HEREVA LADA-ISIDIA 20:18-30

¹⁸Hahealo amo lalo-hata e ginimu; hahekau mai aonegana amo ba tuari.

¹⁹E hesivarai loaloamu tauna ese hereva hehunidia e hahedinaraimu; taunabunai hereva kavakavadia e gwauraimu tauna ida basio hetura.

²⁰Ta ese tamana eiava sinana bema uduguiraia, ena lamepa baine bodo, baine dibura masemase.

²¹Matamana ai e abia haraḡamu ahuna na dokona ai anina namona basine vara.

²²Basioto “Dika baina davalaia”; Iehova ba naria, ia ese baine durumu.

²³Metau auridia mai koikoidia na Iehova ese e inai henidia badamu: bona hahetoho ḡaudia mai koikoidia na dia nanamo.

²⁴Taunimanima ena raka na Iehova ese e reḡuamu; benaini, ena dala ede baine dibaia toma?

²⁵Tau ta baine hereva haraḡa, baineto “Ina na helaḡa”, bena baine gwau hamata murinai baine haeroa, una na idoa ienai.

²⁶Pavapava mai aonegana ese dika taudia na e tapodia hidimu, bona edia dika davadia e henidiamu.

²⁷Taunimanima laumana na Iehova ena lamepa, ia lalona idoinai itahuna.

²⁸Heabidadama bona kara maoromaoro ese hanua pavapavana na e hamauriamu; ena terono na hahemaoro ḡoevaḡoeva ese e ha-aukaiamu.

²⁹Eregabe taudia hairaidia na edia goada, a iahu hairaidia na huidia burukadia.

³⁰Hekwadi berodia ese dika e abi ohomu; bona hedadaba ese taunimanima lalodia e haḡoevadiamu.