1Ngan tina di tooltool alunu yo nen ngan tipatnai dada dook mata yo titara lodi medana pang Maro ye in nga, ngan ole tayei belei? Kumata nen nga, ngan idi nga ke be tagiri so le imot yo iyolidi be la tayei noonoo a be iparamidi nga, inbe tadada le gurada a tala pang ye ker, a be nen ngan la takap soo so yo Maro lon tar be ikap paidi nga.
2Ngan nen le idi nga ole tatar matada le iken so pang ye Yesu, yesoo ya in la imuku pang dada dook mata yo ke tarungu lodo medana i, inbe ya in itara lono medana pang Maro le lo medana ki in taukan busunu ye Maro matana. Inbe ya in lon galanga nen, pang dama ni nga, ngan Maro ole iyeii a lon ponana, ngan la le ikoo tiap, bong iraia tinini be nen a di tooltool tipatota lo kai palasingi kaini a tiraumate le imata. Ngan dada ke raumatenge di tooltool yo nen i, in di tooltool tikamata ngan moomoodi ye dook tiap, bong ya in ikamata ben in so sokorai, ngan nen le ikodo le tutube inbe isolo moonoo tani le lo imot. Motong la ilo ye malala ke Maro lo iwur ye Maro baene oonoo. Le nookoot nga, iyepe potai ye kookoowoo yo Maro iwur ye a matan kala so nga le imot i.
3Le lomim tut ye kene yo ikodo le tutube a isolo urata moonoo yo di tooltool ke noonoo tiyei panga nga, ngan be nen a lomim dook tiap a kayege lomim medana yo kataru pang Maro, in be.
4Moolmool, ang ngan kasolo kaiye moonoo yo pombe ye dada dook tiap ke noonoo nga, bong ang ngan sa ikodo le imede le lo tiraumate a rara ki imati, ngan tiap.
5Ngan ang ngan o lomim kalli betanga yo Maro iwete a be ipamedang di natunu ye nga, too? Le betanga tina ngan iwete nen, “Natuk, kin lom kaua urata dook ye betanga yo Tool Mai ikap pong a be ipadunong ye nga, inbe kin lom dook tiap ye kene yo iwete le koon mede a ilelong ye dada dook tiap kiong yo kuyei, ngan be.
6Yesoo, di tooltool yo Tool Mai lono pang di mai san nga, ngan ikap betanga pang di a ipadun di, inbe sei tool yo lono dook mata ye ben ya natunu i, in iyemenaii lapau.”
7Le kumata be moonoo pombe pang yang nga, ngan lomim ponana inbe kakodo le tutube a kasolo, yesoo in dada tani yo be Maro ole ikaratang ye i. Ang ngan ben Maro di natunu moolmool nga, ngan la le iyei dada yo nen ngan pang nga. Ngan ya in ikarata di natunu le imot, le dawa ben kase yo ikapsap, ngan tamana ikap betanga panga a ipadunu i. Nen le kumata be Maro ikap betanga a be ipadunong ye tiap nga, ngan dawa ben ong in natunu moolmool tiap, bong ong in dawa ben kase dadada yo taukan tamana be ipadunu i.
9Ngan so san mulu in nen. Lod tut di tamada yo nookoot nga taye di tayepe nga. Ngan ye kene yo kede kakase go nga, ngan kumata le tikap betanga paidi be tikaratidi ye nga, ngan ole lodo dook mata pang di be tilonidi nen, le ole tayitmak edi ye. Bong Tamada yo iyepe ye malala ki ete ni, in illos di tamada yo ke tana i nga. Nen le kumata be ikap betanga paidi be tikaratidi ye nga, ngan ole lod ponana ye, inbe taraua panga a be nen ngan tayepe ye yepongo dook mata yo taukan motingi i.
10Di tamada yo nookoot taye di tayepe nga, ngan tikap betanga paidi be tikaratidi ye, ngan ye manga modono kasin leu. Inbe di ngan titoo di tapdi lodi ye dada yo ke be tikaratidi ye nga. Bong Tamada Maro in ipadunidi, a be nen ngan ilonidi, inbe iyei idi le tatoo dada le imot yo ya lono be tatoo nga.
11Ngan idi nga lod galanga nen, ye kene yo be Maro ikap betanga paidi be ikaratidi ye nga, ngan kulkulunu ngan ole lod massingi ye betanga ki go. Bong ole mooloo tiap inbe takamata be dada yo iyei paidi nen nga, ngan ilonidi ngan nen le idi nga ke be tatoo dada noonoonoo, inbe tayepe ye lo silene yo ki i.
12Ngan nen le ang kapala ngan ben di tooltool yo tidada ye lewongo ke parsukungu a katedi mata inbe baedi le kedi matamata nga. Bong guramim a kamadit le lo kadada pang ye ker mulu.
13Inbe katoo dada yo tarantatu ngan le iken so pang dama ni a tala. Ngan la be di sema tooltool yo titara lodi le imede mata tiap, inbe titoo ang nga, ngan kapamede di a tikodo le timede ye lodi medana yo titaru in nga. Nen le kakawai yang dook leu ye panga kiang, ole nen ngan di tooltool tina yo titoo ang nga, ngan ole kayei di a timol le tilledi.
14Ang le imot kayei urata le guramim be le kaye di tooltool le imot kayepe ye dada yo ke lo silene i, inbe kakapye be katoo dada le imot yo Maro lono be katoo nga. Yesoo, kumata le tool be itoo dada le imot yo Maro lono be tatoo ngan tiap nga, ngan ya in o ke be ikamata Tool Mai pitiap yege.
