1Wiʒec guru sâko iŋucnezi karorac tinac erâ orâŋ‐nâpoŋgopieŋte wiac bâmâc‐nâpoekac i hetera‐fârenʒepeneŋ, â sâqocnere muczi fâfâc‐nâpoekac i wâc hetâcnenʒepeneŋ, ehuc hata nâwotukicne ira tatakic tâmiric gagasac jaha ranʒepeneŋ.
2Ehuc Jesu, mamanasiŋte micne bapa â mamanasiŋte fârine bâbâfua, erao findendeŋnehuc junʒepeneŋ. E ʒeri bubiaŋ fuacneocte mukicne irec manasuhuc maripoŋte ʒâic manawec â mimi faio fefe mana suawec. Iŋuc erâ Anuture ŋeŋefuŋko mefârenao fewec ŋekac.
3Sâqocne bapa jaŋe mukac mupe mo iŋucne ecnepie mana‐bipierâ sanaŋkewec, ŋoŋe ere hâcne manasuhuc mi takirepie maŋŋeŋic betaŋkezejec.
4Ŋoŋe sâqocnezi herokawec‐ŋopazo eme samandiŋkerâ sahac‐ŋeŋic bapie wozeme dodoma, i juwarehuc iŋuc sâcne mi embiŋ.
5Erâ dâŋ moc “ŋokâ” muŋarehuc faŋ qaŋarekicne fokac irec nikec‐ŋopawec me? Dâŋ ʒiŋuc: “Ŋokâ‐nane, Wofuŋzi bâtiŋgume manatec wawahane mi ezejec, â bâʒâicgume maŋge mi rokawezejec.
6Wofuŋ e ŋic moc jauŋkezo murâ ba bâtiŋ ecneekac, â ŋic fuŋfuŋfâcne bacjopahuc qa qâtiŋ ejare‐fâreekac.”
7Wofuŋzi ba bâtiŋ eŋarezo mume hâbi‐ŋeŋic mi ŋeŋgoroŋkezejec. Anutuzi honec‐ŋopame naru motecfâc‐ticne epie iŋuc hâcne eŋareekac. Me mo mamaczi ŋokâ‐ticne ba bâtiŋ mi ecneocmu?
8Ba bâtiŋ i ŋic gâcne sasawa ejarewec, eme ŋoŋe i tâmiric jupie ine naru motecfâcne mâcne, fiuckonec fuakicne muŋarezo.
9Erâ moc mupe: Mâreŋ mamacfâc‐nâŋec jaŋe qa bâtiŋ enârepie araŋ bajare jumbeneŋ. Eme qâqâtâcte Mamac e araŋ baʒihuc bacnepene sâckeocmu. Iŋuc ehuc juhâmonaŋmu.
10Jaŋe mamana‐jeŋicte sâc jara dameŋ bembeŋne sawa qa bâtiŋ enâre jumbieŋ, eki ine wiac fârine fua‐nâreocte enâreekac, e jahacne tiri jujuo ʒuhuckenaŋte hâcne.
11Bâbâtiŋ fuaocmu sâc i qanaŋ manapene bubiaŋhec mi ehuc busâqochec eekac; â ʒâhecko ine bâbâtiŋko juhuc sanaŋkeeŋgopieŋ jaŋerao fârine wamane fuaekac, ʒâŋene bahac fâsâc juju.
12Eme ŋoŋe meŋeŋic betaŋkekicne â hoqaŋeŋ‐ŋeŋic ŋetarakicne, irec âte tiŋnehuc sanaŋkenʒepieŋ.
13Ehuc hata bâʒâwepie wiŋkeme ŋoŋeraonec puriŋ ekicnezi ira qac qâsoric tâmiric âte rahuc biaŋkenʒepieŋ.
14Ŋoŋe ŋic mâmâc sasawa jaŋehec wamao jujure giene banʒepieŋ, erâ maŋfuru erâ juniŋte henʒiriŋnenʒepieŋ, maŋwânâŋhec juku Wofuŋ hohone i mi fokac.
