1Mo hande amba꞉ haeme wanda꞉halita꞉ ameta꞉ niki hopa꞉liao koa leke haleme ekima꞉ta꞉ ika꞉ hone tulaemekeeki niminaa tiaasememe. Kutu peleke handaata꞉ do ame haloma꞉ wanda꞉hali nikita꞉ pa eki pumana꞉pe. Do haumanu pumana꞉e. Mo niki miniki hata꞉ me̱i̱me̱i̱ liaasa꞉ alemanu paeyao make pa mo ta̱la꞉ pelia hasa꞉ hoke haumanu paeyao londa꞉la꞉ mipi bao pomana꞉e. Kutaata꞉ mo Koda꞉ma꞉ peomono yeke telipala꞉ a̱i̱ya꞉ pula꞉ hauna꞉ta꞉ nika꞉ puki hana꞉ noka꞉pa hao hamana꞉e.
2Kutu puluekema꞉ta꞉ kota꞉ Yesuta꞉ nika꞉ hone tulaasa꞉ ekina꞉ kini pu mea pua ana꞉ lawalo pa꞉la꞉ teke hali hala꞉ ekina꞉ ipiki homeke handa꞉ paleke pomana꞉e. Ipikana꞉ma꞉ mo hande a꞉ka꞉tei wape piki ti yeke handaata꞉ pa pina꞉ na kiaeyekeme. Dia꞉me. Ipika꞉ pua mulu pieke ta꞉na꞉ma꞉ homa꞉la꞉ hau tieke handeeke ekima꞉ mo hande a꞉ka꞉tei wape piki tina꞉ homa꞉peke ekina꞉ yaala꞉ mea꞉peke ekina꞉ta꞉ hone ma꞉nda꞉ na wiekeme. Kutaa ameta꞉ ipikana꞉ma꞉ Koda꞉na꞉ pila꞉ ale tieke popeke nanema꞉ tilao pila꞉me.
3Ipikana꞉ma꞉ a꞉pa mieke ka꞉nda꞉ tiekemanu hone umana꞉e. Mo hoke hau pu haemeke wanda꞉halima꞉ ipiki pa꞉ta꞉ honditi pimikieki manuta꞉ pa hone yonka꞉latiki piekeme. Koto piekeeki hone witolo hata꞉ soka꞉la꞉ma꞉ homo pututuma꞉ na homo hapa꞉peke. Pa ekipeke.
4Mo hoke hau ame̱le̱ a꞉nda꞉ta꞉ pelemepate mo a꞉nda꞉ pelemeeki peneme yaena꞉ta꞉ ika꞉ lokena꞉ we a꞉nda꞉ na yapa꞉la꞉me.
5Ikita꞉ Koda꞉ma꞉ ipika꞉ wekiwandiki hamena꞉ laata꞉ do hone u tiaasa꞉ pimanu la ku hala꞉ ekita꞉ na niminake yonka꞉lalemepe. Ipikana꞉ma꞉ dupa la꞉la꞉me. Ya wekio. Mo Tekehalima꞉ neke tikitiki yaena꞉ pita꞉la꞉ ekita꞉ hone wopu wia꞉peke. Kutupa ipikana꞉ma꞉ neke hando lea꞉ka꞉na꞉ta꞉ kota꞉ kima꞉ na homa꞉peke.
6Pa ekipeke. Mo Tekehalima꞉ ipika꞉ pukima꞉ homa꞉la꞉ wanda꞉hali paeyao tikitiki yao haena꞉ la꞉la꞉me. Kutupa mandane wanda꞉hali ipika꞉ wekiwandiki haena꞉ laata꞉ ka꞉nda꞉ homa꞉ tiatiki pu hala꞉me ala꞉me.
7Ka꞉nda꞉ma꞉ homa꞉la꞉ ekimanu iki pa꞉ta꞉ epea꞉ka꞉na꞉ta꞉ do ka꞉nda꞉ta꞉ mo atekema꞉ ipika꞉ weki epeaasa꞉ ka꞉nda꞉e laa puki hana꞉ noka꞉pa꞉pa꞉peke. Mo ika꞉ mineleme ka꞉nda꞉ma꞉ta꞉ Koda꞉ma꞉ iki ipika꞉ wekiwandiki hamena꞉ la꞉la꞉eki peneme yaasa꞉me. Amba꞉ta꞉ apa꞉ amedama꞉ yombu tikitiki na yaeyeke wekita꞉ ma꞉nda꞉ hayeke yekea.
8Ikita꞉ ika꞉ Apa꞉ Koda꞉ma꞉ mana꞉ laa tikitiki yao hamena꞉ la꞉la꞉ wekiwandiki na haemeka꞉na꞉ta꞉ kota꞉ ikita꞉ ota꞉ halina꞉ wekiwandiki dia꞉me. Ikita꞉ pake wekiwandiki haleme ekita꞉ peneme ya꞉la꞉me.
