1Endakali wamba lumu dupame kopa andake mendeme naima sanga pili petala masoo miningi mana doko naima laitaka pilyamo. Dopana, naima pyalya minilyamo dupa pitakapi koo naima-kisa andinyingi dupapi dupa naimame yakinapenge. Naimame naimanya mona doko kyoto jetala Goteme lekeleke tao kalyepape leamo dokonya lekeleke tao katamana.
2Jisasa baa naimanya masoo miningi tenge dokona, naimanya masoo miningi doko etete angi injisekelyamo. Naimame baa kanjakao kandatae katamana. Wamba Jisasame mona yaepenge doko maitakao nyotona lao kyoto joo katapala baa tanda nao ita pokonya kumia-pyaa. Baame ita pokonya elya doko angi mende daana lao masia-pyaa. Indupa Gotenya petenge toko dokonya kingi tolaetena kalyamo.
3Nyakamame dake masokondape pyepape. Koo pingi endakali dupame Jisasa etete yanda pimaiyaminoaka doko, baa etete kyoto joo katea-pyaana doko nyakamame masalapape. Dopana, nyakama maka kayapala nyakamanya mona tambi laa nayalapape.
4Nyakamame koo dupa ita minao yanda piaminoaka doko, nyakamanya taiyoko ipatala naya.
5Nyakamame nyakamanya mona kyoto jakatona lao Goteme pii leamo doko kame silyamino. Nyakama baanya wane jilyaminona lao baame lao pituu, “Nambanya wane emba tolasoo Kamongome pilyamo doko angi mende daana lao masala nayape. Baame emba kenda pisoo tolasetamo dokopa emba mona kumala nayape.
6Kamongome endakali mende auu kaelyamo kandao dokonya mana doko baame tolasakamaingi. Dee endakali mende baame lanyepala baanya wanena lelyamo kandao doko, baame pyalanya lao mana lengeakana,” lea-pyaa.
7Goteme nyakama tolasina lao nyakamame yapa maka nakayalapape. Goteme nyakama baanya wane joo mana minilyamo. Wane mende takangeme tolasala naengepe?
8Goteme tolasetae dupa-pipa nyakama awapa nakatatamino kandao doko, tenge dokonya nyakama Gotenya ikiningi daa, mandyuu paenge joo katatami.
9Nyakamame dake apata masalapape: naimanya takange dupame naima tolasilyaminopa naimame dupa andanda semaingi. Dopana, naimanya imambu dupanya Takange Gote dokonya naima pundipundi etete katatamanopa lete katenge doko nyetama.
10Naimanya takange dupame nyakamanya masiaminoli pyoo gii kuki naimanya mana dupa tolasingimaka doko, Goteme naima lao masetala baa tangenya mana epe etete doko nyetaminopa lao tolasingi.
11Goteme naima kenda pisoo tolasilyamo dokopa naimame mona yaepala nayao mona kenda iki kaenge. Dopaka doko, baame naimanya mana doko tolasekelyamopa maitakao dapa pyoo angi jingi: naimame mana epe doko kandatala naima mona lyuu lao katenge.
12Dopana, kingi mokopi yukupae setamo dupa nyakamame dee kyoto injisalapape.
13Nyakamame kaitini payapenge doko tolao wapualapape. Dopa pitaminpa endakali moko koo mende koyala nayao baa dee epe jeta.
14Nyakamame endakali pitaka mona lyuu lao katenge mana dokopa mana epe etete dokopa dolapo kyoto joo watao minalapape. Mana epe naminingi endakali dokome Kamongo doko nakandata.
15Nyakama kandao kalyepape. Aopyoo latala nyakamanya mendeme Gotenya mona epe palenge doko yakinatami. Aopyoo latala nyakamanya kainanya ita mende katapala, dokonya dii kaa pipae manditamo dokome nyakama kenda piseta. Aopyoo latala dopale dupame nyakamanya longo mendapua aii pyaseta.
