IBRANIYIIN 12

1

2

3

4

5

6

7

8

9

10

11

12

13

¹Wakan, me’d jin ’kamkunu ana ki deḵ ka dhana raḵ gi iman/o gwo mo tani dhalki ana si’da/ ṯẖadha aris tom bana ’baar mo kun diṯadiṯ ka ’deṯe/ ’deṯe/ mo dhali miinthus kun tana junyu/ ki ana ki ’dish ’dish mo dhali dhalki ana sona ki bwa jin ’kuc̱u ki ’kari’th mo mmop̱ar sho’k mo gom to jin di’da bori ana mo be,

²mmohil ’kup̱ ka Yesus mo a’di jin ta’da ’kaŋ’kup̱ mo dhali a’di jin midi thim moŋgam gwo is bana mo, ma a’di gom moŋ’kuny bwa jin diki’da bori a’di mo tani a’di ’dimki ’kup̱ mo gom cwany’ciṯẖan dhul mo mmoruḵkina a’di mo jin ’thenu is mo dhali a’di c̱a’bki’d ki me’da bim poros ma ḵursi ma Arumgimis mo be.

³Nyiṯẖi/ a’di mo, a’di jin ’dimki ’kup̱ mo ’peni imanmii miinthus mo kun ta ’kup̱ ki ’kup̱ ki a’di kan ap̱o/ a’di mo, wakan ki um mini ’koki ca mo e mo jin wunu is e mo walla eya dum bum jin mina buye/ i’thi mo.

⁴E mom bum jin askina uma shir shir ap̱o/ miinthus mo tani um ’koki ro’c a’di naskina/ mo mmop̱u’d mo e shushan mii jin mina umi wola bas buma ’cesh mo be.

⁵A/dhali um ŋaki mo jin malasu um mo jin yuḵkunu um ki iya/ mowa? mmo/o gwo mo ki: Ya/m pem dhalku/ ki halip̱a jisa jin yedha Tap̱a /e sho’k mo walla dhalku/ ki sul mo jin ’bidhu /e adu is mo ki /e c̱inuwa jisa ki a’di mo.

⁶Haali/ Tap̱a a’di ki c̱iya jisa jin yedhu wathi/ sho’k mo a’di jin ena a’di mo be. dhali dor aris iya/ ka ’deṯe/ ’deṯe/ mo, uni gun bu’thkina a’di mo be.

⁷A’di ta’da jisa jin yedhu wathi/ sho’k mo jin mina umi mii ’dim ’kup̱i cine/ mo be. Arumgimis miiki um mo me’d iya/ mo. Haali/ ya/ jana ŋala/ di’d jin dina com ki c̱iya jisa mo?

⁸Waḵki/ um dhalu ki dar ga jisa jin c̱inu mmoye’th um sho’k mo tani, a’di jin pwaḵkunu mo gom ’kwani ’baar mo tani, wakan um ta uc̱i kun ’kon ki lac̱a/ mo dhali um ’koki ta iya/ mo be.

⁹Ki gwo yansan jin ’ce’de’d ap̱o/ mo tani ana takina gi ibabam bana mo e mony’cesh mo mmoc̱i ana ajisa mmoye’th ana sho’k mo dhali ana taḵkina uni mo be. Dhali bunya/ mina ana ’koki ’dap̱ ’twa/ mo eya Babam bana gi ku gi shi/in mo dhali ’ko mowa?

¹⁰Haali/ uni c̱iki ana ajisa jin yedhu ana sho’k mo ki ari mo mo me’d jin ona bwa uni mo. Hili Arumgimis c̱iki ana ajisa jin yedhu ana sho’k mo gom mom’boro’d bana mo, ki ana mina pwaḵ mondhelel piti mo be.

¹¹Gom ari mo mo tani arisa jisa kun c̱inu mmoyetha ye’th sho’k mo tani wana e ki jin ’koshu ka nyor mo, ma mmodhal bwaŋ ’kunyga/ e i is mo. Yan’ko’d mo tani a’di ki gwono’d maman gi mo ma ḵar/e mo jin ta mo ma ḵu’th is mo e uni gwansan kun ye’thkina a’di sho’k mo be.

¹²Wakan ’deki me’d bum kun ’kon ki p̱olkon mo dhali ’bithi ’kup̱a’dup̱un bum kun miin ki ’ka’da/ ’ka’da/ mo

¹³dhali dhuyi bway tur ka ji sho’k gom sho’k bum mo, wakan ki a’di jin ta ŋwol mo tani minu ’taki ’koki kar ka pije/ ’peni gwocor mo, hili mmodhal mii e i is mo mmowac̱a/ wac̱ mo be.

¹⁴Biriya bir mo gom moŋḵu’th is mo nyaḵka ris ’kwani ’baar mo dhali gom mo ma dhelel mo, a’di jin mola wathiŋ kamu/ p̱ar Tap̱a e ki sule/ mo ki dar gi a’di mo be.

