1Vašoda, te hin amen ajci but švedki, save hine pašal amende sar ajsi bari chmara, čhivas pal peste tele savoro, so amen cirdel tele, the o binos, so amen phandel andre a ľikeras avri andro denašiben, so hin angle amende.
2Dikhas pro Ježiš, ko zachudľa a dokerel amaro pačaben. Ov precerpinďa o meriben pro kerestos a pregeľa bara ladžaha, bo džanelas, hoj pre leste užarel baro radišagos, a paľis peske bešľa pal e čači (pravo) sera le Devleskere tronoske.
3Gondoľinen pre oda, ko zľigenďa kajci nalačhe lava le binošnendar, so džanas pre leste, hoj tumen te na podden a te na slabisaľon pro duchos.
4Bo mek tumen na marenas le binoha dži andro rat.
5Bisterďan pro lava, so tumen zoraľaren, a vakeren ke tumende sar ko čhave? Čhavo miro, sar tut o Raj bararel avri, ma le tuke lokes oda, aňi ma slabisaľuv, akor sar tuke dovakerel.
6Bo kas o Raj kamel, oles bararel zoraha avri a marel sakones, kas prilel sar čhas.
7Ľikeren avri andre oda pharipen, so pre tumende avel vašoda, hoj tumen te bararel avri, bo o Del tumenca avke kerel sar peskere čhavenca. Bo savo dad na bararel zoraha avri peskere čhas?
8Ale te na san avribararde avke, sar hine savore leskere čhave, akor san o kopirdana (kopiľaki) a na san leskere čhave.
9The amare ťelesne dada amen zoraha bararenas avri a ľikerahas peske len, či pes na poddaha buter le duchovne Dadeske, hoj te dživas?
10Amare dada amen zoraha bararenas avri, medik samas čhavore, avke sar peske on gondoľinenas, hoj hin mištes. No o Del amen bararel avri pre amari chasna, hoj amen te el leskere sentňipnastar.
11Hin čačo, hoj te amen vareko zoraha bararel avri, akor pes amenge oda na dičhol sar vareso, so del o radišagos, ale o pharipen. Ale paľis anel o smirom the o spravodľišagos, so hin pre chasna olenge, kas sikaďa avri.
12Vašoda rovňaren avri o vasta, so hine zmukle tele, the o khoča, so tel tumende izdran,
13a tumare pindre mi phiren pal o rovne droma, hoj oda pindro, so hino bango, te na chučel avri, ale te sasťol avri.
14Keren sa prekal oda, hoj tumen te el o smirom sakoneha a hoj te dživen o sentno dživipen, bijal savo ňiko na dikhela le Devles.
15Dikhen mištes pre oda, hoj ňiko te na visaľol palal le Devleskere lačhipnastar (milosťatar), hoj te na barol ňisavo kirko koreňis, so anďahas pharipen a musarďahas but dženen.
16Ňiko te na el lubaris aňi bijedevleskero avke sar o Ezav, savo vaš jekh chaben bikenďa peskero pravos, so les sas sar le ešebne (perše) čhas.
17Se džanen, hoj choc paľis kamelas te chudel le dadestar o požehnaňje, sas odčhido a imar pes oda na delas te visarel pale, choc rovibnaha oda kamelas.
18Se tumen na avľan ko verchos, sostar pes o manuš šaj chudel, abo so labolas la jagatar, abo ko kaľipen, ke rat abo ke burka,
19aňi ko hangos la trubakero, aňi ko hangos, so vakerel ajse lava, hoj ola, save les šunde, pes mangenas, hoj imar te na vakerel dureder.
20Bo našťi zľidžanas oda, so pes lenge prikazinelas: “Te ča o džviros pes chudľahas le verchostar, mušinel te el murdardo le barenca.”
21Oda, so dikhle, sas ajso strašno, hoj o Mojžiš phenďa: “Izdrav a darav man!”
22No tumen avľan ko verchos Sion the ko foros le džide Devleskero, ko ňeboskero Jeruzalem, the ko but ezera aňjela.
23Avľan ko radišagoskero zhromažďeňje le Devleskere ešebne čhavengero, savengere nava hine pisimen andro ňebos. Avľan ko Del, ke savorengero Sudcas, ko duchi le čačipnaskere manušengere, save imar chudle dokonalosť.
24Avľan ko Ježiš, savo anďa e nevi zmluva the ko pokropimen rat, so vakerel feder lav sar o rat le Abeloskero.
25Den tumenge pozora pre oda, hoj te šunen a te na odčhiven oles, ko vakerel! On, save na kamenas te šunel oles, ko lenge pre phuv phenelas le Devleskeri voľa, na denašle, vašoda aňi amen našťi denašaha, te pes visaraha Olestar, ko vakerel andral o ňebos.
26Leskero hangos akor čhalaďa la phuvaha, no akana mek diňa lav: “Me mek jekhvar čhalavava, na ča la phuvaha, ale the le ňeboha.”
27Oda, hoj phenel “mek jekhvar”, igen mištes sikavel pre oda, hoj ola stvorimen veci, so ena čhalade, ena ile het, hoj te ačhen ča ola veci, so pes našťi čhalaven.
28Vašoda te amen prilas oda kraľišagos, so pes našťi čhalavel, kampel amenge te paľikerel a te lašarel le Devles andre bari pačiv the andre sentňi dar, avke sar ov kamel.
29Bo amaro Del hin e jag, so zlabarel.
