Zinama Tumatumae 20:18-30

¹⁸Taveti sari na hiniva koari na binalabala ta tokae ni goi; pana la pa vinaripera goi si hata paki tinokae.

¹⁹Pa nanae hoke ta tozi vura sari vivinei ta tomedi, ke lopu va tata i saripu zamazama sisigiti.

²⁰Be leve nia keke tie sa tamana babe sa tinana; si sa zuke tanisa si kote mate pa korapa huporo dudukurumu.

²¹Sa tinago sapu tuturei ta vagi tatasana, si lopu na minana pa vina betona.

²²Mu lopu zama guahe, “Kote hobea rau sa sinea hie!” Mu aqa nia se Zihova meke Asa kote harupigo.

²³Zihova si hakohako ni sari padapada mamata seadi, meke na sikele kokohadi si lopu qetu ni Sa.

²⁴Sari inene tana tie si ta turaṉa koe Zihova, ke loke tie gilania pavei kote la gua sa siraṉa Tanisa.

²⁵Lopu leana si pude bebeno va madi la nia koe Tamasa si keke toṉa; meke mumudi si talotaṉa ni.

²⁶Na baṉara gilaena kote paqaha pani sari tie kaleadi; meke kote va kilasa hokari sa.

²⁷Sa zuke te Zihova si kalalasa nuquru la pa maqomaqo tie; la hatahata vura ni Sa pa korapa tinoa tanisa tie.

²⁸Tataru meke sinoto va nabu koe Tamasa si lavelave nia sa baṉara; pa tataru si tava nabu sa hinabotu binaṉara tanisa.

²⁹Sa ṉiniraṉira si na vina lavata tadi tie vaqura; meke na kalu keo si na vina sari tadi tie koadi.

³⁰Na sineke va bakora si va via kinaleana; na tinasigiti si va via kamo pa korapa bulona sa tie.