16Aopyoo latala endakali mendeme kepo kolenge mana watao minata. Aopyoo latala wamba Isome piamoli pyoo Gote maita maitami. Paa mendai iki nee sambalanya baa wane mupa dokonya auu pingi dupa yakinea-pyaa.
17Maitakao baame auu pipae doko nyotoo lao masiamoaka doko, takangeme daa leamo doko nyakamame masilyamino. Isome doko nyotoo lao paa longo lao ee leamoaka doko, baame kapa pao takangenya mona kapilyepenge nanjia-pyaa.
18Indupa nyakama yuu Sainaimandapi kapa pao nyepenge mendenya tengesa pao kopao nakalyamino. Nyakama pao itate andakepi, iminjetae etetepi, poo pupu lapaepi, beto pyatapi, endakali kambu mendenya pii latapi mendenya patala naelyamino. Pii doko leamopa siamino endakali dupame pii dokonya waipa soo laa nayalapa lao yako leami.
20Goteme pii mana lamaiyamo doko dupame pakame kumiami-pyaa. Baame lao pituu, “Endakali mende yuu manda dokonya patamo kandao doko, nyakamame baa kaname pyao kumasepenge. Mena yanapi patamo dupa apata dopaka pipengena,” lea-pyaa.
21Opale kandeamino dupame endakali dupa etete paka pisoaka pao, Moseseme, “Namba etete pakame kumapala walu lelyona,” leamo dokonya tuu lea-pyaa.
22Nyakama opale mendenya pyakamatala naelyamino. Nyakama Gote lete katenge dokonya taono andake Sayonemanda dokonya patelyamino. Doko kaitinya silyamo Jetusaleme doko. Enjele eteteaka longo dupa limbatae kalyamino dokonya nyakama pao pyakamatelyamino. Gotenya mandipae wambatae dupa limbatala tama pyoo katengema dokonya nyakama patelyamino. Goteme dupanya kenge dupa pepa pyateana, pyatae doko kaiti-kisa silyamo. Nyakama Gote tengesa patelyamino dokome endakali pitaka yapenge. Baame imambu tolataena leamo epe jeteamino endakali dupa katapimisa patelyamino.
24Dee nyakama Gotepa endakalipanya pii enenge lao setenge akali Jisasa doko-kisa patelyaminoaka. Dokopa Epolonya taiyoko kai leamo doko ita minao Jisasame taiyoko kai leamo tenge eteteaka epe palenge dokonya nyakama pao lai pilyamino.
25Aopyoo latala nyakama kale poyatala indupa pii lelyamo akali dakenya pii doko nasetamina kandao kalyepape. Wamba waka yuu dakenya Goteme endakali dupa pii kyoto mende lamaiyamopa, sowani nakayamino dupame kapa pao paka pupenge nanjia-pyaa. Indupa Gote baa kaiti-kisa katao pii kyoto mende naima langilyamo. Naimame baa maita maitamano kandao doko, naima kapa pao baa paka pupenge kaitini mende setape? Eteteaka naseta.
26Wamba Goteme pii leamo dokome yuu dake titiwali minia-pyaa. Dopaka doko, indupa baame lao pituu, “Paa mendai mende apata nambame yuu dake titiwali minato. Yuu iki daa, kaiti apata titiwali minatoakana,” latea-pyaa.
27“Paa mendai mende apata” pii dokome naima dapa pyoo laitaka pilyamo: opale Goteme wapuiyamo dupa titiwali minatala nyoo nepatamopa, dee naseta. Opale kapa pao ema napitamo dupa seta.
28Goteme naima isingi doko mendeme kapa pao koyasala nayapenge. Dopana, naimame Gote lao yaka pilino lapenge. Naimame baa lao tama pyoo baame mana auu kaengeli pyoo minao baanya kalai pyakamaipenge. Naimame baa lalyoo paka kayapenge.
29Doko, naimanya Gote doko itate andake jepae dokomena dupa pitaka yangenge.
