ chupeadua! ¡Ãdjirãra waa bia jara b̶ʌrãdua!

²⁶Maʌ̃ne Balaaʌ̃ba panusia: –¿Mʌ̃a ab̶abe Ãcõrẽba jarabid̶adrʌ jaraida b̶ʌad̶a asiẽ́ca?

²⁷Maʌ̃be Balába idjía jarasia: –Wãna. Mʌ̃a bʌra dewara orroare edeya. Ãĩbẽrã mamabʌrʌ Ãcõrẽba bʌ́a israelerãra idu biẽ́ jarabisicada.–

²⁸Ara maʌ̃da Balába idjira Peor eya borod̶aa edesia. Mamaʌba ẽjũã põãsa ewaraga b̶ʌra jũma unubaria.

²⁹Mama Balaaʌ̃ba jarasia: –Nama animarã babue diabadada siete odua. Paca dji umaquĩrãda siete idjab̶a oveja dji umaquĩrãda siete enedua Ãcõrẽa babue diad̶i carea.–

³⁰Ara maʌ̃da Balába osia Balaaʌ̃ba jarad̶a quĩrãca. Maʌ̃be animarã babue diabadaza pacada ab̶a idjab̶a ovejada ab̶a Ãcõrẽa babue diasia.