9Nika꞉ kenke apa꞉ amedama꞉ niki epeaaluekema꞉ yombua꞉tiki pimikita꞉ tanda naa kone ika꞉ kakena꞉ homa꞉tiki pu haoma꞉me. Mo nika꞉ kenke apa꞉ pa꞉ta꞉manu kutu pumeke handaata꞉ kota꞉ mo nika꞉ temoko handeteke hala꞉ Apa꞉ pa꞉ta꞉ta꞉ homu pea hata꞉ ipika꞉ da꞉ta꞉la꞉eki miniki hamana꞉ pea꞉peke alee.
10Nika꞉ kenke apa꞉ amedama꞉ bapi wopuna꞉ niki panisi na peatiki pimipate pa ika꞉ hone pieke tupa꞉ peatiki pimikime. Kutu pimikipate Koda꞉ma꞉ta꞉ niki epeomono yeke niki homeke hone witolo hata꞉ panisi peatiki pu hala꞉me. Koto ekina꞉ teketa꞉ nikana꞉ma꞉ ipika꞉ yako piki hau tieke putupa mea halumeke.
11Yombita꞉la꞉ hauma꞉ta꞉ niki ta꞉na꞉ na pealo pa꞉la꞉pate kota꞉ koto pita꞉la꞉ hauma꞉ tikitiki yaeya꞉ wanda꞉hali ikita꞉ wetepena꞉ mo tikitiki piki hauna꞉ homu pea puki lopao hasa꞉ kilikimanu milimikie.
12Ika꞉ lupa wiki kikimanu mea a꞉meiyao tindipa liao make ika꞉ putuputu liki anke yaapo make tindipao da̱o̱la hapa꞉peke.
13Kutu pimika꞉na꞉ta꞉ kota꞉ mo ika꞉ dola꞉pake peleme anketa꞉ ota꞉ hoena꞉ dia꞉ ya꞉la꞉pate epena꞉ta꞉ mo tikitiki piki pota꞉ manuna꞉ pu hapa꞉peke.
14Wanda꞉hali paeyao ame̱le̱ a꞉nda꞉ pelia haluekema꞉ taapo hapa꞉peke. Kutaata꞉ ika꞉ halo pelemeeki tonka꞉na꞉ yako peao haluekema꞉ taapo hapa꞉peke. Pa ekipeke. Koto hau na piki wanda꞉hali homeke a꞉nda꞉ma꞉ta꞉ mo Tekehali ota꞉ na handilimikie.
15Koda꞉na꞉ a꞉ta꞉ma꞉ homa tamba꞉ mina꞉la꞉ hau pa꞉ta꞉ hoki walaapa꞉na꞉ma꞉ wopu handeteke hapa꞉peke. Iki homeke ma꞉nda꞉ma꞉ ipika꞉ puki pa꞉ta꞉ ka꞉ta꞉pa wilie titi peaasa꞉ ale ma꞉nda꞉ pa opa daeyaena꞉ alo hata꞉ iki paeyao hoeyaapa꞉na꞉ma꞉ wopu handa꞉ paleke hapa꞉peke.
16Iki homeke ma꞉nda꞉ma꞉ yola꞉la꞉ hau pilimina꞉ma꞉ wopu handeteke hapa꞉peke. Amba꞉ Isoma꞉ mo hande hoto homeke napeke ne hambolo hata꞉ ipika꞉ mupeke wekima꞉ mia꞉peke anke teketa꞉ Koda꞉na꞉ hau pa꞉ta꞉ hone na witolo hata꞉ ma꞉nda꞉ pa꞉ta꞉ pa haleeke hau leke na pia꞉pa꞉peke.
17Isoma꞉ pieke ekita꞉ hone wilimime. Ipika꞉ apa꞉na꞉ epeaasa꞉ la꞉ wita꞉la꞉ ekita꞉ wetepena꞉ muluekema꞉ peekepate na miekeme. Mo epeaasa꞉ hau kina꞉e hone witolo ipika꞉ apa꞉ pa꞉ta꞉ pua e̱ alo alo hata꞉ honke leekepate atekena꞉ hone topo pina꞉ pia꞉peke hau ma꞉nda꞉ na handa꞉ wiekeme.
18Ikita꞉ mo hande Isulai wanda꞉halima꞉ ota꞉ wataapeke yeke Sainai pote pa꞉ta꞉ opolo epemeke tupa꞉ na opolo epelememe. Koto Sainai pote pa꞉ta꞉ ti uleke tieke make timba꞉ make timba꞉ ki tieke make po tilipu tieke make
19bu kanake lita꞉la꞉eki make pi ho̱la̱꞉make tieke make koto hau paeyao pa꞉la꞉ pote pa꞉ta꞉ta꞉ iki na opolo epelememe.
