Dad Fngewe 20:18-30

¹⁸Ku nun fandamam i fanam nimò, mni ge funa i fye fngewe, na ku fan ge salu di gusfati, mni ge funa i fye fngewe.

¹⁹I to samtugad salék là gsalig, du fgadean i dad buni, taman fawag ge di to too mayè samtugad salék.

²⁰I to fanlagin i maan demen i yéan, fnati salngad i salò fnati di kifu.

²¹I knun tatì gtagak di ge na gwè fagu di sasè kfagu, landè fye gweam déén kel di atuan.

²²Nang ge makang malas i sasè mgimò di ge, bay baling ge smalig di Dwata, du kenen falwà ge.

²³Knang Dwata na laan kanlehew i dad to tmimbang di timbang mlimbung.

²⁴Dwata tagnè gmadè i gumagu i satu to, bay landè kibò i satu to gmadè i gumagun.

²⁵Sasè ku laam too funa fandam di là ge fa makang ku nun blémdi Dwata, du ken laam dnohò dun.

²⁶I harì fulung faldam dmilè ku simto i dad to mimò sasè, na fanlayaman ale di landè kakdo.

²⁷Tabanlé ito Dwata i fandam na kgadè i fye, taman landè gbuni di kenen.

²⁸I harì too mlawil i glalan ku neben i kagotan digumatlu, na ku kandon i kdee na landè fnalabin.

²⁹I dad lamnok to, too dag i dad to i kgalla, bay i dad tua to, too nafè i dad to.

³⁰I kaflayam fakay gamlaneb nawa i sasè to, du fagu di kaflayaman, numanan i nawan.