HEREVA LADA-ISIDIA 1:17-32

¹⁷Badina be manu vairadiai huo iotona na asi anina;

¹⁸to ini taunimanima ese sibodia raradia ihahebubudia totona e banimu, sibodia edia mauri e bani henidiamu.

¹⁹Daḡedaḡe amo kohu e dadimu taudia iboudiai edia dala be unu heheto; unu kara ese edia mauri e abi ohomu.

²⁰Aonega na ariara ai e boi lolomu, hoinoi gabudia ai gadona e habadaiamu;

²¹maḡu latadiai e lolomu, hanua ikoukoudia ai e herevamu, e tomu:

²²Asi aonegamui taumui e, kware-kware ba ura henia ela bona edena nega ai; Ḡonaḡona taudia na edia ḡonaḡona bae moalelaia, bona kavakava taudia na aonega bae inai henia, ela bona edena nega ai?

²³Egu sisiba herevadia ba hakala henidia; a itaia, egu lalo-hadai na emui ai baina seia dobi; egu hereva baina hadibalaimui.

²⁴Badina be lau na boiboi, to umui na asio ura ba kamonai; imagu na toia roro, a ta ese se laloa;

²⁵egu hahealo idoinai vada o dadaraia, egu sisiba herevadia ta asio abia dae.

²⁶Lau ese danu emui hahehisi baina kirikirilaia, gari ese baine butumui tao negana ai baina ḡonaḡonalaimui;

²⁷gari ese baine butumui tao lai gubana na heto, bona emui hahehisi ḡaudia bae kau koehirihiri na heto, negadia ai, bona lalomui bae hisihisi bona daramui bae doko negadia ai.

²⁸Unu negadia ai bae boi henigu, to basina haere; bae tahugu malaka-malaka, to basie davarigu.

²⁹Badina be idia ese aonega e inai heniava, bona Iehova igari-henina asie abia hidiva;

³⁰egu hahealo herevadia ta asie abia daeva, bona egu sisiba herevadia iboudiai e dadaraidiava;

³¹taunabunai edia kara huahuadia bae ani, bona lalodia na lalo-hadai ese e hahonudia vaitani.

³²Badina be asi aonegadia taudia na edia raka-muri ese e hamasediamu, bona kavakava taudia na edia mata-lahui ese e habuadia tarimu;