¹⁵Mishi gwo ’ban mo ki wathin ṯal ’deŋ kamu/ midi diki ush me’d mo mmobudha ’the ma Arumgimis mo, dhali dar gi mo ma birman jin ḵa/aḵa/ mo mmo’ka ale/ mo dhali raḵ monṯo’c bwa mo dhali ki a’di mo tani aris ’kwani ka ris warkin ki uni kun shi/u is mo be,

¹⁶dhali ki wathin ṯal ’deŋ kamu/ midi diki mii mii jin miinu miinyc̱al mo walla diki dhu mii kun ḵogu mo, me’da Iisu mo, a’di jin yolki mo ma bwanyaram piti ki tonṯe/ jin shwanu ’te/ mo be.

¹⁷Haali/ um mishkin ŋ’ko’d ki a’di ona bwa ki mal gi mom’bor mii mo tani a’di waḵkunu mo haali/ a’di diki gam bula kamu/ mmorica du is mo, ba a’di ŋap̱ki a’di ki bur bur ki jabu’th mo be.

¹⁸Haali/ um ’koki p̱u’d mo e wosh jin minu ta is ki me’d mo, a’di jin ta o’d jin shwa’d ka le’d mo, dhali mondhurumi’d mo dhali mondhurumi’d jin ’ceṯẖki’da ’tum mo dhali ap̱unthar jin ’theḵi’d mo

¹⁹dhali ko ma poome/ mo dhali ’twa/ jin ta gi gwo kun ṯu’c imanciḵ uni mo mmodoṯ gwo mo ki gwo gwansan minu ’koki oku/ ki thatha/ thatha/ mo gom uni mo be.

²⁰Haali/ uni moli ’dim ’kup̱ moyi gom gwoŋḵan yan jin c̱ikunu mo jin o gwo mo ki: Waḵki/ isi kani tombwaasho midi mumbur wosh yan ki is mo tani a’di minu ’kosh ki wosh mo be.

²¹Ka jiŋ gana/ nyc̱a/, wakan mo, mo jin ḵoguwa ḵo/ is diki’d mo e bwambori jis/em piti mo ka Musa o gwo mo ki: Aha/ deekina is mo ki moŋḵo/ is kagahara mo be.

²²Hili um p̱u’dkin mo e ’Kuwosh ma Sihyuun mo dhali e ’peŋkuman Bampa/ ma Arumgimis jin di ki e mo, a’di jin ta bampa/ gi momis jin ta Pa Urushaliim mo, dhali eya ris iman’doyu gwom piti kun molu deŋ e mo eya dhana tul ’kup̱ kun tula uni is mo be,

²³dhali eya dhana tul isa kamu/ gom uni kun tana bwanyara/ mo, uni gun ’kwarkunu gway mo eya warka/ gi momis mo, dhali eya Mandwall gwo mo a’di jin ta’da Arumgimis gom ’kwani ’baar mo, dhali eya ris shi/in gi ’kwani kun tana ḵar/e mo kun dhunu ki ku gun iskin mo,

²⁴dhali eya Yesus mo, a’di jin doshki’da galany mo gom gwo jin ta jin this jin gamu me’d mo, dhali e mo jin ḵukuskunuwa bas mo jin onu gwo ki o ma aane/ mo ka bas yan bol ji ma Habiil e mo be.

²⁵Hili um ki ’bore/ mo. Dhalki a’di ki ush mo, a’di jin ṯorki um gwo mo. Haali/ waḵki/ uni ’koki ye mo ki uni ushki a’di gwo mo, a’di jin rumki uni ki gwo mo e mony’cesh yan mo tani ba ana bala mina ye kata mo waḵki/ ana mina waḵ a’di mo, a’di jin rumki ana ki gwo mo ’peni momis mo?

²⁶’Twam piti a’di yiḵinki mony’cesh is mo me’dyin mo. Dhali hili shwane/ a’di oki gwo is mo mmo/o gwo mo ki: Aha/ doḵ/e mina yiḵin jasi mony’cesh is mo yisa, hili si’da/ momis mo be.

²⁷Gwo gwansan kun on ki: Aha/ doḵ/e mina, ba/ tani uni ’kayi gwo ’kus mo goma joc̱ jin joc̱u/ mo gom is jin yiḵinkunu mo, me’d gwo jin onu gom to kun uḵkunu mo, ki mii gi wakan mo tani ki to kun molu yiḵin is mo tani mini ’taki ’ko mo be.

²⁸Wakan mo, dhalki ana tana gi mo jin ’boruwa ’bor bwa i is mo gom mmobu’th ’peŋkuman bampa/ jin molu yiḵin is mo dhali wakan dhalki ana c̱ina Arumgimis mo jin luŋuwa luŋ mo jin mishu bu’th mo ki mo jin tuḵuwa tuḵ mo dhali ki moŋḵo/ is mo.

²⁹Haali/ Arumgimis bana a’di shwa’d ki o’d ki bar bar mo be.