15Ŋoŋeraonec moczi Anuture aki anonoc ririzacte soŋaŋ babac enʒepieŋ. Erâ ŋondeŋ‐ŋeŋicko ʒâŋ opac moczi gitec herâ ʒacŋopame sâqorenʒipiŋte rucŋeŋic banʒepieŋ.
16Erâ ŋoŋeraonec moczi Esaure hata mi âtehuc sasecŋic â ŋic araŋ bapa tâmiric mi ezejec. E nânâ mocjaha mac irec erâ mârâc fufuare merâfâc qikiŋnewec.
17Ŋoŋe ere manaeŋgopieŋ, e ʒâhec jambuŋ rozo mume sakarecnekicne. E wiac ewec i suame arictac eocte kio‐bipiehuc emâmâŋkewec.
18Ŋoŋe tiki moc ba bâuac eene, ʒocbâruŋnehec ira mi ra fisimbiŋ, erâ hâweŋ, dapâc â mâŋâŋ ʒâʒâkiriŋne irec maŋnao mi raʒimbiŋ.
19Erâ qeŋfânâŋ sâko â dâŋowa i wâc mi manambiŋ. Manambiŋzi dâŋ niniŋkeocte numu huacbuc embiŋ.
20Dâŋ kecʒiŋuc mukicne, irec manapie hâhâwicne ewec: “Qowi tiki âteuame qânâzi hehâmozo.”
21Wiac i bipic tataranehec fuakume Mosezi muwec: “No hâwicnume ɋarac ɋarac qakopac.”
22Ŋoŋe tiki iŋucnao mâcne, ŋoŋe Zioŋ tiki, Anutu jujune ere hae sâkoo, sambâŋte Jerusalemko fisimbiŋ. Ehuc aŋelo mi wowosec‐jopane â ʒeri tutumaŋ sâko
23â fuŋfuŋ gurufâc‐ticne ʒâŋejeŋic sambâŋko qâreŋkekicne jaŋe hâcne maic‐jopambiŋ. Ehuc Anutu, ŋic sasawa nâŋâcne mumutara maickembiŋ, â ŋic tiŋne furu bacjopakicne qâqâtâcfâc‐jeŋic jaŋerao ʒuhuckembiŋ;
24â Jesu, ʒâʒâfic ɋâricnere jâcne, erao fisirâ rurua soc maickembiŋ, soc izi Abe socticnezi wira wâwâsic ewec iŋuc mâcne, sâc moc wira wâwâsic eekac.
25Ŋoŋe dâŋ ŋazaekac e râpeckenʒipiŋte ruc bahuc junʒepieŋ. Mârâc jaha mâreŋko waharâ dâŋ jazame qikiŋnepie okacne fisi‐jarewec. Eme ʒi sambâŋko juhuc dâŋ nâzâekac, e râpeckerâ wemocko okac tâmiric junaŋmu.
26Mârâc jaha dâŋ mume mâreŋ qiriŋ qawec. Eme ʒi ine dâŋticne ʒiŋuc fokac: No juku mâreŋ mocwâc itiriŋkehuc sambâŋ mâmâc itiriŋkepemu.
27Mocwâc itiriŋkepemu, iŋuc muwec, ine wiac bâfuakicne i itiriŋkeme ŋerisieocte manasuhuc muwec. Ŋerisieme fofo sanaŋ i fuarâ qiriŋmâc fozokac.
28Nâŋâc uucmaŋ moc qiriŋmâc fofo sanaŋ rauckenaŋmu, irec Anutu mucne bacnenʒepeneŋ, ehuc rumerâ araŋ bacnehuc, jahac maname biaŋkeekac irec sâcko kiŋaŋ qacnenʒepeneŋ.
29Ehuc ʒiŋuc mananʒepeneŋ: Anutunâŋec e ʒocbâruŋ iŋucne.