15Le kin ang ngan kakamatang dook leu, ole nen ngan ang tina ngan atu sa be iwala murini pang dada dook mata yo Maro lono be iyei paidi nga. Inbe kin kakamatang dook leu lapau, ole nen ngan ang tina ngan atu iyei ben dingding dook tiap yo isup a ise le igarung kaningi dook mata yo ke kumu lono ngan le dook tiap nga. Nen le ye dada dook tiap ki yo iyei kataunu yang nga, ngan ole igarung di tooltool alunu le tinidi giri leu ye Maro matana.
16Inbe kin ang atu sa ikapsap ye dada yo ke di kerenge, ngan be. Inbe kin le tool kiang atu sa iwala murini pang Maro ben muku ngan Esau iyei, ngan be. Ngan ya in kase tamoto mumuanga le pang dama ni ngan ke be ikap so dook mata yo ke tamana, ngan panga, bong itangkese nene tani in pang taini kase ye sur omai atu yo ikauu panga i.
17Ngan iyei nen a imot, motong la ye kene yo be ila pang ye tamana be la ipamede ye betanga dook mata, inbe ikap so yo ipamede betanga ye ngan panga nga, ngan tamana lono dook tiap panga, le ikap so panga ben ya in kase mumuanga, ngan tiap. Nen le isere dada be ipalele soo so yo iyeii koot i, le itang pang tamana a imangmang ye be ipamede ye betanga dook mata. Bong tiap!
18Ang ngan dawa ben di Isrel yo muku ngan tipa le tila potai ye kawal Sinai, ngan tiap. Inbe ang ngan kapa le kala potai ye soo so yo be kakamata moolmool ye matamim nga, inbe katoko ye baemim, ngan tiap. Bong di ngan tikamata ei yo ikanen a ilo pang kawal i, inbe todo yo ikolomuk mata i, inbe muru yo ipa le gurana ki mai mata i.
19Inbe tilongo so dawa ben tauru kalngana itang le mai, inbe tool kalngana iwetewete le di tooltool yo tilongo betanga ki nga, ngan titattadai le timangmang ye Mose be ilele Maro a iwete kadi betanga sa mulu be.
20Ngan tiyei nen, yesoo titattadaia Maro yo iwete nen, “Kumata le tool atu, too asara atu be ipa le man itoko kawal punu nga, ngan kakatmate ye pat le imata.”
21Ngan soo so yo pombe a tikamata i, in iyei di le titattadai dook. Ngan nen le Mose iwete nen, “Au i atattadai dook tiap le nga atangarur.”
22Bong ang ngan nookoot nga kapa le kala potai ye kawal yo tiwete ene ye Saion i. Ngan in Yerusalem tani yo iken ye malala ke Maro i, inbe in malala mai tani Maro, yo iyepe nen le taukan matenge, in iyepe ye i. Inbe ang ngan kala ye ni yo di bangabangana ke Maro tau alunu le alunu kaiye tigaua a lodi ponana ye i.
23Ngan ang ngan kala le la kayepe ye gaongo ke di tooltool ke Maro. Di ngan, ikamata di atu atu ben ya di natunu mumuanga, inbe tiwodo edi ilo ye rau yo iken ye malala ke Maro ni. Nen le ang ngan kapa le kala potai ye Maro tool tani yo be ikarata betanga ke di tooltool nga le imot i. Inbe ye ni tani, in di tooltool yo noonoodi bong timmata koot nga, ngan nookoot nga tiyepe ye. Di ngan, Maro iyei di le taukadi busunu ye matana.
24Inbe ang ngan kapa le kala potai ye Yesu. Ya in la iyepe kataunu kiidi inbe Maro ye betanga medana paunu yo Maro ipamede ye rara ki yo imata ngan imati i. Inbe rara ki tani in la iwetewete paidi ye dada dook mata yo be Maro lon mulumulu yidi ye i, bong dawa ben rara ke Awele yo imati a iwetewete ye matenge ki kootoonoo, in tiap.
25Kin kakoo taraia Maro ye betanga ki yo be iwetewete pang ye, ngan be. Yesoo, muku ngan di Isrel tiwala muridi pang betanga ke Maro yo Mose ikap pang di nga, ngan le tikoo a tisuru kate malmal ke Maro tiap. Inbe di ngan tool ke tana i la iwetewete pang di leu, bong idi nga, Maro yo iyepe ye malala ki ete ni, in la iwetewete paidi i. Le kumata be tawala muriidi pang betanga ki nga, ngan ole yelei, o ke be takoo le tasuru kate malmal ki, too? Tiap yege!
26Ye kene tani in Maro kalngana ipa ke kawal Sinai a isi le iyeie tana i a itak. Bong nookoot nga ye lal yo kiidi in ngan ipamede betanga nen, “Ye lal san mulu, ngan ole ayeie tana leu a itak tiap, bong ole ayeie lang katene le itak lapau.”
27Inbe betanga tani, in lono ki nen. Ngan so le imot yo itar a iken ye lang le tana i nga, ngan kumata le itak le be imede tiap a titangarur nga, ngan ole tilledi, a be nen ngan so yo imede moolmool nga, ngan leu la be iken nga.
28Le idi nga ole tawete lo ponana kiidi le mai pang Maro a tasung panga, yesoo idi nga ole talo tagaua ye di tooltool yo be matan kala di nga, le so sa yo be itakidi le tallede, ngan tiap. Ngan nen le tatattadaii a taporonaii, inbe tasung panga ye dada yo be ya lo ponana ye i.
29Yesoo, Maro kiidi in dawa ben ei somai yo ke be ikan so nga le imot i.
