HEBERU 12

1

2

3

4

5

6

7

8

9

10

11

12

13

¹Taunabunai, herarai taudia hutuma bada ese e ḡeḡeda ahumu dainai, e hametaudamu ḡaudia idoidiai bona e kahuda taomu karadia dikadia baita ato tabe, bena heau-helulu vairadai e hure na baita heau mai haheaukada ida.

²Iesu baita raraia tao; ia ese eda abidadama e havaraiamu bona e haḡuḡuruamu; ia danu vairanai e hure moalena dainai satauro e haheaukalaia, hemaraina se laloa, bena Dirava ena terono idibana kahana ai vada e helaimu.

³Kara dika taudia ese e inai henia, a ia ese e haheauka henidia. Una na ba haeroa, lalomui bae hesiku na garina, laumamui bae manori na garina.

⁴Umui na kara dika ilao-ahuna o goada-laiamu; to do asio laoa ahu ela bona raramui e hebubu.

⁵Hahealo herevadia vada o lalo boio a, tamana ese natuna e sisiba henidiamu na heto e sisiba henimuimu, e tomu, Natugu e, Lohiabada ena mata hakani basio dadaraia E sisiba henimumu negadia ai danu lalomu basine manoka.

⁶Badina be Lohiabada ese e ura heniamu tauna matana e hakanimu, Bona natuna ai e halaodiamu taudia iboudiai e dadabadiamu.

⁷Benaini, mata hakani ai ba haheauka; Dirava ese e karamui natu-adora heḡereḡeredia. Badina be edena mero na tamana ese matana se hakaniamu?

⁸Natu iboudiai matadia e hakanimu: bema oi na lasi, oi na ariara merona, dia natu-adora.

⁹Ina danu: tamada ina tanobada ai ese matada e hakanimu, bena ta matauraidiamu; matona, laumada Tamadia na basita matauraia a, bena baita mauri?

¹⁰Badina be idia ese dina dia hoho ai matadia e hakaniva, edia ura heḡereḡerena; a ia ese matada e hakanimu ita ihanamoda, ia ida baita helaḡa hebou helaoreana.

¹¹Ina harihari mata hakani na asi ena moale bona mai ena hisihisi; a gabeamo vada e hamanadadia taudia ediai huahuana do baine dobi, kara maoromaoro ena maino.

¹²Taunabunai, imamui eme heveri ba toi roro, bona aemui eme pada ba hahedai.

¹³Aemui edia dala maoromaorodia ba kara, bena ae-hedairike na basine heride, a baine namo.

¹⁴Maino ba ḡavaia, taunimanima iboudiai ida; kara helaḡa danu, badina be basine abia tauna na Lohiabada basine itaia.

¹⁵Nahuamui ba toho, ta ese Dirava ena harihari-bada baine reaia na garina; eiava ramu iditana ta baine kobo na garina, bena baine haturiamui, bona hutuma baine hadikadia;

¹⁶eiava bogaragimui ai tau ta baine heuda hanai na garina; eiava Dirava basine matauraia, Esau heḡereḡerena, ia ese Dirava se matauraia a ena roboa ahuna na nau tamona e hoilaia.

¹⁷Badina be umui na dibamui, ia na gabeai hahenamo iabina e urava, to vada e dadaraia; ena be mai iruru-matana ida helalo-kerehai dalana e tahua, to se davaria.

¹⁸Umui vada o raka henia kahi gabuna na dia ba daua toho ḡauna, dia lahi hururu-hururuna, dia dibura bona dagadaga bona lahi badana,

¹⁹dia kibi reḡena bona gado. Una gado erena e kamonai taudia e noinoi, basine hereva henidia lou eto,

²⁰badina be asi edia haheauka una hahedua bae badinaia, eto, Mauri ḡauna ta ororo ai baine kau, nadi ai ba hodoa mase.

²¹Bona ita-itana na mai garina dainai Mose eto, Name gari, name heudeheude.

²²A umui vada o raka henia kahi gabuna be Siona ororona, Mauri Diravana ena hanua, guba Ierusalemana; aneru diaḡau duahi-duahi e heboumu gabuna;

²³hegogo badana, natu roboadia, ladadia guba ai e hetore taudia edia ekalesia e moale heboumu gabuna, taunimanima iboudiai edia Hahemaoro Diravana dekenai, kara maoromaoro ai vada e ḡoeva-dae taudia laumadia dekediai;

²⁴bona Iesu dekenai, ia na taravatu matamatana ena herohemaino tauna; bona vada e nevarilaia rarana enai, ena hahenamo ese Abel rarana ena e hereaiamu.

²⁵Nahuamui ba toho, e hereva henimuimu tauna ba dadaraia na garina. Badina be tanobada ai e sisiba henidia tauna e dadaraia taudia na asi edia roho mauri dalana; benaini, ita na guba amo e sisiba henidamu tauna baita dadaraia, ede baita roho mauri tonma?

²⁶Una negana ai ia gadona ese tanobada e haheude-heudea; a harihari eme gwau hamata, e tomu, Nega gabena ai dia tanobada mo to guba danu baina haheude-heudea.

²⁷Una hereva “nega gabena” anina binai: haine haheude-heude ḡaudia baine abi oho, e kara ḡaudia bunu; a basie heude-heude ḡaudia na do bae mia.

²⁸Taunabunai, se heude-heudemu basaeiana na tame abia dainai, Dirava baita hanamoa, bona baita toma henia diho mai hematauraida ida bona mai garida ida, ia ihamoalena.

²⁹Badina be ita eda Dirava na lahi ḡaraka-ḡaraka.