Tinata Valavalar 1:17-32

¹⁷A magit vakuku ra ubene, Ona di pala ia ta ra mata i ra beo;

¹⁸Ma dia kobot upi ra gapu i diat iat, Dia paraparau upi ra vinirua ba na tadav diat iat.

¹⁹Damana ra mangamangana kadiat dia vakavakaina upi diat a vangala kadia tabarikik, Nina ba i vole vue ra nilaun kadiat dia vung ia.

²⁰A kabinana i manga oro ta ra nga; I varvarvai ta ra umana tavul;

²¹I oraoro ta ra ngala na tavul a bung; Ta ra mataniolo ta ra pia na pal i vatang kana tinata dari:

²²Avat a umana tuptup, aivia ra bung boko ava mainge ra mangamangana tuptup? Ma aivia ra bung boko ra umana tena varkulumai diat a gugu ta kadia varkulumai, Ma ra umana papaua diat a milikuane ra kabinana?

²³Avat a talil ure kaugu varpit; Ea, ina lolonge tar ra tulungeagu ta vavat, Ina vaarike tar kaugu tinata ta vavat.

²⁴Tago iau ga oro, ma ava ga ol ika, Iau ga tulue vaarike ra limagu, ma pa ta na i ga nuk pa ia;

²⁵Ma ava ga nuknuk vakuku ka ta kaugu lavur varvateten, Ma pa ava ga mainge kaugu tinata na varpit,

²⁶Io, iau bula ina nonganongon ure ra kaina magit ba na tadav avat; Ina varvaula ba ra magit ava burutue na tadav avat;

²⁷Ba nam ra magit ava burutue na tadav avat da ra ngala na vuvu na bata, Ma ra vinirua na tadav avat da ra kalivuvur, Ba ra kinadik ma ra nginarao na tadav avat,

²⁸Ta nam ra bung diat a kail tadav iau, ma pa ina torom ta diat; Diat a ongor upi ra tinikan upi iau, ma pa diat a na tadav iau;

²⁹Tago dia ga milikuane ra minatoto, Ma pa dia pilak pa ra variru tadav ra Luluai;

³⁰Pa dia ga mainge kaugu varvateten, Dia ga pidimuane ke kaugu varpit par;

³¹Kari diat a ian boko ta ra vuai kadia mangamangana iat, Ma diat a maur boko ma ra lavur nuknuk i diat iat.

³²Tago ba ra umana tuptup dia vana irai diat a virua tana. Ma ra kini vakuku kai ra umana papaua na vamutue diat;