20Isulai wanda꞉halima꞉ mo hande pi ho̱la̱꞉make leekeeki opuata꞉ yaapo peao paa na opuomonoe laa honke lemekeme. Koto paa na opuomonoe laa honke leeke hauna꞉ teketa꞉ mo hande pi ho̱la̱꞉makema꞉ alo hata꞉ alota꞉ Iki make ika꞉ puneleme alemanu ma꞉nda꞉ma꞉ make mo pote wataemeka꞉na꞉ta꞉ toopima꞉ lu homaena꞉e laa la꞉ wieke ekina꞉ paala꞉ma꞉ homolo hata꞉ lemekeme.
21Mo potena꞉ ta꞉ta꞉ piki paala꞉ tieke piki haumanu piekeeki Mosesima꞉ handolo hata꞉ alota꞉ I̱ paala꞉ pitolo hata꞉ pututu tieke pa꞉la꞉me leekeme.
22Ikita꞉ koto paala꞉ piki pote pa꞉ta꞉ na opolo epemekepate pa mo Saioni pote pa꞉ta꞉ mo deto hala꞉ Koda꞉na꞉ da teke nane opolo epelememe. Koto data꞉ hepeni hala꞉ Diutuseleme dae. Koto pa꞉ta꞉ta꞉ mo enisolo daoseni eleke eleke tonu ame̱le̱ ta꞉na꞉ma꞉ homa mombolo halememe.
23Ikita꞉ Koda꞉na꞉ mo hepeni nane biki wape pa ula꞉ titina꞉ haemeke wanda꞉halina꞉ momba꞉la꞉la꞉ eki pa꞉ta꞉ make mo wanda꞉hali paeyaona꞉ pi yokaalu pulu pa꞉la꞉ Koda꞉ pa꞉ta꞉ make mo amba꞉ titina꞉ haemeke tikitiki piki wanda꞉hali epeaeyeke temokomanu pa꞉ta꞉ make opolo epelememe.
24Kutaa make ikita꞉ mo panake pi la꞉ ula꞉ ekina꞉ ka꞉pa hali Yesu pa꞉ta꞉ make ipika꞉ tunkula꞉ pa pa pu lopeeke wema꞉ta꞉ mo hande Eipolona꞉ we ota꞉ lombei piki la꞉ wita꞉la꞉ we pa꞉ta꞉ make opolo epelememe.
25Mo iki pa꞉ta꞉ pi ala꞉ somena꞉ pita꞉ na kiaake yopusiki hata꞉ opua꞉pa꞉peke. Mo hande Koda꞉ma꞉ la꞉niaeyeke pimanu la꞉mea halao haemekeeki na opimiki wanda꞉halita꞉ Koda꞉na꞉ hoeyaasa꞉eki na wendimikime. Ikana꞉ma꞉ na wendimiki yeke handaata꞉ nikana꞉ma꞉ oli hepeni nanema꞉ pi la kita꞉la꞉ hali hoki walaa kiaoma꞉ka꞉na꞉ta꞉ kota꞉ niki make ota꞉ na wondulumeke.
26Amba꞉ koto hande toma꞉na꞉ta꞉ ipika꞉ pi ho̱la̱꞉makema꞉ do kenke la꞉ma꞉ la꞉ma꞉ peayekepate paa ameta꞉ ipikana꞉ma꞉ pi la꞉ witolo alota꞉ I̱ma꞉ hoto homeke ma꞉nda꞉ make do kenke paa la꞉wa꞉ peaoa꞉ka꞉na꞉ta꞉ kota꞉ oli hepeni make la꞉wa꞉ pealueke la꞉la꞉me.
27Koto hoto homeke ma꞉nda꞉ make laa la꞉ ula꞉eki pitolota꞉ kota꞉ mo la꞉wa꞉ pea꞉peke na ya꞉la꞉ alemanu homeketa꞉ pa u pelia haena꞉ta꞉ pa mo wepia wina꞉ la꞉la꞉ alemanu paeyaota꞉ la꞉wa꞉ la꞉wa꞉ peao hoelo baalo pa꞉la꞉ ekina꞉ peneme yaasa꞉ pi la꞉la꞉me.
28Koto pa꞉la꞉pate nikana꞉ma꞉ mo la꞉wa꞉ la꞉wa꞉ peaapeke na yolo pa꞉la꞉ kilu tombuao hala꞉eki moloma꞉me. Koto poloma꞉ ekina꞉ta꞉ Koda꞉ma꞉ ta꞉na꞉ma꞉ homena꞉ nikana꞉ma꞉ ipika꞉ biki mea a꞉meiyaaso hata꞉ keiyae pi lomana꞉e.
29Nika꞉ Koda꞉ta꞉ ota꞉ hoeyaasa꞉ ti tala꞉eki ya꞉leke handaa ipiki pa꞉ta꞉ paala꞉ma꞉ homa panda꞉ pea hata꞉ ipika꞉ biki mea a꞉meiyao hamana꞉e.
